Isajos 28 - Библия - Пэ Балтитко Романи чиб (Романэс) 2019

Пал Ефремостэ

¹ Бида пхутькирдэ́ кралитконэ вянкакэ [коронакэ-ю.о.], сави́ исын пэ матэ Ефремлянэндэ, лулудякэ (цвэтоскэ) лэ́скирэ гожонэ урибнастыр, саво́ зашутия, саво́ исын пэ лачхи́ фэ́лда, кай пасёна матэ моля́тыр (виностыр).

² Акэ, састо́ и зорало́ исын Растэ-Дэвлэ́стэ сыр баро́ брышы́нд барэ́нца, сыр хасякирибнытко балва́л, сыр шумно пани́, саво́ ґаздыя́пэ и зорья́са чхурдэ́ла пэ пхув.

³ Марэна мануша́ ґэрэ́нца пхутькирды вя́нка матэ Ефремлянэндыр.

⁴ И зашутинэ лулудяса лэ́скирэ гожонэ урибнастыр, сави́ исын пэ лачхи́ фэ́лда, кэрэ́на адя́кэ, сыр смокваса, сави́ сы́гэс выбария анги́л сроко, и палдава́, кон дыкхэ́ла ла, екха́тыр (сра́зу) лэ́ла вастэ́са и ха́ла екхэ ґлытанкоса.

⁵ Дро дова́ дывэ́с Рай Дэвэ́л, болыбна́скирэ-янголэ́нгиро, явэ́ла гожонэ вянкаса и шукаронэ диадэмаса ваш ячаибэ́н Лэ́скирэ народо́стыр.

⁶ И духо́са, саво́ сэндинэла пир чачипэ́н ваш кодолэ́скэ, кон бэшэ́ла пэ сэ́ндо, и муршыпнаса ваш одолэ́нгэ, кон марэлапэ вэргэнца.

⁷ Нэ кадалэ́ пэрэ́на моля́тыр (виностыр), змарэнапэ дромэ́стыр, пал-дова́ со пинэ́ сикера (бравинта); раша́й и проро́ко матинэ, згинэ годятыр; на дыкхэ́на дыкхибэ́н, ёнэ на сэндякирэна, сыр трэй.

⁸ Сарэ́ скаминда ёнэ замакхнэ, исын нажужо (чысто) штэ́то.

⁹ И ишчо (инкэ́) ракирэ́на: “Конэ́с камэ́ла ёв тэ сыклякирэ́л, конэ́скэ исын пир ило́ тэ ракирэ́л лав? Одолэ́нгэ, кон наґара пирияця́ тэ пьел да́киро тхуд?”

¹⁰ Акэ: припхэныбэ́н пало́ припхэныбэ́н, припхэныбэ́н пало́ припхэныбэ́н екх зако́но пало́ яви́р зако́но, ада́й на́бут и одо́й на́бут.

¹¹ Пало́ дова́ явирэ уштэ́нца и явирэ чиба́са (чибьяса) лэ́на тэ ракирэ́н кэ дава́ народо.

¹² Лэ́нгэ ракирэ́нас: “Акэ, исын откхиныбэн, дэн, соб (кай) тэ откхинёл кхино ману́ш, акэ, исын штылыпэн.” Нэ ёнэ на закамлэ тэ шунэ́н.

¹³ И яця́ лэ́нгэ лав Ра́скирэ-Дэвлэ́скиро: “Припхэныбэ́н пало́ припхэныбэ́н, припхэныбэ́н пало́ припхэныбэ́н, екх зако́но пало́ яви́р зако́но, екх зако́но пало́ яви́р зако́но,” пал-дова́ ёнэ джа́на и пэрэ́на, и розмарнапэ, и ёнэ явэ́на ухтылдэ́.

¹⁴ Шунэ́н Ра́скирэ-Дэвлэ́скиро лав, кошыбнарья, далэ́ раё начачипнаскирэ народоскирэ, савэ́ дживэ́на кэ Ерусалимо.

