Isajos 27 - Библия - Пэ Балтитко Романи чиб (Романэс) 2019

¹ Дро дова́ дывэ́с чингирэла Рай Дэвэ́л пэ́скирэ куртала́са, сави́ исын пхари́, бари и зоралы́ Левиафонос (драконос), сапэс, саво́ маму́й (прямэс) прастала, и Левиафонос, сапэс, саво́ выкрэнцынэлпэ (диндькирэлапэ), и мулякирэ́ла Рай Дэвэ́л долэ́ даранэ рупучос, саво́ дживэ́ла дро мо́рё (дэрья́в).

Нэво́ Израилё

² Дро дова́ дывэ́с “Бага́н пал лэ́стэ пал винагра́днико, саво́ исын пир ило́ ма́ндэ.

³ Мэ, Рай Дэвэ́л, ракхава лэс; кажно мэнта (минута) Мэ да́ва лэ́скэ пани́; раты́ и дывэсэ́ Мэ ракхава лэс, соб (кай) нико́н одори́к тэ на джал.

⁴ Нанэ Ма́ндэ холы́. Нэ ко́ли вари-кон чхувэ́ла проти Ма́ндэ дрэ лэ́стэ пхусадэ́ чарья́, то Мэ джа́ва пэ лэ́стэ марибна́са, сарэ́са лэс схачкирава.

⁵ Нэ ко́ли ёв/ёй помангэла Миро зракхибэ́н, и явэ́ла тэ мангэ́л рама́нё (миро) Ма́нца, мэк тэ́ньчи ёнэ тэ прилэ́н рама́нё (миро) Ма́нца.”

⁶ Дрэ дывэса́, савэ́ явэ́на, зорало́ явэ́ла Яково, выбарьёла и розмэкэлапэ лулуденца (цвэтэнца) Израилё, баро́ свэ́то явэ́ла пхэрдо́ барьякирдэса (плодоса).

⁷ Ци марэлас лэс Рай Дэвэ́л адя́кэ сыр явирэ манушэ́н? Ци замарэлас лэс адя́кэ, сыр явирэ́н замарэлас?

⁸ Ту пхуцян лэ́стыр, сыр трэй, ко́ли Ту, Дэ́вла, отгиян лэ́стыр; вычхурдыян лэс Пэ́скирэ зоралэ́ пхурдыпнаса, сыр дро дывэ́с, ко́ли пхурдэла васточно балва́л.

⁹ И далэ́са злэлапэ (выкхосэлапэ) грэ́хо Яково́скиро, злэлапэ грэ́хо лэ́стыр, ко́ли ёв розмарэла сарэ́ бара́ алтарёстыр (жэртвеникостыр) дрэ котэра́ звёскакирэ, на явэ́на тэрдэ́ дэмбитка вэладиня (рошчы) и и́долы кхамэскэ.

¹⁰ Пал-дова́ со зорало́ фо́ро чхучо́ явэ́ла, кхэра́ явэ́на чхурдынэ́, сыр чхучи́ пхув. Одо́й гуруворо явэ́ла тэ чаравэлпэ, одо́й ёв явэ́ла тэ пасёл и тэ хал лэ́скирэ рандя́.

¹¹ Ко́ли лэ́скирэ рандя́ зашутёна, лэн обпхагирэна; явэ́на джувля́ (манушня) и схачкирэна лэн. Пал-дова́ со ёнэ исын народо бигодякиро, Ёв на потангинэла лэн, Одова́, Кон саро́ создыя́.

¹² Нэ явэ́ла дрэ дова́ дывэ́с адя́кэ: Рай Дэвэ́л лэ́лапэ пало́ саро́, барэ́ рэка́тыр (лэня́тыр) кэ рэка (лэнь) Египто́скири, и тумэ́, чхавэ́ Израилёскирэ, скэдэ́напэ екх кэ екх.

¹³ И явэ́ла дрэ дова́ дывэ́с: баро́ роґо (труба) забашавэла и явэ́на одолэ́, кон нашадяпэ пэ пхув Асириякири, конэ́с вытрадынэ́ пэ пхув Египто́скири. Сарэ́ ёнэ пэрэ́на анги́л Растэ-Дэвлэ́стэ тэ дэн паты́в пэ свэ́нто бэ́рга дрэ Ерусалимо.