Isajos 24 - Библия - Пэ Балтитко Романи чиб (Романэс) 2019

Сэ́ндо пэ Пхув

¹ Акэ, Рай Дэвэ́л хасякирэ́ла пхув кэ чхучипэн (пусто), кэрэ́ла адя́кэ, соб (кай) тэ на янэл ёй барьякирдо́ (пло́до), и пирипарувэла, роспхурдэла кодолэ́н, кон дживэ́ла пэ ла́тэ.

² И со явэ́ла народоса, дова́-паць (тожэ) явэ́ла раша́са; со явэ́ла дынариса, дова́-паць явэ́ла лэ́скирэ хула́са; со явэ́ла дынарицаса, дова́-паць явэ́ла ла́кирэ хуланяса; со явэ́ла одолэса, кон кинэла, дова́-паць явэ́ла одолэса, кон бикнэла; со явэ́ла манушэ́са, саво́ залэла ловэ́, дова́-паць явэ́ла одолэса, кон дэ́ла лэ́скэ ловэ́.

³ Пхув исын обчорды сарэ́са и чхучи́, пхув сарэ́са исын росчорды, пал-дова́ со Рай Дэвэ́л пхэндя́ дава́ лав.

⁴ Тангинэла, ровэла пхув; пыя́ духо́са, на радынэ́лпэ баро́ свэ́то, дрэ биба́хт (би́да) исын мануша́, савэ́ ґаздэнаспэ пэ пхувья́киро народо.

⁵ Пхув исын магирды манушэ́ндыр, савэ́ дживэ́на пэ ла́тэ, пал-дова́ со ёнэ отчхурдынэ зако́ны, парудэ стату́то (уставо), ёнэ пхагирдэ́ ве́чно завето.

⁶ Палдава́ прокошыбэ́н ха́ла пхув, прилэ́на биба́хт мануша́, савэ́ пэ пхув дживэ́на; схачкирдэ́ исын мануша́, савэ́ дживэ́на пэ пхув и набутка лэн яця́пэ.

⁷ Ровэла со́ко (хум) (нэви́ мол) нэвонэ́-мурьенгиро пэ сэнко (суко); дукхала рандь винаградоскири; ґаздэ́на ди пхарэ́с сарэ́, кон радынэласпэ илэ́са.

⁸ Пирияця́ ра́дыма (лош) башаибнаса пэ бубны, на радынэ́нпэ буты́р мануша́, кон радынэласпэ, ёнэ на башавэна буты́р пэ цымбалы.

⁹ На пьена буты́р мол (вино) и на багана, кирки исын бравинта ваш одолэ́нгэ, кон пьела ла.

¹⁰ Роспхагирдо исын чхучо́ фо́ро, сарэ́ кхэра́ закэрдэ пэ клыдын, нашты́ тэ заджас.

¹¹ Ровэна пэ вули́цы (га́сы) пал мол (вино), гия́ криг ра́дыма, вытрадынэ́ весёлыма (лош) пхувья́тыр.

¹² Чхучо́ исын фо́ро и по́рты исын роспхадинэ.

¹³ А машки́р пхув, машки́р народы, явэ́ла адя́кэ, сыр сыс, ке́ли обмарэнас маслины и скэдэнас винаградо, ко́ли саро́ укэдэнас.

¹⁴ Загодлэна зоралэ́ заня́са, явэ́на тэ радынэ́нпэ дро Ра́скирэ-Дэвлэ́скиро райканыпэн, и явэ́на тэ годлэн морёстыр (дэрьявэстыр).

¹⁵ Шарэ́н Рас-Дэвлэ́с пэ васто́ко, пэ островы, шарэ́н Ра́скирэ-Дэвлэ́скиро, Израилёскирэ-Дэвлэ́скиро лав!

¹⁶ Пхувья́кирэ ягоро́стыр (концостыр) шунаса амэ гилы́: “Тэ славинэлпэ Чачипна́скиро Дэвэ́л!” И пхэндём мэ: “Бида ма́нгэ, би́да ма́нгэ! Чора чорэна, чора чорэна злыдниткэс.”

¹⁷ Дар, ґанби́н (яма) и фэлы́ ухтылэна тут, ману́ш, саво́ дживэ́ла пэ пхув!

¹⁸ Тэ́ньци одова́, кон праста́ндыя, ко́ли загодлынэ дара́тыр, пэрэ́ла дро хор штэ́то, а кон выджа́ла одотхы́р, попэрла дрэ фэлы́, пал-дова́ со фэнштры болыбна́скирэ вучипна́стыр псирадёна (роскэрнапэ) и пхув издрала.

¹⁹ Пхув издрала, пхув роспэрэлапэ, пхув издрала барэ́ зорья́са.

²⁰ Кунинэлапэ (качынэлапэ) пхув, сыр мато ману́ш, кунинэлапэ и грэ́хо ла́киро пэ ла́тэ: ёй пэрэ́ла и буты́р на уштэ́ла.

²¹ И явэ́ла дро дова́ дывэ́с: зджа́ла Рай Дэвэ́л тэ кэрэ́л ка́ра пэ налачхэ́ ду́хи, савэ́ исын дро болыбэ́н и пэ пхувитконэ кралье́ндэ, савэ́ исын пэ пхув.

²² И явэ́на ёнэ скэдынэ́ кхэтанэ́ дро рово (хохо́й), и явэ́на закэрдэ дро бэшыбэн, и прилэ́на ка́ра, ко́ли проджа́на бут дывэса́ явэ́на тэ сэндинэ́н.

²³ И чхон лолёла, и кхам ладжала, ко́ли явэ́ла Рай Дэвэ́л, болыбна́скирэ-янголэ́нгиро крали́са пэ бэ́рга Сио́но и дро Ерусалимо, и анги́л лэ́скирэ пхурыдырэндэ явэ́ла барипэ́н (сла́ва).