Isajos 38 - Библия - Пэ Балтитко Романи чиб (Романэс) 2019

Дэвлэ́скиро Лав тэ Зракхэ́л Израилё

¹ Дрэ долэ́ дывэса́ занасвалыя Езэки́я и скэдэласпэ тэ мэрэ́л. И явдя́ кэ ёв проро́ко Исаё, чхаво́ Амососкиро, и пхэндя́: “Адя́кэ ракирэ́ла Рай Дэвэ́л: ‘Дэ палатунэ́ упхэныбэна́ пал сарэ́ рэ́нды дро тыро́ кхэр, пал-дова́ со ту на высастёса, а мэрэ́са.”

² Тэ́ньци Езэки́я рисия́ мо́са кэ ва́нта и мангэласпэ Ра́скэ-Дэвлэ́скэ и ракирэ́лас:

³ “О, Раё Дэ́вла! Пририпир, со мэ псиравас анги́л Ту́тэ дро чачипэ́н, сарэ́ илэ́са, и кэравас мэ анги́л Тырэ́ якха́ лачхэ́ рэ́нды.” И зарондя Езэки́я зоралэ́с.

⁴ Сыс Ра́скирэ-Дэвлэ́скиро лав кэ Исаё, и сыс пхэндло́:

⁵ “Джа́, пхэн Езекияскэ: адя́кэ ракирэ́ла Рай Дэвэ́л, Давидо́скиро, тырэ́-дадэ́скиро Дэвэ́л: ‘Мэ шундём тыри́ па́тери (моли́тва), дыкхцём тырэ́ ясва и, акэ, Мэ да́ва ту́кэ, соб (кай) ту тэ дживэ́с ишчо (инкэ́) дэшупандж бэрш.

⁶ Мэ зракха́ва тут и дава́ фо́ро Асирия́кирэ-крали́скирэ вастэ́стыр, Мэ на ячкирава дава́ фо́ро.

⁷ Акэ, исын ту́кэ ґерты́к (знаме́ниё) Ра́стыр-Дэвлэ́стыр, со кэрла Рай Дэвэ́л пир лав, саво́ Ёв пхэндя́:

⁸ Акэ, мэ рискира́ва палэ кхамэскири зэр (тень), сави́ прогия́ пир ґэруня (ступени) Ахазоскирэ. И рисия́ кхам пэ дэш ґэруня (ступени) палэ, пир савэ́ ёв джа́лас тэлэ́.

⁹ Езэкия́скиро, Юдэя́кирэ крали́скири па́тери (моли́тва) дрэ дывэса́, ко́ли ёв сыс насвало́ и высастия насвалыпнастыр.

¹⁰ Мэ пхэндём пэ́скэ: на прогинэ́ ишчо (инкэ́) мирэ́ дывэса́ дро джиибэ́н, а ма́нгэ трэй тэ джав дрэ адоскири по́рта, залынэ ма́ндыр мирэ́ бэрша́.

¹¹ Мэ ракиравас: “Мэ на дыкха́ва Рас-Дэвлэ́с, буты́р мэ на дыкха́ва Рас-Дэвлэ́с пэ пхув, кай дживэ́на, мэ на ява́ва тэ дыкха́в манушэ́с машки́р одолэ́ндэ, кон дживэ́ла пэ свэ́то.

¹² Кхэр миро залэлапэ штэто́стыр, отлыджалпэ ма́ндыр, сыр ша́тра чхупнарискири, мэ сом банго́ тэ отчхинав пэ́скиро джиибэ́н сыр ткачо. Ёв отчхинэла ман; дывэ́с и рат мэ ужакиравас, со бичхавэса ма́нгэ мэрибэ́н.

¹³ Ужакиравас кэ зло́ко (ра́нко); сыр ле́во (шчэр) Ёв роспхагирэла сарэ́ мирэ́ кокалы́, дывэ́с и рат ужакиравас, со Ту бичхавэса ма́нгэ мэрибэ́н.

¹⁴ Сыр жураво (бусько) мэ багавас, сыр бахирка (ласточка) мэ шчэбичынавас, сыр голумбо мэ тугинавас, ясвэ́нца ґаздавас якха́ кэ болыбэ́н: Раё Дэ́вла! Пхаро́ исын ма́нгэ, зра́кх ман!”

¹⁵ Со мэ пхэна́ва? Ёв пхэндя́ ма́нгэ и Ёв кэрдя́. Дро штылыпэн продживава мэ сарэ́ мирэ́ бэрша́, рипири миро киркипэн пэ ило́.

¹⁶ Раё Дэ́вла! Адя́кэ дживэ́на далэ́ мануша́, дро саро́ дава́ дживэ́ла миро ду́хо (фа́но), Ту састякирэса ман, и дэ́са ма́нгэ джиибэ́н.

¹⁷ Акэ, сыклыём мирэ́ бидатыр, Ту зракхця́н миро ило́ хасибнастыр, Ту чхурдыян пал Пэ́скиро думо мирэ́ грэ́хи.

¹⁸ На лю́но (адо) шарэла Тут, на мэрибэ́н тут шарэла, нанэ наде́я пэ Тыро́ чачипэ́н одолэ́ндэ, кон мыя́.

¹⁹ Джидо́, екх джидо́ ману́ш Тут шарэла, сыр акана́ мэ сом: дад роспхэнэ́ла чхаворэнгэ Тыро́ чачипэ́н.

²⁰ Рай Дэвэ́л ман зракхэ́ла, сарэ́ амарэ́ дывэса́ амэ ла́са тэ багас гиля́ дро Кхэр Ра́скирэ-Дэвлэ́скиро башаибнаса пэ струнытка струме́нты.”

²¹ И пхэндя́ Исаё: “Мэк тэ янэ́н смоква и тэ обчхувэн ла́са чыльчако (нарыво), тэ́ньчи ёв высастёла.”

²² А Езэки́я пхэндя́: “Со́са Ту досыкавэса, со мэ ява́ва тэ псирав дро Кхэр Ра́скирэ-Дэвлэ́скиро?”