Isajos 25 - Библия - Пэ Балтитко Романи чиб (Романэс) 2019

Шарибэ́н Дэвлэ́скэ

¹ Раё Дэ́вла! Ту сан миро Дэвэ́л, мэ ла́ва тэ шара́в Тут, мэ шарава кэ вучипэ́н Тыро́ лав, пал-дова́ со Ту кэрдя́н ди́во; дова́, со припхэндян ґара́, дава́ исын чачипэ́н, ами́нь.

² Ту роспхагирдян зоралы́ тва́рдыма сарэ́са, райкано кхэр (харомо), саво́ кэрдэ́ мануша́, буты́р нанэ дро фо́ро, буты́р николи лэс на ґаздэ́на.

³ Палдава́ явэ́на тэ шарэ́н Тут зоралэ́ народы; фо́рья, кай даранэ кхэри́тка ро́ды дживэ́на, явэ́на тэ дарэ́н Ту́тыр.

⁴ Ту са́нас зракхибнаса ваш чорорэскэ, зракхибнаса ваш чорорэ́ манушэ́скэ, сыр сыс пхаро́ лэ́скэ; зракхибнаса зоралэ́ балвалятыр, и кхамэстыр. А холямо́ пхурдыпэн налачхэ́ манушэ́ндыр сыс сыр балва́л, ко́ли ёй пэ ва́нта ґаздэ́лапэ.

⁵ Сыр хачкирибэ́н пэ штэ́то бипанескиро, Ту розмардян вэргэнгиро шумо; сыр чачипэ́н пириячэ́ла брышындэстыр, адя́кэ Ту притасадян ра́дыма одолэнгири, савэ́ притасавэ́на.

⁶ И кэрэ́ла Рай Дэвэ́л, болыбна́скирэ-янголэ́нгиро пэ дая́ бэ́рга лачхо́ хабэ ваш сарэ́ народы; одо́й явэ́ла жужы мол (вино), тхулыпэн кокалэндыр; са́мо жужы (чысто) мол.

⁷ И хасякирэ́ла пэ дая́ бэ́рга учхакирибэн, саво́ учхакирэ́ла сарэ́ народы, саво́ пэ сарэ́ ро́ды исын пашло.

⁸ Мэрибэ́н хасёла сарэ́са, и выкхосэла Рай Дэвэ́л, Дэвэ́л ясва сарэ́ муендыр и злэла ладж Пэ́скирэ народо́стыр пир сари́ пхув, пал-дова́ со адя́кэ ракирэ́ла Рай Дэвэ́л.

⁹ И пхэнэ́на дрэ дова́ дэвэс: “Акэ, Ёв исын амаро́ Дэвэ́л! Пэ Лэ́стэ сыс амаро́ лачхо́ ужакирибэ́н и Ёв зракхця́ амэн! Кадава́ исын Рай Дэвэ́л; пэ Лэ́стэ сыс амаро́ лачхо́ ужакирибэ́н; ла́са тэ радынаспэ Лэ́скирэ Зракхибнастыр.”

Пал Моа́во

¹⁰ Васт Ра́скирэ-Дэвлэ́скиро пасёла пэ дая́ бэ́рга и Моа́во явэ́ла домардо пэ пэ́скиро штэ́то, сыр пхус змарэна ґэрэ́нца дро гнэё.

¹¹ Мэк тэ протырдэл ёв пэ́скирэ васта́, сыр ману́ш, саво́ плывинэла (дэ́ла плима) акана́, ростырдэла васта́ тэ плывинэл (тэ дэл плима), нэ чхувэ́ла тэлэ́ Дэвэ́л пал лэ́скиро пхутькирибэ́н, пал хохаибэ́н, саво́ лэ́скирэ васта́ кэрэ́нас.

¹² И тва́рдыма, тырэ́ зоралэ́ и вучэ́ вантэндыр роспхагирэла, Ёв розмарэла, чхурдэ́ла пэ пхув, дро пра́хо.”