Isajos 20 - Библия - Пэ Балтитко Романи чиб (Романэс) 2019

Ѓертык (Знамения) Пал Еги́пто и Эфиопия

¹ Дро дова́ бэрш, ко́ли Тартано явдя́ кэ Азото, а лэс бичхадя́ Саргоно, кра́ли Асирия́киро, ёв и марэласпэ Азотоса и лыя́ лэс.

² Дро дова́ дывэ́с пхэндя́ Рай Дэвэ́л Исаёскэ, Амосо́скирэ чхавэ́скэ: “Джа́, злэ тыро́ урибэ́н, злэ тривики тырэ́ ґэрэндыр.” Ёв кэрдя́ адя́кэ; псирдя́ нанго и пиранго.

³ И пхэндя́ Рай Дэвэ́л: “Сыр Миро писха́ри (рабо) Исаё псирэлас нанго и пиранго трин бэрш, соб (кай) тэ сыкавэ́л и тэ дэл ангилпхэныбэ́н пал Еги́пто и Эфиопия,

⁴ адя́кэ лыджа́ла Асирия́киро кра́ли заухтылдэ манушэ́н пленонэн Египто́стыр, манушэ́н, савэ́ пиритрадынэ Ефиопиятыр; лыджа́ла тэрнэн и пхурэн, ёнэ джа́на нангэ и пирангэ, соб (кай) тэ ладжакирэн Еги́пто.

⁵ Тэ́ньци явэ́на тэ дарэ́н и тэ ладжан Ефиопиятыр, пэ́скирэ надеятыр, и Египто́стыр, савэ́са ёнэ шарэнаспэ.

⁶ И пхэнэ́на дро дова́ дывэ́с мануша́, савэ́ одо́й дживэ́нас: “Акэ, савэ́ исын одолэ́, пэ конэ́стэ исыс амари́ наде́я, кэ кон прастандыям пал подрикирибэ́н, соб (кай) тэ зракхаспэ Асирия́кирэ крали́стыр! И сы́рбы амэ зракхасапэ?”