Isajos 23 - Библия - Пэ Балтитко Романи чиб (Романэс) 2019

Лав Пал Ти́ро

¹ Ангилпхэныбэ́н пал Ти́ро. – Ровэ́н, па́рмы (корабли) Фарсисостыр, пал-дова́, со ёв исын роспхагирдо; нанэ кхэра́, нико́н дрэ кхэра́ на заджа́ла. Адя́кэ пхэндло́ лэ́нгэ Китимоскирэ пхувья́тыр.

² Явэ́н штыл, мануша́лэ, кон дживэ́ла пэ пхув машки́р мо́рё (дэрья́в), кай пхэрдо́ сыс Сидоноскирэ тылгарьенца (купцэнца), савэ́ пир мо́рё (дэрья́в) традэнас.

³ Пир баро́ пани́ янэ́нас лэ́скэ зя́рки (семяны) Сихороскирэ, умалото (урожаё) барэ́ рэка́тыр (лэня́тыр), сыс дая́ пхув штэтоса, кай народы бикнэнас.

⁴ Ладжа, Сидоно, пал-дова́ со адя́кэ ракирэ́ла мо́рё (дэрья́в), зоралыпэ́н морёскиро (дэрьявэ́скиро): “Сы́рбы мэ на мэнчынаваспэ, ко́ли мэ и на биянавас, и на барьякиравас чхавэ́н и чхае́н, и мэ на давас палэ патывалэ́ джувле́н.”

⁵ Ко́ли шунэ́на нэвипэн (вестя) Египтя́ни, ко́ли шунэ́на пал Ти́ро, то страхадёна ёнэ!

⁶ Пиритрадэн дро Фарсисо, ровэ́н, мануша́лэ, савэ́ дживэ́на пэ островы!

⁷ Ци дава́ исын тумаро́ фо́ро, фо́ро, саво́ зяинэлас радыма́тыр, фо́ро ґаратуно? Лэ́скирэ ґэра́ лыджа́на лэс тэ стенькинэлпэ (тэ псирэ́л би рэндоскиро) пэ чу́жо риг.

⁸ Кон припхэндя́, соб (кай) тэ явэ́л адя́кэ Тироса, саво́ роздэлас вянки, лэ́скирэ ку́пцы (тылга́рья) сыс тхага́рья (кня́зи), кофарья (торговцы) пир манушэ́ндэ, савэ́ одо́й бикнэнас, и сари́ пхув джинэлас лэн.

⁹ Рай Дэвэ́л, болыбна́скирэ-янголэ́нгиро, припхэндя́ дава́, соб (кай) тэ на пхутёл нисаво́ барипэ́н, соб (кай) тэ ладжан сарэ́, кон прилэ́ла паты́в пэ пхув.

¹⁰ Псир пир тыри́ пхув, чхай Фарсисоскири, псир, сыр рэка (лэнь): нико́н буты́р пэ тыро́ дром на тэрдёла.

¹¹ Ёв протырдыя́ Пэ́скиро васт пэ мо́рё (дэрья́в), Ёв пиритринскирдя кралипэна́; Рай Дэвэ́л припхэндя́ пал Ханаано, соб (кай) тэ роспхагирэн лэ́скирэ тва́рдыми (крепости).

¹² И пхэндя́: “На явэ́са ту буты́р тэ радынэспэ, патывалы́ тэрны́ джувлы́, сави́ сыс ладжакирды, чхай Сидоноскири! Ушты́, джа́ дрэ Китимо, нэ и одо́й ту на откхинёса.”

¹³ Акэ, исын пхув Халдеенгири. На сыс англэды́р дава́ народо; Асуро кэрдя́ лэс манушэ́ндыр, савэ́ дживэ́нас пэ шуки́ пхув. Ёнэ чхувэ́на пэ́скирэ вучардя (башни), роспхагирэна лэ́скирэ райканэ кхэра́, пхагирэна лэн сарэ́са.

¹⁴ Ровэ́н, па́рмы Фарсисоскирэ! Ровэ́н, пал-дова́ со зор тумари́ исын пхагирды.

¹⁵ И явэ́ла дро дова́ дывэ́с: бистрэна Ти́ро пэ эфтадэша́ бэрш, пэ ада́кицы, сыр екх кра́ли дживэ́ла. А ко́ли проджа́на далэ́ дывэса́, явэ́ла Тироса дова́, со багана пал биладжакунэ́ джувля́тэ.

¹⁶ “Лэ башады, псир пир фо́ро, бистырды биладжакуны джувлы́! Башав куч, бага бут гиля́, соб (кай) тэ пририпирэн пал ту́тэ.”

¹⁷ И явэ́ла: ко́ли эфтадэша́ бэрш проджа́на, то Рай Дэвэ́л заджа́ла кэ Ти́ро, ёв лэ́ла пэ́скири бажын, ёв лэ́ла нэвэ́с тэ кэрэ́л биладжакирэ рэ́нды сарэ́ кралипнэнца пир сари́ пхув.

¹⁸ Нэ лэ́скиро бикныбэн и лэ́скири бажын явэ́на отдынэ́ Ра́скэ-Дэвлэ́скэ; ёнэ на явэ́на гарадэ́, пал-дова́ со кэ одолэ́, кон дживэ́ла анги́л Дэвлэ́скиро муй, пириджала бажын, соб (кай) тэ хан и тэ чалён, соб (кай) тэ явэ́л лэ́ндэ зорало́ урибэ́н, саво́ ґара́ сашты́ тэ урьел.