Isajos 26 - Библия - Пэ Балтитко Романи чиб (Романэс) 2019

Дэвэ́л Зракхибнари Израилёскиро

¹ Дро дова́ дывэ́с явэ́на тэ бага́н дая́ гилы́ пэ пхув Юдаскири: “Зорало́ фо́ро исын амэ́ндэ; на дыя́ Ёв амэ́нгэ ва́нты и вало, а дыя́ зракхибэ́н.

² Одкэрэн (псиравэн) по́рта (вра́ты), мэк тэ заджа́л народо патывало, народо, саво́ ракхэ́ла чачипэ́н.

³ Манушэ́с, зоралэ́ духо́са Ту ракхэса дрэ пхэрдо́ рама́нё (миро), пал-дова́ со пэ Ту́тэ исын лэ́скири наде́я,

⁴ На ячкирэн (на ячавэн) Рас-Дэвлэ́с николи, пал-дова́ со Рай Дэвэ́л исын зоралыпэ́н ве́чно.

⁵ Ёв чхудя́ тэлэ́ одолэ́н, кон пэ вучо́ штэ́то дживэ́ла, чхурдыя́ тэлэ́ фо́ро, саво́ вучэ́с тэрдёлас, чхурдыя́ тэлэ́ пэ пхув, чхурдыя́ дро пра́хо.

⁶ Ѓэра́ лэс (дава́ фо́ро) марэна, гэра чорорэскирэ-манушэ́нгирэ, и одолэнгирэ пирэ́ (сто́пы), савэ́ ловэ́ вымангэна.

⁷ Дром Дэвлытконэ́-манушэ́скиро исын чачуно́; Ту кэрэ́са ваш лэ́скэ чачуно́ дром.

⁸ И пэ дром, кай исын Тыро́ сэ́ндо, Раё Дэ́вла, сыс амэ́ндэ лачхо́ ужакирибэ́н пэ Ту́тэ; кэ Тыро́ лав, кэ рипирибэ́н пал Ту́тэ тырдэла амэн амаро́ ди.

⁹ Мирэ́ деса тырдавас мэ кэ Ту тэ явав раты́, мирэ́ духо́са лава́ мэ тэ родав Тут дрэ пэ́стэ тася́рлэс (ра́нэс) пэ зло́ко (ранкоса); пал-дова́ со, ко́ли сэ́ндо Тыро́ кэрэ́лапэ пэ пхув, тэ́ньчи одолэ́, кон дживэ́ла дро свэ́то, сыклёна чачипнаскэ.

¹⁰ Ко́ли грэхитконэ́ манушэ́с потангинэна, тэ́ньчи на ґалёла ёв чачипэ́н: ёв явэ́ла тэ кэрэ́л накуч дурэды́р пэ пхув патывалэнгири и на подыкхэла пэ Ра́скирэ-Дэвлэ́скиро барипэ́н.

¹¹ Раё Дэ́вла! Тыро́ васт сыс вучэ́с ґаздыно́, нэ ёнэ лэс на дыкхнэ́; дыкхэ́на и ладжана, кон бидыкхэла (нашты́ тэ дыкхэ́л) пэ Тыро́ народо; яг ха́ла Тырэ́ вэргэ́н.

¹² Раё Дэ́вла! Ту подэса амэ́нгэ рама́нё (миро), и сарэ́ амарэ́ рэ́нды Ту кэрэ́са ваш амэ́нгэ.

¹³ Раё Дэ́вла, Дэ́вла амаро́! Сыс кэ амэ и яви́р тхага́рья, нэ пир Ту́тэ амэ шарасас Тыро́ лав.

¹⁴ Мулэ́ на отджидёна, Рефаимы на уштэна, пал-дова́, со Ту явдя́н и хасякирдян лэн; хасякирдян рипирибэ́н пал лэ́ндэ.

¹⁵ Ту барьякирдян народо, Раё Дэ́вла, барьякирдян народо, шардян Кокоро́ Пэс; буґлякирдян сарэ́ рига́ пхувья́кирэ.

¹⁶ Раё Дэ́вла! Дрэ биба́хт би́да ёв Тут родэлас; мангэласпэ, ко́ли холы́ Тыри́ сыс пэ лэ́стэ.

¹⁷ Сыр пхари́ джувлы́ годлэла и ровэла пэ́скирэ дукхатыр, ко́ли ёй биянэ́ла, кадасавэ́ амэ са́мас анги́л Ту́тэ, Раё Дэ́вла!

¹⁸ Пхарэ́ амэ са́мас, страдынасас амэ и бияндям сы́рбы балва́л; амэ на зракхцям дава́ свэ́то, и на бия́ндынэ пэ свэ́то нэвэ мануша́.

¹⁹ Отджидёна Тырэ́ мулэ́, мулэ́ маса́ уштэна! Ѓаздэнпэ, радынэ́нпэ, тумэ́, савэ́н чхурдынэ́ дро пра́хо, пал-дова́ со пахлын (роса) Тыри́ састякирэла и пхув чхурдэ́ла яври́ мулэн.

Израилё Ѓаздэлапэ

²⁰ Джа́, миро народо, заджа́ дро тыро́ кхэр, закэр вудара́ пал пэ́стэ, гарадёв пэ на́бут, анги́л сыр проджа́ла холы́.

²¹ Акэ, Рай Дэвэ́л выджа́ла Пэ́скирэ штэто́стыр тэ чхувэ́л ка́ра пэ манушэ́ндэ, савэ́ дживэ́на пэ пхув, пал лэ́нгирэ грэ́хи, и пхув откэрэла рат, саво́ прилыя́ дрэ пэ́стэ и на гаравэла пэ́скирэ замардэн.