Isajos 45 - Библия - Пэ Балтитко Романи чиб (Романэс) 2019

Кира, Ману́ш Дэвлэ́стыр

¹ Адя́кэ ракирэ́ла Рай Дэвэ́л кэ Кира, савэ́с Ёв помакхця: Мэ рикирава тут пал чачо́ васт, соб (кай) тэ отдав ту́кэ народы, Мэ злава кустыка, со сыс пэ трушула кралье́ндэ, соб (кай) тэ откэрэн ту́кэ вудара́, и соб (кай) по́рта тэ на запхандэлпэ.

² ‘Мэ джа́ва анги́л ту́тэ, бэ́рги роспхагирава, харкунэ́ (меди́тка) вудара́ розмарава, и штабы (запоры) саструнэ́ пирипхагирава.

³ И Мэ отда́ва ту́кэ гарадэ́ дро калыпэ́н (цёмныма) кучипэна (сокровишчы) и приракхнэ барвалыпэна, соб (кай) ту тэ ґалёс, со Мэ сом Рай Дэвэ́л, Саво́ кхарэ́ла тут пир лав, Саво́ исын Дэвэ́л Израилёскиро.

⁴ Ваш Яково́скэ, Мирэ́ писхари́скэ, ваш Израилё, Конэ́с Мэ выкэдыём, Мэ кхардём тут пир лав, дыём ту́кэ паты́в, мэк (хоть) ту на джиндян Ман.

⁵ Мэ сом Рай Дэвэ́л и явирэ́с нанэ; нанэ Дэвлэ́с апри́ч Ма́ндэ, Екх Мэ сом. Мэ выкэдыём тут, ко́ли ту на джиндян Ман,

⁶ соб (кай) тэ джинэ́н вастоко́стыр, кай кхам ґаздэ́лапэ и кэ западо (пал-панитко риг), кай кхам бэшэ́ла, со нанэ явирэ Дэвлэ́с: Мэ сом Рай Дэвэ́л и явирэ́с нанэ.

⁷ Мэ кэра́ва дуд (свэ́то) и кэра́ва калыпэ́н (цёмныма), Мэ да́ва рама́нё (миро) и кэра́ва бари би́да (биба́хт); Мэ, Рай Дэвэ́л, кэра́ва дава́.

⁸ Мэк болыбэ́н тэ дэл брышы́нд, мэк тэ чхувэлпэ чачипэ́н болыбна́стыр, мэк тэ откэрэлпэ пхув, соб (кай) тэ дэл зракхибэ́н, мэк кхэтанэ́ тэ барьёл чачипэ́н. Мэ, Рай Дэвэ́л, кэра́ва саро́ дава́.

⁹ Бида кодолэ́скэ, кон чингардэлапэ Дэвлэ́са: Саво́ создыя́ лэс, кон исын чэрепко чэрэпкэндыр пэ пхув. Ци пхэнэ́ла ґлэя (глина) пэ́скирэ мастероскэ: “Со ту кэрэ́са?”, ци пхэнэ́ла тыри́ буты́ пал ту́тэ: “Лэ́стэ нанэ васта́?”

¹⁰ Бида одолэ́скэ, кон пхэнэ́ла пэ́скирэ дадэ́скэ: “Со́скэ ту дыя́н ма́нгэ джиибэ́н?”, а да́кэ ци пхэнэ́ла ёв: “Со́скэ ту бияндян ман?”

¹¹ Адя́кэ ракирэ́ла Рай Дэвэ́л, Свэ́нто Израилёскиро, Саво́ создыя́ лэс: “Тумэ́ пхучэна Ма́ндыр, со явэ́ла Мирэ́ чхавэ́нца? И тумэ́ камэ́на тэ подпхэнэн, со трэй Ма́нгэ тэ кэра́в?”

¹² Мэ создыём пхув и манушэ́с пэ ла́тэ; Мэ – Мирэ́ васта́ протырдынэ болыбэ́н и Мэ дыём припхэныбэ́н кэ сарэ́ болыбны́тка чэргэня́ (болыбнытко халадыбэ́н).

