Isajos 47 - Библия - Пэ Балтитко Романи чиб (Романэс) 2019

Сэ́ндо пэ Вавило́но

¹ “Джа́, бэш пэ пра́хо, патывалы́ тэрны́ джувлы́, чхай Вавилоноскири, бэш пэ пхув. Нанэ троно (крали́тко штэ́то), чхай Халдеенгири, на пхэнэ́на пал ту́тэ буты́р, со ту сан шука́р и барвалы.

² Лэ жорны (вэлэдин) и мелин яржо́, злэ тыро́ дыкхло, ґа́здэ тыри́ подя (труюны), сыка́в тырэ́ ґэра́, джа́ пир рэ́ки (лэня́).

³ Одкэрлапэ тыро́ нангипэ́н, явэ́ла бицялы тыри́ ладж. Кэра́ва Мэ сэ́ндо, Мэ на потангинава никонэ́с.”

⁴ Амаро́ Зракхибнари исын Свэ́нто Израилёскиро, Лэ́скиро лав – Рай Дэвэ́л, болыбна́скирэ-янголэ́нгиро.

⁵ Бэш, на ра́кир ничи́, джа́ дрэ калыпэ́н (цёмныма), чхай Халдеенгири, буты́р на явэ́на тэ кхарэ́н тут раняса дро кралипэ́н.

⁶ Холясыём Мэ пэ Миро народо, хасякирдём Мирэ́ чхавэ́н, отдыём лэн дрэ тырэ́ васта́, Вавило́но, а ту на потангиндян лэн; пхуро́ ману́ш лыджия́ тыро́ пхарипэ́н.

⁷ Ту ракирэсас: ‘Саро́ джиибэ́н мэ ява́ва раняса,’ – а ту на прилыян тырэ́ годя́са, на думиндян, со дурэды́р явэ́ла.

⁸ Акана́ вышу́н дава́, роспестиндлы, биракхибнаскири, сави́ ракирэ́ла дро пэ́скиро ило́: ‘Мэ сом екх адасави, явирья нанэ; мэ на ячавапэ биромэскири (пивляса), мэ на хасякира́ва чхаворэ́н.’

⁹ Нэ ко́ли ту на ужакирэса, то саро́ кэ ту явэ́ла: и ромэс хасякирэса и чхаворэ́н дро екх дывэ́с; явэ́ла кэ ту биба́хт пхэрдэ́с, на зракхэ́ла тут чорахано джиныбэ́н и бари зор чораханы.

¹⁰ Ту́тэ сыс наде́я пэ тырэ́ налачхэ́ рэ́нды, ту пхэндя́н: ‘Нико́н ман на дыкхэ́ла.’ Тыри́ годы́ и тыро́ джиныбэ́н змардэ тут дромэ́стыр; ту ракирэсас дро тыро́ ило́: ‘Мэ сом, и буты́р нанэ никонэ́с апри́ч Ма́ндэ.’

¹¹ Явэ́ла кэ ту чорипэ́н (биба́хт); ту на ґалёса, савэ́ рига́тыр ёй ґаздэ́лапэ; явэ́ла кэ ту би́да, и ту ла́тыр на нашэса; явэ́ла хасибэ́н, пал саво́ ту на думинэса.

¹² Ячпэ тырэ́ чораханэ джиныбнаса, саво́ ту лыян тэ кэрэ́с ишчо (инкэ́) дро тэрныпэн, зракхпэ лэ́са бидатыр.

¹³ Ту кхиныян, пал-дова́ со прилыян бут годыпэ́н (советы); мэк тэ явэ́н одолэ́, кон ангилпхэнэла пир болыбэ́н, пир нэво́ чхон и чэргэня́, мэк тэ зракхэн ёнэ тут долэ́стыр, со явэ́ла.

¹⁴ Акэ, ёнэ исын сыр пхус, яг схачкирдя́ лэн, на зракхнэ́ ёнэ пэ́скиро джиибэ́н ягатыр; ничи́ на яця́пэ – ни вангар, соб (кай) тэ татёс, ни яг, соб (кай) тэ бэшэс на́бут паш ла́тэ.

¹⁵ Акэ, савэ́ ячнэ́ одолэ́, конэса ту кэрэсас буты́, конэса ту тимисякирэсас (таргинэсас) ишчо (инкэ́) дро тырэ́ тэрнэ́ бэрша́. Кажно гия́ пэ пэ́скири риг; нико́н на зракхэ́ла тут.