Isajos 22 - Библия - Пэ Балтитко Романи чиб (Романэс) 2019

Лав Пал Ерусалимо

¹ Ангилпхэныбэ́н пал до́ло [фэ́лда-ю.о.], кай сыс дыкхибэ́н. – Со ту́са, фо́ро, со ту саро́ ґаздыянпэ пэ стрэ́ха (чхаки́н) [кхэр-р.с.]?

² Фо́ро, саво́ шуминэла, саво́ годлэла, саво́ радынэ́лапэ. Тырэ́ мулэн на курта́ла домардя́, на пэ марибэ́н ёнэ мынэ́.

³ Сарэ́ тырэ́ пхурыдыра́ прастанас кхэтанэ́, нэ халадэ́ лэн спхандлэ; сарэ́, кон ту́тэ латхяпэ, пхандлэ кхэтанэ́, сы́рбы дур ёнэ на прастанас.

⁴ Палдава́ Мэ, Исаё, ракира́ва: ‘Ячкирэн ман, мэ ла́ва тэ ровав киркэ ясвэ́нца, на подрикирэн ман, ко́ли обчхорды исын чхай мирэ́-народоскири.’

⁵ Палдава́, со исын дывэ́с, ко́ли на джинэ́на, со тэ кэрэ́н, ко́ли пхагирэна саро́ и ґаздэ́лапэ го́дла пэ до́ло дыкхибнаскиро Ра́стыр-Дэвлэ́стыр. Пхагирэна ва́нта, и ґаздэ́лапэ го́дла пэ бэ́рги.

⁶ И Еламо лыджа́ла курта́ла. Мануша́ исын бэштэ́ пэ вурдэна́ и Киро дорэсэ́ла шчы́то.

⁷ Акэ, тырэ́ лачхэ́ фэ́лды исын пхэрдэ́ вурдэнэнца; мануша́, савэ́ исын бэштэ́ уклистэ́, скэдынэ́пэ паш вудара́.

⁸ И лэ́на криг Юдэя́тыр учхакирибэн; и ту дро дова́ дывэ́с дыкхэ́са, со исын дро кхэр кедростыр (мардярня) дова́, со́са выджа́на пэ марибэ́н.

⁹ Нэ тумэ́ дыкхэ́на, со бут мо́лы исын роспхагирды ва́нта дро фо́ро Давидо́скиро и тумэ́ скэдэ́на пани́ дрэ тэлатуны вэндэри́н (прудо).

¹⁰ И тумэ́ придыкхэна тэ рипирэ́н (лэ́на пэ якх) кхэра́ дро Ерусалимо, и спхагирэна тэлэ́ кхэра́, соб (кай) тэ зорьякирэн ва́нта;

¹¹ и кэрэ́на машки́р дуй ва́нты вэндэри́н [рово (хохо́й)-ю.о.], соб (кай) тэ ракхэ́н пани́ пхуранэ́ вэндэриня́тыр. А пэ Одолэ́стэ, Кон кэрэ́ла дава́, тумэ́ на явэ́на тэ дыкхэ́н; и тумэ́ на дыкхэ́на пэ Одолэ́стэ, Кон ґара́ припхэндя́, соб (кай) адя́кэ тэ явэ́л.

¹² И Рай Дэвэ́л, Рай Дэвэ́л, болыбна́скирэ-янголэ́нгиро, кхарэ́ла кэ Пэ тумэн, соб (кай) тумэ́ тэ ровэ́н, тэ годлэн дро дава́ дывэ́с, соб (кай) тумэ́ тэ обчхинэн бала́, соб (кай) тэ обпхандэнпэ гонэса праскаса, саво́ урьена дрэ биба́хт.

¹³ Нэ, акэ, исын ра́дыма (лош) и сабэн! Замарэ́н гурувэ́н, чхинэн бакрэ́н, хан мас и пьен мол (вино): “Ла́са тэ хас и тэ пьяс, пал-дова́, со атася́ мэраса!”

¹⁴ И откэрдя кэ мирэ́ кана́ Рай Дэвэ́л, болыбна́скирэ-янголэ́нгиро: “На отмэкэлапэ тумэ́нгэ дава́ грэ́хо, пака тумэ́ на мэрэ́на”, – пхэндя́ Рай Дэвэ́л, болыбна́скирэ-янголэ́нгиро.

¹⁵ Адя́кэ пхэндя́ Рай Дэвэ́л, Рай Дэвэ́л, болыбна́скирэ-янголэ́нгиро: “Джа́, заджа́ кэ адава́ крали́скиро дына́ри, кэ Севна, саво́ исын пхурыдыро пэ крали́скиро кхэр и пхэн лэ́скэ:

¹⁶ Со ту́тэ исын ада́й, кон ту́тэ исын ада́й, со́скэ ту кэрэ́са ада́й копли́ца ваш пэ́скэ? Ёв кэрэ́ла пэ́скэ копли́ца по вучо́ штэ́то, пэ бэ́рга кэрэ́ла пэ́скэ кхэр.

¹⁷ Акэ, Рай Дэвэ́л чхурдэ́ла тут, сыр зорало́ ману́ш чхурдэ́ла, притасавэла тут.

¹⁸ Ёв скрэнцынэла тут, чхурдэ́ла тут пэ буґлы пхув и одо́й ту мэрэ́са, одо́й тырэ́ лачхэ́ марибны́тка вурдэна́ ладжакирэна кхэр, тырэ́-хуласкиро.

¹⁹ И чхурдава тэлэ́ Мэ тут тырэ́ штэто́стыр, и ту пэрэса пэ́скирэ пхутькирибнастыр.

²⁰ И явэ́ла дро кодова́ дывэ́с: Мэ кхара́ва Мирэ́ дынари́с Елиакимос, Хелкииноскирэ чхавэ́с.

²¹ Урьявава лэс дро тыро́ урибэ́н, обпхандава Мэ лэс тырэ́ кустыкаса, зор тыри́ отда́ва дрэ лэ́скирэ васта́; ёв дадэ́са явэ́ла ваш манушэ́нгэ дро Ерусалимо и ваш кхэр Юда́скиро.

²² И клыдын Давидо́скирэ кхэрэ́стыр Мэ чхува́ва дрэ лэ́скирэ васта́: ёв откэрэла (псиравэла) и нико́н на закэрэла (на пхандэла); ёв закэрэла и нико́н на откэрла (псиравэла).

²³ Мэ кэра́ва лэс зоралэса, сыр гвоздё (карфин) дро наковло (твардо) штэ́то; явэ́ла ёв ваш пэ́скирэ-дадэ́скиро кхэр сыр хулаитко пиралы́ (кладовая).

²⁴ Явэ́ла тэ ублавэлпэ лэ́стэ саро́ барипэ́н кхэрэ́стыр, лэ́скирэ-дадэ́скиро; саро́ кхэри́тко хулаибэн, кэ сарэ́ палатунэ́ (последня) башадя.

²⁵ “Дро дова́ дывэ́с,” – ракирэ́ла Рай Дэвэ́л, болыбна́скирэ-янголэ́нгиро, – “кунинэлапэ гвоздё (карфин), примардо пэ наковло (твардо) штэ́то, и явэ́ла вымардо, и пэрэ́ла, и пэрэ́ла саро́ пхарипэ́н, со исын пэ лэ́стэ”, пал-дова́, со адя́кэ ракирэ́ла Рай Дэвэ́л.