Isajos 5 - Библия - Пэ Балтитко Романи чиб (Романэс) 2019

Гилы́ пал Винагра́днико

¹ Багава Мэ Мирэ́-Дрогонэскэ гилы́ Мири́, сави́ исын дрогоноскири пал Лэ́скиро винагра́днико. Сыс винагра́днико Мирэ́-Дрогонэскиро пэ бэргитко вучипэ́н.

² Ёв обкэрдя (облыджия) лэс тыноса, жужакирдя лэс барэндыр, чхудя́ дрэ лэ́стэ лачхэ́ винаградоскирэ кашта́, кэрдя́ кхэр дрэ лэ́стэ, выґанадя одо́й штэ́то, соб (кай) тэ тасавэн винаградо, и ужакирэлас, со янэ́ла ёв лачхо́ барьякирдо́ (пло́до), а ёв яндя́ барьякирдо́ на́лачхо.

³ “Какана́, россэндякирэн Ман, мануша́лэ, савэ́ дживэ́на кэ Ерусалимо, мурша́ Юдэя́кирэ Мирэ́ винаградникоса.

⁴ Со ишчо (инкэ́) трэиндя́ тэ кэра́в ваш лэ́скэ, со Мэ лэ́скэ на кэрдём? Со́скэ ёв яндя́ налачхэ́ му́ри, ко́ли ужакиравас лэ́стыр лачхо́ барьякирдо́?

⁵ Палдава́ пхэна́ва тумэ́нгэ, со кэра́ва Мэ Мирэ́ винаградникоса: Мэ лав Пэ́скэ лэ́стыр тыно, и явэ́ла ёв чхучо́, Мэ роспхагирава лэ́скирэ ва́нты, и явэ́на тэ пхагирэн лэс.

⁶ Дасавэса Мэ лэс ячкирава: на явэ́на тэ обчхинэн лэс, на явэ́на тэ обґанавэн лэс, забарьёла ёв налачхэ́ чарьяса, Мэ припхэнава болыбнаскэ, соб (кай) ёв тэ на дэл брышы́нд лэ́скэ.”

⁷ Ра́скирэ-Дэвлэ́скиро, болыбна́скиро-янголэ́нгиро винагра́днико исын кхэр Израилёскиро, а мурша́ Юдэя́тыр – дро́го Лэ́скиро барьякирдо́, саво́ Ёв барьякирдя. Ужакирэлас Ёв, со явэ́ла чачуно́ сэ́ндо, нэ акэ – рат чхувэ́лапэ, ужакирэлас чачипэ́н, нэ акэ – годлэна.

⁸ Бида тумэ́нгэ, кон кинэла екх кхэр пал яви́р, екх фэ́лда пал яви́р фэ́лда, адя́кэ, со нанэ штэ́то ваш явирэ манушэ́нгэ, адя́кэ, со, сы́рбы тумэ́ сан екхджинэ пэ пхув.

⁹ Рай Дэвэ́л, болыбна́скиро-янголэ́нгиро, пхэндя́ дрэ мирэ́ кана́: “Далэ́ кхэра́ явэ́на чхучэ́ (пуста), барэ́ и гожа явэ́на, нэ нико́н на явэ́ла тэ дживэ́л одо́й.

¹⁰ Дэш делянки дро винагра́днико янэ́на екх бато зя́рки, нэ екх хомеро, зя́рки, со чхувэнапэ дрэ пхув на́бут со (ледзь) янэ́ла екх эфа.”

¹¹ Бида одолэ́нгэ, кон тасярлатыр пэ зло́ко (пэ ра́нко) родэ́ла бравинта и кэ рат хачкирэ́ла пэс моляса (виноса).

¹² Исын башаибэн и мол пэ лэ́нгирэ свэ́нки, а пэ Ра́скирэ-Дэвлэ́скирэ рэ́нды ёнэ на дыкхэ́на, на думинэ́на пал дова́, со кэрэ́на Лэ́скирэ васта́.

¹³ Пал саро́ дава́ джа́ла миро народо дро пле́но, ко́ли нико́н лэ́стыр дава́ на ужакирэлас; лэ́скирэ раё явэ́на бокхалэ́, лэ́скирэ барвалэ́ закамэна тэ пьен (явэ́на трушалэ).

¹⁴ Пал саро́ дава́ буґлыя лю́но (адо), и откэрдя пэ́скиро муй; зджа́ла одори́к лэ́нгиро пхутькирибэ́н, лэ́нгиро барвалыпэ́н, лэ́нгиро шумо и саро́, со радынэла лэн.

