Isajos 46 - Библия - Пэ Балтитко Романи чиб (Романэс) 2019

Мулэ́ Идолы и Джидо́ Дэвэ́л

¹ Пыя́ Вило [Бэл-ю.о.], пыя́ Нево; лэ́нгирэ и́долы пасёна пэ грэ́ндэ и гурувэндэ, пхаро́ лэ́нгэ дава́ тэ лыджа́н кхинэ мурдалэ́нгэ!

² Пынэ́, пынэ́ кхэтанэ́, на зракхнэ́ одолэ́н, кон лэн лыджалас, и кокорэ́ гинэ́ дро пле́но.

³ Шунэ́н ман, кхэр Яково́скиро, сарэ́, кон яця́пэ Израилёскирэ кхэрэ́стыр, конэ́с Мэ прилыём бияныпнастыр и Мэ лыджавас да́кирэ лочовя́тыр.

⁴ Тумэ́ пхурьёна, а Мэ адасаво́ ява́ва; парнёна тумарэ́ бала́, а Мэ ява́ва тэ лыджав тумэн. Мэ создыём тумэн и лава́ тэ лыджав, Мэ ла́ва тэ подрикирав, Мэ ява́ва тэ ракхав тумэн.

⁵ Пэ конэ́стэ Мэ зджава (поджава), сыр тумэ́ думинэ́на, кон исын Адасаво́, сыр Мэ сом?

⁶ Мануша́ дорэсэ́на сувнака́й кисыкатыр, ублавэна руп и кхарэ́на манушэ́с, соб (кай) ёв тэ кэрэ́л лэ́стыр дэвлэс; мангэ́нпэ дэвлэскэ и пэрэ́н пэ чанга́ анги́л лэ́стэ.

⁷ Ёнэ лэ́на лэс пэ псикэ́, лыджа́на лэс, чхувэ́на пэ лэ́скиро штэ́то, ёв исын тэрдо́, ёв на зджа́ла штэто́стыр; мануша́ годлэна, нэ ёв ничи́ на пхэнэ́ла, на ракхэ́ла бидатыр.

⁸ Пририпирэн дава́ и сыкавэ́н пэс муршэнца; прилэ́н дава́ кэ ило́, мануша́лэ, савэ́ отгинэ́ чачунэ́ Дэвлэ́стыр.

⁹ Пририпирэн дова́, со сыс англэды́р сарэ́стыр, пал-дова́ со Мэ сом Дэвэ́л и нанэ явирэ Дэвлэ́с, нанэ никонэ́с, кон зджа́ла (поджала) пэ Ма́ндэ.

¹⁰ Мэ пхэна́ва англэды́р сарэ́стыр, со тэ́ньчи дро ко́нцо (дро яго́ро) явэ́ла, ґаратунэ́ часостыр Мэ ракира́ва пал дова́, со ишчо (инкэ́) на кэрдя́пэ: Явэ́ла пир Миро годыпэ́н (совето); Мэ кэра́ва саро́, со Ма́нгэ исын пир ило́.

¹¹ Мэ кхардём орло́с (кидо́с) вастоко́стыр; дуратунэ́ рига́тыр Мэ кхардём одолэ́с, кон кэрэ́ла пир Миро припхэныбэ́н. Мэ пхэндём и кэра́ва кэ ко́нцо (яго́ро); ангилпхэндём и явэ́ла адя́кэ.

¹² Пошунэн Ман, мануша́ холямэ́ илэ́са, савэ́ отгинэ́ чачипнастыр.

¹³ Подги́я Миро чачипэ́н, ёв исын на́дур, сы́гэс явэ́ла Миро зракхибэ́н; Мэ да́ва зракхибэ́н Сионоскэ, а Израилёскэ – Мири́ паты́в.