Isajos 3 - Библия - Пэ Балтитко Романи чиб (Романэс) 2019

Со Явэ́ла Ерусалимоса

¹ Акэ, Рай Дэвэ́л, Рай Дэвэ́л болыбна́скирэ-янголэ́нгиро, залэла Ерусалимо́стыр и Юдэя́тыр кхия и дэсто́, подрикирибэ́н марэ́са и подрикирибэ́н пане́са.

² Рас и халадэс, сэндарис и пророко́с, манушэ́с, саво́ исын чорахано (магико) и пхурэс,

³ Пандждэшэнгирэ, шэралэс и барэ́ рас, и годьварэ́ манушэ́с, манушэ́с, саво́ кэрэ́ла шукарипэ́н, и одолэ́с, кон джинэ́ла, сыр куч тэ ракирэ́л.

⁴ И Мэ да́ва лэ́нгэ тэрнэ́-бэршэнгирэн дрэ барыдырэндэ, чхаворэ́ явэ́на тэ россэндякирэн (тэ хулаинэн) машки́р лэ́ндэ.

⁵ Екх явэ́ла тасадо явирэса дро народо, кажно явэ́ла затасадо пэ́скирэ пашатунэса; тэрно́ чхаво́ ґаздэ́лапэ пэ пхурэстэ, бутярно – пэ растэ.

⁶ Тэ́ньци ухтылэ́ла ману́ш пэ́скирэ пшалэ́с, дрэ пэ́скири чэ́карь (семейство), и пхэнэ́ла лэ́скэ: “Исын ту́тэ урибэ́н, яв амарэ́ ра́са, мэк тэ явэ́н далэ́ роспхагирдэ́ кхэра́ тэло тыро́ васт.”

⁷ А ёв совлахала и пхэнэ́ла: “Нашты́ тэ высастякирав народоскирэ фра́нсы (дукха́), нанэ ма́ндэ маро́ и урибэ́н, на кэрэ́н ман народоскирэ хула́са”

⁸ Адя́кэ пхадия Ерусалимо, пыя́ Юда, пал-дова́ со лэ́нгири чиб и лэ́нгирэ рэ́нды (де́лы) нанэ пал Растэ-Дэвлэ́стэ, ёнэ на вырикирэна Дэвлэ́скиро барипэ́н.

⁹ Мина лэ́нгирэ москири досыкавэла пал лэ́ндэ, пал пэ́скиро грэ́хо ёнэ роспхэнэна саро́ чачипэ́н, сыр Содомляни, ёнэ на гаравэнапэ: би́да лэ́нгэ! Кокорэ́ пэ́скэ ёнэ янэ́на бибибахт (фуипэ́н).

¹⁰ Пхэнэ́н дэвлытконэ́ манушэ́скэ: куч лэ́скэ, ёв прилэ́ла барьякирдэ́ (пло́ды) пэ́скирэ рэндостыр.

¹¹ Нэ би́да исын налачхэ́ манушэ́скэ: ёв прилэ́ла холы́ пал пэ́скирэ рэ́нды.

¹² Бияты тасавэна миро народо, джувля́ хулаинэна пэ лэ́стэ. Народо Миро! Тырэ́ хулая́ хохадэ тут, лыджинэ́ криг тут чачунэ́ дромэ́стыр.

Дэвэ́л Сэндякирэ́ла Пэ́скиро Народо

¹³ Уштыя́ Рай Дэвэ́л пэ сэ́ндо, Ёв исын тэрдо́, соб (кай) тэ сэндякирэ́л народы.

¹⁴ Дэвэ́л сэндякирэлпэ пхурэдырэнца Пэ́скирэ народо́стыр, лэ́скирэ ранца: “Тумэ́ обчордэ винагра́днико; дрэ тумарэ́ кхэра́ ракхэлапэ дова́, со тумэ́ чордэ чорорэстыр.

¹⁵ Со тумэ́ облэна Миро народо, тасавэна чорорэн?” – ракирэ́ла Рай Дэвэ́л, Рай Дэвэ́л болыбаскиро-янголэ́нгиро.

¹⁶ И пхэндя́ Рай Дэвэ́л: “Пал-дова́ со чхая́ Сионоскирэ исын пхутькирдэ́, газдэна вучэ́с пэ́скиро шэро́, кхарэ́на кэ пэ якхэ́нца, башавэна лэ́нгэ ґэрэнгирэ укэдэибэнца.

¹⁷ Обчхинэла Рай Дэвэ́л лэ́нгирэ бала́ пэ фе́ля макушка (гутуп), лэ́ла криг лэ́нгиро урибэ́н.”

¹⁸ Дро дова́ дывэ́с отлэла Рай Дэвэ́л ланцорэ ґэрэндыр, чэргэнорья, чхонорэ.

¹⁹ Чэня, мирикля, шэритка дыкхлорэ, вастытка, кустыка, душлорья (штэклыцы) кучонэ́ макхибнаса, чораханэ припхандыбэна.

²⁰ Ангрустя́ пэ ангушта и ангрустя́ дрэ накх.

²¹ Упратуно урибэ́н, тэлатуны и́дя, дыкхлэ, траминэнгирэ / муитка (кошэльки).

²² Гиндалы, санэ гада и дыкхлэ.

²³ Гудлы сунг парувэлапэ пэ накуч сунг; шэло явэ́ла сыр кусты́к, крэнца бала́ парудёна пэ нанго шэро́, буґлэ гада – пэ шматы, шукарипэ́н парувэлапэ пэ тавра.

²⁴ Мурша́ тырэ́ пэрэ́на куртала́тыр, зоралэ́ тырэ́ хасёна пэ марибэ́н.

²⁵ Явэ́на тэ тангинэн, явэ́на тэ ровэ́н пашы́л шэралэ́-форо́скири по́рта (вра́ты); и явэ́ла ёй тэ бэшэ́л пэ сарэ́са чхучи́ пхув.