Isajos 41 - Библия - Пэ Балтитко Романи чиб (Романэс) 2019

Израилё Древа́н Патя́ла, со Дэвэ́л Помогинэла Лэ́скэ

¹ “Явэ́н штыл анги́л Ма́ндэ, островы, и мэк манушы́тка на́цыи тэ кэдэн нэвэ́стыр пэ́скиро зоралыпэ́н! Мэк ёнэ тэ явэ́н пашы́л, и мэк ёнэ тэ пхэнэ́н: ‘Тэрдёваса кхэтанэ́ пашылэды́р пэ сэ́ндо.’

² Кон ґаздыя́ чачипнаскирэ манушэ́с вастоко́стыр? Кон кхардя́ лэс тэ джал пал пэ́стэ? Кон дыя́ лэ́скэ тэл васт манушэ́нгирэ на́цыи и кэрдя́ лэс, екхэ́с тэ хулаинэ́л пэ кралье́ндэ? Кон отдыя́ лэн сы́рбы пра́хо ваш лэ́скири курта́ла, сы́рбы пхус, со вурняла, ваш лэ́скиро лу́ко?

³ Ёв традэ́ла лэн, и джа́ла бидарипнаскирэ дромэ́са, пир саво́ Ёв на псирдя́ ние́кхвар пэ́скирэ ґэрэ́нца.

⁴ Кон создыя́ и кэрдя́ саро́ дава́? Кон кхарэлас кэ Пэ манушы́тка ро́ды англыпна́стыр! Мэ сом Рай Дэвэ́л, Пэ́рво, и дрэ палатунэ́ (последня) Мэ адя́кэ-паць Сом.”

⁵ Островы дыкхнэ́ дава́ и трашандынэ, яго́ры (краи́) пхувья́кирэ страха́дынэ, ёнэ подтырдэнапэ пашылэды́р и явнэ́.

⁶ Кажно дэ́лас васт пэ́скирэ пашатунэ́ манушэ́скэ, и ракирэ́лас пэ́скирэ пшалэ́скэ: “Рикирпэ муршканэ́с.”

⁷ О пэталэнгиро (ковалё) поддэла ду́хо (фа́но) сувнакунэ́ спецоскэ, и ёв, кон, роўнинэла барэ́ млоткоса листы ґаздэ́ла ду́хо (фа́но) кодолэ́скэ, кон марэла пэ кавадло (амони), саво́ ракирэ́ла пал спайка: “Исын мишто́,” тэ́ньчи ёв зоралякирэла гвоздэнца (карфинэнца), соб (кай) тэ явэ́л саро́ зорало́ пэ штэ́то.’

⁸ Нэ ту, Израилё, сан Миро писха́ри, Яково, конэ́с Мэ выкэдыём, Аврамос, Мирэ́ малэс (другос).

⁹ Ту, конэ́с Мэ выкэдыём пхувья́кирэ ягорэндыр, и конэ́с кхардём Мэ кэ пэ самонэ дуратунэ́ штэтэ́ндыр, и конэ́скэ Мэ пхэндём: ‘Ту сан Миро писха́ри,’ Мэ выкэдыём тут и на дурьякирдём тут криг.”

¹⁰ На дар, пал-дова́ со Мэ сом ту́са: на нашадёв дро ду́хо (фа́но), пал-дова́ со Мэ сом Дэвэ́л тыро́. Мэ ява́ва тэ зорьякирав тут, и, Мэ подава васт ту́кэ, Мэ подрикирава тут Мирэ́ чачипнаскирэ чачэ́ вастэ́са.”

¹¹ Акэ, сарэ́, кон гия́ холя́са пэ ту́тэ, явэ́на ладжакирдэ́ и пэрэ́на патыватыр, явэ́на сыр нисо́, и одолэ́, кон чингардыяпэ ту́са, одолэ́ хасёна.

¹² Ту явэ́са тэ родэс лэн, и ту на латхэса лэн, кодолэ́, савэ́ камлэ́ тэ марэ́нпэ ту́са, савэ́ гинэ́ марибна́са пэ ту́тэ – ёнэ явэ́на сыр нисо́, сыр дова́, со буты́р на дживэ́ла.

¹³ Пал-дова́ со Мэ, Рай Дэвэ́л, Дэвэ́л тыро́, ява́ва тэ рикирав тут пал чачо́ васт, и пхэна́ва ту́кэ: “На дар, Мэ да́ва васт (помогинава) ту́кэ.”

¹⁴ “На дар, ту сан кирмо Яково́скиро, тумэ́, на́бут, мануша́лэ Израилёскирэ! Мэ подава васт ту́кэ”, – ракирэ́ла Рай Дэвэ́л, и Мэ сом тыро́ Выкиныбнаскиро (Выракхибнаскиро), Свэ́нто Израилёскиро.

¹⁵ Акэ, Мэ кэра́ва ту́тыр нэви́ обмарибнаскири (молотилка) востронэ дандэнца, ту явэ́са тэ обмарэс бэ́рги и ту розмарэса лэн пэ котэра́, и ту пирикэрэса бэ́ргицы дрэ шприя (мякина).