¹⁵ Пал-дова́, со тумэ́ ракирэ́на: “Амэ доракирдямпэ хорэ штэтоса тэл пхув люноса (адоса) и мэрибнаса: ко́ли проджа́ла чхупны, сави́ хасякирла саро́, кэ амэ ёй на доджа́ла, пал-дова́ со хохаибнаса амэ зракхасапэ и начачипнаса пэс закэраса (пхандасапэ).”

¹⁶ Адя́кэ ракирэ́ла Рай Дэвэ́л: “Акэ, Мэ чхува́ва бар по Сио́но, бар вырикирдо, дро́го (куч), бар зорало́: кон патя́ла дрэ лэ́стэ, на явэ́ла тэ ладжал.

¹⁷ Мэ кэра́ва адя́кэ, со явэ́на тэ меринэн сэндоса и чачипна́са; бара́ хасякирэна штэ́то, кай хохаибэ́н гарадяпэ, пани́ зачхувэла дава́ штэ́то.

¹⁸ Тумаро доракирибэ́н мэрибнаса роспэрэлапэ, доракирибэ́н люноса (адоса) на вытэрдёла. Ко́ли джа́ла чхупны тэ хасякирэ́л, то домарэла тумэн кэ ґэра́.

¹⁹ Ко́ли сыг ёй (чхупны) явэ́ла то ухтылэл тумэн; явэ́ла тэ псирэ́л кажно дывэ́с и кажно рат, сыр шунэ́на пал ла́тэ, то лэ́ла дар.”

²⁰ Набаро́ явэ́ла чхуибэ́н, соб (кай) тэ пасён, набуглы учхакирды явэ́ла, соб (кай) ла́са тэ запатькираспэ (тэ закрэнцынаспэ).

²¹ Ѓаздэлапэ Рай Дэвэ́л, сыр пэ бэ́рга Перацымо, холясо́ла сыр пэ фэ́лда Гаваоскири, соб (кай) тэ кэрэ́л Пэ́скиро рэ́ндо (де́ло), баро́ рэ́ндо, соб (кай) тэ кэрэ́л Пэ́скири буты́, бари буты́.

²² На кэрэ́н пэраса / шутки (на прэзэнтынэнпэ), соб (кай) тэ на прилэ́н ишчо (инкэ́) буты́р, пал-дова́ со мэ шундём Ра́стыр-Дэвлэ́стыр, Ра́стыр-Дэвлэ́стыр болыбна́скирэ-янголэнгирэстыр, со хасибэ́н пэ сари́ пхув явэ́ла, адя́кэ припхэндло.

²³ Пришунэн канэнца, пошунэн мири́ зан, вышунэн и лав, со мэ пхэна́ва тумэ́нгэ.

²⁴ Ци сарэ́ дывэса́ кэрэ́ла буты́ ману́ш, саво́ обкэрэла пхув тэ чхувэ́л зя́рка, саво́ розрискирэла (розмарэла) комки и рандэла пхув?

²⁵ Над, ко́ли ёв розроўнинэла пхув, то ёв чхувэ́ла дрэ ла́тэ вика, ци росчхувэла кмино, ёв барьякирэ́ла гив рядэнца, барьякирэ́ла джов дро штэ́то, саво́ ваш дава́ выкэдыя́, барьякирэ́ла пашы́л лэ́стэ просо.

²⁶ Адя́кэ исын, сыр сыклякирэ́ла Дэвэ́л лэ́скиро; Дэвэ́л дэ́ла годы́ лэ́скэ.

²⁷ Пал-дова́ со на вымарэна вика ротаса, и укэдыбнытка ро́ты на катынэна пир кмино, а каштэса вымарэна гив и кмино.

²⁸ Вымелинэна маро́, нэ на розмарэна лэс и лыджа́на пир лэ́стэ обмарибнытка ро́ты лэ́нгирэ грэнца и на роскхосэна (на ростринскирэна) лэс.

²⁹ Саро́ дава́ – Ра́стыр-Дэвлэ́стыр, болыбна́скирэ-янголэскирэстыр, ди́вна ду́мы Лэ́скирэ, бари исын Лэ́скири годы́!