¹⁵ Пэрэ́ла ману́ш пэ чанга́, поддэлапэ мурш, пхутькирдэнгирэ якха́ змэкэнапэ тэлэ́ зачхакирэнапэ.

¹⁶ А Рай Дэвэ́л, болыбна́скирэ-янголэ́нгиро, ґаздэ́лапэ пэ сэ́ндо, Свэ́нто Дэвэ́л сыкавэ́ла дро чачипэ́н, со Ёв исын свэ́нто.

¹⁷ Бакря́ явэ́на тэ чаравэнпэ кокорэ́ пир пэ́стэ, чу́жа мануша́ явэ́на тэ хан барвалэнгирэ фэлдатыр.

¹⁸ Бида одолэ́нгэ, савэ́ тырдэна кэ пэ грэ́хо би ракхибнаскирэ шэлэнца, тырдэна кэ пэ грэ́хо сы́рбы симиренца пэ рота.

¹⁹ Савэ ракирэ́на: “Мэк Ёв тэ джал сыгэды́р, мэк тэ кэрэ́л Пэ́скири буты́, соб (кай) амэ тэ дыкхас. Мэк тэ явэ́л, мэк тэ сыкавэ́л, со дава́ исын – Свэнтонэ́-Израилёскиро годыпэ́н, соб (кай) амэ тэ ґалёвас!”

²⁰ Бида одолэ́нгэ, савэ́ налачхипэн кхарэ́н лачхипна́са, а лачхипэ́н – налачхипнаса; и пхэнэ́на пэ калыпэ́н, со дава́ исын дуд, а пэ свэ́то – со дава́ исын калыпэ́н; пхэнэ́на пэ кирко, со дава́ исын гудло́, а пэ гудло́ пхэнэ́на – киркипэн!

²¹ Бида одолэ́нгэ, савэ́ исын годьварэ́ дрэ пэ́скирэ якха́, годьварэ́ кокорэ́ анги́л пэ́стэ.

²² Бида одолэ́нгэ, савэ́ на дарэ́на тэ пьен мол (вино), и савэ́ исын зоралэ́ тэ кэрэ́н ла.

²³ Савэ пал ловэ́ отмэкэна одолэ́с, кон исын банго́, а манушэ́с, саво́ исын чачуно́, обчорэна.

²⁴ Пал-дова́, со сыр яг ха́ла пхус и сыр ха́ла яг кхас, адя́кэ кирнёла лэ́нгиро кашт, лулуди́ (цвэто) лэ́нгиро роспхурдэлапэ сыр пра́хо, пал-дова́, со ёнэ зачхурдынэ Ра́скирэ-Дэвлэ́скиро, болыбна́скирэ-янголэ́нгиро Зако́но, и на шундлэ́ ёнэ лав Свэнтонэ́ Израилёскиро.

²⁵ Пал дова́ захачола Ра́скирэ-Дэвлэ́скири холы́ пэ Лэ́скиро народо, протырдэла Ёв Пэ́скиро васт пэ лэ́ндэ, и Ёв чилавэ́ла лэн адя́кэ, со бэ́рги издрана, а лэ́нгирэ тру́пы явэ́на вычхурдынэ пэ вули́цы (га́сы) сыр гнэё. И на пириячэ́ла Лэ́скири холы́, и васт Лэ́скиро явэ́ла протырдыно.

²⁶ И Ёв ґаздэ́ла сцяго (дэ́ла припхэныбэ́н) кэ народы, савэ́ дур дживэ́на, выкхарэла одолэ́с, саво́ дживэ́ла пэ пхувья́киро яго́ро (краё), и, акэ – ёв локхэс и сы́гэс явэ́ла.

²⁷ На явэ́ла лэ́стэ одолэ́с, кон кхиныя, кон исын бизорья́киро, ни екх на засовэла, на закэрэла пэ́скирэ якха́; на злэлапэ лэ́стыр кусты́к, на рискирнапэ лэ́скирэ тривики.

²⁸ Курта́ла лэ́скири кэрды ваш марибэ́н, пэталы лэ́скирэ грэ́ндэ исын сыр бар, ро́ты лэ́скирэ – сыр балва́л.

²⁹ Годлэла ёв, сыр шчэрица (левица), годлэла сыр шчэр (ле́во); загодлэла, ухтылэ́ла дорэсыбэ́н, и нико́н на отлэла.

³⁰ Загодлэла пэ лэ́стэ дро дова́ дывэ́с сы́рбы мо́рё (дэрья́в), саво́ холя́сыя; подыкхэла ёв пэ пхув, акэ: – калыпэ́н, би́да, мурдия дуд (свэ́то) пэ болыбэ́н.