Isajos 4 - Библия - Пэ Балтитко Романи чиб (Романэс) 2019

¹ И ухтылэнапэ дро дова́ дывэ́с эфта́ (битринэ́нгиро дэш) джувля́ пал екхэ муршэстэ и пхэнэ́на: “Пэ́скиро маро́ ява́са тэ хас, дрэ пэ́скиро урибэ́н ява́са тэ псирас, нэ дэ, соб (кай) тэ кхараспэ пир тыро́ лав, лэ криг ладж амэ́ндыр.”

Со Явэ́ла дро Сио́но

² Дро дова́ дывэ́с сыкавэлапэ дро шукарипэ́н и дрэ паты́в отбарипэн Ра́скирэ-Дэвлэ́скиро, а пхувитко барьякирдо́ (пло́до) – дрэ барипэ́н и шарибэ́н ваш одолэ́ Израильсконэ чхавэ́нгэ, савэ́ зракхнэпэ.

³ Тэ́ньци одолэ́, кон яця́пэ пэ Сио́но и зракхцяпэ дро Ерусалимо, явэ́на тэ кхарэнпэ свэнтонэнца, дава́ явэ́на сарэ́, кон исын зачхиндло́ дрэ лылвари́ ваш джиибэ́н дро Ерусалимо.

⁴ Ко́ли морэла криг Рай Дэвэ́л Сионоскирэ чхаенгиро магирибэн и жужакирэла Ерусалимоскиро рат машки́р лэ́стэ сэндытконэ деса и ягакирэ духо́са.

⁵ И создэла (кэрэ́ла) Рай Дэвэ́л упра́л пэ кажно штэ́то, саво́ исын пэ Сионо́скири бэ́рга, и упра́л пэ ла́киро скэдыибэ́н о́блоко и тхув дывэсэ́, и ягитко дуд раты́; пал-дова́ со упра́л саро́, со исын патывало, явэ́ла учхакирдо.

⁶ И явэ́ла ша́тра, соб (кай) тэ зракхэспэ дывэсэ́ татыпнастыр, ваш дова́, соб (кай) тэ гарадёс, ко́ли джа́ла брышы́нд.