¹³ Мэ чхудём лэс дро чачипэ́н, Мэ кэра́ва сарэ́ лэ́скирэ дрома́ маму́й (Мэ мамуякирава). Ёв кэрэ́ла Миро фо́ро, отмэкэ́ла пэ во́ля Мирэ́ манушэ́н плено́стыр, на лэ́ла лэ́ндыр нисаво́ выкиныбэ́н, ни да́ры”, – ракирэ́ла Рай Дэвэ́л, болыбна́скирэ-янголэ́нгиро.”

¹⁴ Адя́кэ ракирэ́ла Рай Дэвэ́л: “Египтя́ни, савэ́ кэрэ́на буты́, и Ефиопляни, савэ́ бикнэна, и Савейцы, вучэ́ мануша́, явэ́на тырэ́ манушэ́нца; ёнэ пал ту́тэ явэ́на тэ джа́н пхандлэ зандирьенца (цэпэнца), явэ́на, пэрэ́на пэ чанга́, лэ́на тэ мангэ́н тут, ракири́: “Екх (фэ́ни) ту́тэ исын Екх Дэвэ́л, и явирэ нанэ Дэвлэ́с.”

¹⁵ Чачо́, Ту сан, Дэвэ́л гарадо́? Дэвэ́л Израилёскиро, Зракхибнари.

¹⁶ Сарэ́ ёнэ явэ́на ладжакирдэ́; кхэтанэ́ лэ́нца джа́на ладжаса и одолэ́, кон кэрэ́ла и́долы.

¹⁷ А Израилё явэ́ла зракхно пир ве́чно зракхибэ́н дро Растэ-Дэвлэ́стэ; тумэ́ на явэ́на ладжакирдэ́ никели.

¹⁸ Адя́кэ ракирэ́ла Рай Дэвэ́л, Саво́ создыя́ болыбэ́н; Ёв – Дэвэ́л, Саво́ счхудя пхув и дыя́ зор ла́кэ; на ивья́ (напра́снэс) счхудя ла, а соб (кай) тэ дживэ́н пэ ла́тэ; Мэ сом Рай Дэвэ́л и явирэ́с нанэ.

¹⁹ На чораханэ́с Мэ ракиравас, Мэ на ракирдём пэ кало́ (тёмно) пхувья́киро штэ́то; Мэ на ракирдём кэ кхэри́тко ро́до Яково́скиро: “Ивья́ (напра́снэс) тумэ́ Ман родэ́на.” Мэ сом Рай Дэвэ́л, Саво́ ракирэ́ла чачипэ́н и сыкавэ́ла чачипэ́н.

²⁰ Скэдэ́нпэ, явэ́н, подджан сарэ́, кон зракхцяпэ народо́стыр. Мэк тэ явэ́н одолэ́ дылынэ́ и бура, кон лыджа́ла каштуно идоло, кон мангэлапэ дэвлорэскэ, саво́ на зракхэ́ла.

²¹ Дэн тэ джинэ́н манушэ́нгэ и пхэнэ́н: “Кон пхэндя́ дава́ дро ґаратуно часо, кон ангилпхэндя дава́? Ци на Мэ, Рай Дэвэ́л, и нанэ явирэ Дэвлэ́с апри́ч Ма́ндэ, а исын екх Дэвэ́л – Мэ сом Дэвэ́л чачуно́, Саво́ зракхэ́ла и нанэ никонэ́с явирэ́с апри́ч Ма́ндэ.

²² Кэ Мэ обрисён и тумэ́ зракхэнапэ, сарэ́ яго́ры (краи́) пэ пхув, пал-дова́ со Мэ сом Дэвэ́л и нанэ явирэ́с.

²³ Мэ Кокоро́ Пэ́са совлахава: Мирэ́ уштэндыр выджа́ла чачипэ́н, лав, саво́ на парудёла, со анги́л Ма́ндэ пэрэ́ла пэ чанга́ кажно ро́дыцо, пэ Ма́ндэ совлахала кажно екхэ-чибакири ири (чиб).

²⁴ И явэ́на тэ ракирэ́н пал Ма́ндэ адя́кэ: “Фэ́ни (то́ка) Екхэ Растэ-Дэвлэ́стэ исын зор и чачипэ́н; кэ Ёв явэ́на и явэ́на тэ ладжан сарэ́ Лэ́скирэ вэ́рги.

²⁵ Рай Дэвэ́л зракхэ́ла и пир Лэ́стэ явэ́ла тэ славинэлпэ кхэри́тко ро́до Израилёскиро.