Isajos 39 - Библия - Пэ Балтитко Романи чиб (Романэс) 2019

Вавилонскиро Посло кэ Езэки́я

¹ Дро дова́ часо (цы́ро) о Меродахо, чхаво́ Валадоноскиро, кра́ли Вавилонскиро шундя́, со Езэки́я сыс насвало́ и высастия и бичхадя́ лэ́скэ лыл и да́ры.

² Сыс бахтало́ радыма́са далэ́стыр Езэки́я и сыкадя́ бичхадэ́ манушэ́нгэ кхэр, кай ракхэлас пэ́скирэ кучипэна (сокровишчы), руп, сувнака́й, куч кхандыпэна, сарэ́ марибны́тка (арсенало), саро́, со сыс лэ́стэ дрэ пираля́ кучипнаскирэ, саро́, со лэ́стэ сыс, лэ́нгэ сыкадя́, ничи́ на яця́пэ лэ́скирэ миштыпна́стыр.

³ И явдя́ проро́ко Исаё кэ кра́ли Езэки́я и пхэндя́ лэ́скэ: “Со ракирэ́нас адалэ́ мануша́? Каты́р ёнэ явнэ́?” Езэки́я пхэндя́: “Дурал явнэ́ ёнэ кэ мэ, явнэ́ Вавилоно́стыр.”

⁴ И пхэндя́ Исаё: “Со ёнэ дыкхнэ́ дро тыро́ кхэр?” Езэки́я пхэндя́: “Саро́ дыкхнэ́, саро́ миро барвалыпэ́н мэ сыкадём лэ́нгэ, ничи́ на яця́пэ дрэ мирэ́ кучипнаскирэ пираля́, со мэ на сыкадём лэ́нгэ.”

⁵ И пхэндя́ Исаё Езэкияскэ: “Шун лав Ра́стыр-Дэвлэ́стыр, болыбна́скирэ-янголэнгирэстыр.’

⁶ ‘Акэ, явэ́на дывэ́с и саро́, со исын дрэ тыро́ кхэр, со скэдынэ́ тырэ́ дада́, лыджа́на криг дро Вавило́но, ничи́ на ячэ́лапэ, – ракирэ́ла Рай Дэвэ́л.

⁷ Отлэна тырэ́ чхавэ́н, кон ту́тэ латхэ́ла, ёнэ явэ́на евнухэнца дрэ Вавилоно́скирэ-крали́скиро кхэр.’

⁸ И пхэндя́ Езэки́я Исаёскэ: “Лачхо́ исын Ра́скирэ-Дэвлэ́скиро лав, саво́ ту пхэндя́н, пал-дова́ со дрэ Мирэ́ дывэса́ Ёв бичхавэ́ла ишчо (инкэ́) рама́нё (миро) и зракхибэ́н”.