¹⁶ Ту явэ́са тэ пирикэдэс (тэ веинэс) лэн пэ балва́л, и балва́л лыджа́ла криг лэн, и рискирибнаскири балва́л сыр вихро роспхурдэла лэн, ту явэ́са древа́н тэ радынэспэ пал Растэ-Дэвлэ́стэ, и ту явэ́са барикано (тэ шарэспэ) Свэнтонэса Израилёса.

¹⁷ Ке́ли чорорэ́ и бо́ги (мануша́ дрэ трэ́бима) явэ́на тэ родэ́н пани́, и нанэ пани́, и лэ́нгирэ чиба́ (чибья́) явэ́на тэ шутён трушатыр (смэгатыр), то Мэ, Рай Дэвэ́л, ява́ва тэ шунав лэн; Мэ Дэвэ́л Израилёскиро, на мэкава лэн.

¹⁸ Мэ откэрава рэ́ки (лэня́) пэ чхучэ́ бэргицакирэ вучипэна́ и ґанынгорья машки́р долоскирэ фэ́лды Мэ кэра́ва чхучэ́ пхувья́тыр зеро (озеро), Мэ кэра́ва шукэ́ пхувья́тыр ґанынгорья пане́са.

¹⁹ Мэ чхува́ва тэ барьёл кедро, акацыя, мирта и оливи́тко кашт дрэ чхучи́ пхув, и Мэ чхува́ва тэ барьёл дрэ прахитко пхув кипарисо, сосна и буко кхэтанэ́,

²⁰ соб (кай) ёнэ тэ дыкхэ́н и тэ доджинэнпэ (тэ ґалён), тэ рискирэ́н пэ́скиро ило́ и тэ ґалён, со васт Ра́скирэ-Дэвлэ́скиро создыя́ дава́, и со Свэ́нто Израилёскиро создыя́ дава́.

Идолы, Со Ничы́ на Мол

²¹ “Сыкавэ́н (пхэнэ́н) пал пэ́скиро рэ́ндо (де́ло)”, – ракирэ́ла Рай Дэвэ́л. “Подэн (янэ́н) тумарэ́ допхэныбэна”, – ракирэ́ла Кра́ли Яково́скиро.

²² “Мэк ёнэ тэ пхэнэ́н и тэ сыкавэ́н амэ́нгэ, со явэ́ла мэк ёнэ тэ сыкавэ́н англатунэ́ (пэ́рва) причыны, савэ́ исын, соб (кай) амэ тэ розлас (тэ роз ґалёвас) лэн, и соб (кай) амэ тэ джинас, со́са кончынэлапэ кадава́ рэ́ндо, ци со тэ пхэнэ́н анги́л сарэ́ндэ, со явэ́ла анги́л.

²³ Пхэнэ́н амэ́нгэ дова́, со явэ́ла анги́л, соб (кай) амэ тэ джинас, со тумэ́ сан дэвэла́, ци кэрэ́н лачхипэ́н ци фуипэ́н, соб (кай) амэ тэ кэра́с барэ́ якха́ (тэ дивинасапэ) и тэ дыкхас дава́ кхэтанэ́ тумэ́нца.

²⁴ Чачэс, нанэ нисаво́ лачхипэ́н тумэ́ндыр, и тумари́ буты́ ничы́ на мол; джунгало́ (брыдко) исын кодова́, кон выкэдэ́ла тумэн.

²⁵ Мэ ґаздыём лэс паш-ратитконэ́ (севернонэ) рига́тыр, и ёв явэ́ла, ёв явэ́ла тэ кхарэл Миро лав пэ ра́нко (пэ зло́ко), ке́ли кхам ґаздэ́лапэ, и ёв явэ́ла тэ тасавэл тхагарьен сы́рбы бла́та (растворо), сы́рбы пиритконэнгиро тасавэла ґлэя (глина).

²⁶ Кон пхэндя́ анги́л сарэ́ндэ самонэ англыпна́стыр, соб (кай) тэ джинас амэ́нгэ, и ґара́ анги́л дава́, соб (кай) амэ́нгэ сашты́ тэ пхэнас: “Дава́ исын чачипэ́н.” Нэ нанэ никонэ́с, кон тэ пхэнэ́л анги́л сарэ́ндэ, ци вари-кон тэ шунэ́л тумарэ́ лава́.

²⁷ Мэ пэ́рво пхэндём Сионоскэ: “Дыкхэ́н, кай ёв исын!” И Мэ дыём Ерусалимоскэ екхэ́с, кон янэ́ла бахталы́ зан (звесь).

²⁸ Пал-дова́ со Мэ дыкхцём, и на сыс ние́кх ману́ш, и Мэ лыём тэ дыкха́в машки́р лэ́ндэ, нэ на сыс юнкаро (советнико), саво́, ке́ли Мэ пхучавас лэ́ндыр, то тэ дэл ра́да тэ отпхэнэл пэ лав.

²⁹ Чачэс, ёнэ сарэ́ ничы́ на мол; лэ́нгирэ бутя́ нисо́, а лэ́нгирэ выбиладэ муя́ (истуканы), исын балва́л и чхучипэн.