Isajos 34 - Библия - Пэ Балтитко Романи чиб (Романэс) 2019

Сэ́ндо пэ Наюды́тка На́цыи

¹ Явэ́н, народы! Шунэ́н и прилэ́н, кхэри́тка ро́ды (пле́ми)! Мэк тэ шунэ́л пхув и саро́, со исын пэ ла́тэ, баро́ свэ́то (лот) и саро́, со бияндёла дрэ лэ́стэ!

² Холы́ Ра́скирэ-Дэвлэ́скири ґаздыя́пэ пэ сарэ́ народы, пэ сарэ́ лэ́нгирэ халадыбэна (халадэ́ндэ). Ёв совлахадя́ пал лэ́ндэ, отдыя́ лэн пэ хасибэ́н.

³ Лэ́нгирэ замардэ́ мануша́ явэ́на росчхурдынэ, и закхандэна лэ́нгирэ тру́пы, бэ́рги явэ́на киндлэ лэ́нгирэ ратэстыр.

⁴ Хасёла болыбнытко халадыбэ́н (болыбны́тка халадэ́), и болыбэ́н закэрэлапэ (пхандэлапэ), сыр лылвари́; чэргэня́ пэрэ́на, сыр патри́н (листо) винаградоскирэ рандятыр, сыр шуки́ патри́н смоковнытконэ каштэ́стыр.

⁵ Скэдыны исын пэ болыбэ́н Мири́ курта́ла, акэ, ваш сэ́ндо змэкэлпэ ёй пэ Едомо, и пэ народо, конэ́с Мэ отдыём прокошыбнаскэ.

⁶ Курта́ла Ра́скирэ-Дэвлэ́скири пхэрдёла ратэ́са, тхулёла бакрэскирэ и бузнэскирэ ратэстыр, бакрэскирэ тхулыпнастыр, пал-дова́ со свэ́нто дыибэ́н (жэ́ртва) исын кэ Рай Дэвэ́л дрэ Восоро, баро́ замарибэн исын пэ Едомоскири пхув.

⁷ Гурува пэрэ́на лэ́нца, и гуруворэ кхэтанэ́ гурувэнца; чалякирэлапэ (панякирэлапэ) пхув лэ́нгирэ ратэ́са; пра́хо чалёла лэ́нгирэ тхулыпнаса.

⁸ Явдя́ дывэ́с, ко́ли отхала (отдэ́ла) палэ Рай Дэвэ́л, ко́ли пхучэлапэ Ёв пал Сио́но.

⁹ Рэ́ки лэ́скирэ сыр смола ячэ́на, пра́хо лэ́скиро ячэ́ла дзэвэляса (сераса) и явэ́ла пхув лэ́скири сыр хачкирды смола.

¹⁰ На пириячэна тэ хачон ни дывэсэ́, ни раты́; ве́чнэс явэ́ла тэ ґаздэлпэ (тэ джал) тхув ла́тыр, явэ́ла пхув чхучэ́ пхувья́са саро́ часо, нико́н одо́й на проджа́ла николи.

¹¹ Чирикля́ одо́й явэ́на тэ дживэ́н хуланца, филино и корако явэ́на тэ дживэ́н пэ доя́ пхув и протырдэна пир ла́тэ хасибнаскиро шыло и хасякирибнытко отвесо (уровнё).

¹² На ячэ́лапэ пэ ла́тэ никонэ́с лачхэ́-родоскирэ манушэ́ндыр, конэ́с кхарэ́на, соб (кай) тэ явэ́н ёнэ кральенца сарэ́ тхага́рья (кня́зи) ла́кирэ явэ́на сыр чхучо́ штэ́то.

¹³ Ла́кирэ барэ́ фэлатиня́ / колова (дворцы), ла́кирэ тва́рдыми (крепости) забарьёна пхусадэ́ чарьенца; явэ́ла пхув штэтоса, кай шакалы явэ́на тэ дживэ́н и явэ́ла грэдаса (двороса) ваш страусэнгэ.

¹⁴ Рискирибна́скирэ мурдала́ (звери), со дживэ́на пэ шуки́ пхув, явэ́на тэ дыкхэнпэ вэшытконэ мыцэнца; одо́й бэнга явэ́на тэ годлэн, создыибэн (сыкаибэ́н) рати́тко одо́й явэ́ла тэ откхинёл, попэрла пэ́скэ штэ́то.

¹⁵ Сап пхакэнца (крылэнца) одо́й явэ́ла тэ дживэ́л, дрэ гня́зда (ку́фо) явэ́ла тэ барьякирэл пэ́скирэ тыкныдорэн, явэ́ла тэ скэдэл лэн кэ пэ тэл пхака́, и одо́й скэдэ́напэ каґнялэ (коршуны).

¹⁶ Породэн дрэ Ра́скирэ-Дэвлэ́скири лылвари́ и прогинэн. Саро́ дава́ явэ́ла, ничи́ на отпарувэлапэ и ние́кх на парувэлапэ явирэса, пал-дова́ со ушта́ Лэ́скирэ припхэндлэ и ду́хо (фа́но) Лэ́скиро лэн скэдэ́ла.

¹⁷ Ёв Кокоро́ выкэдыя́ лэн пир жрэбиё, Ёв роздыя лэ́нгэ дая́ пхув пир меракири ме́жа; ёнэ залэна ла и явэ́на тэ дживэ́н одо́й ве́чнэс.