Isajos 2 - Библия - Пэ Балтитко Романи чиб (Романэс) 2019

Дэвлы́тко Кралипэ́н пэ Пхув

¹ Лав, саво́ сыс дыно́ дро дыкхибэ́н Исаёскэ, Амосо́скирэ чхавэ́скэ, пал Юдэ́я и Ерусалимо.

² И явэ́ла дро палатунэ́ (последня) дывэса́: Дэвлэ́скирэ-Кхэрэ́скири бэ́рга явэ́ла чхуды́ упрэстыр, сыр яви́р бэ́рги, и явэ́ла ґаздыны вучэды́р, сыр яви́р набарэ́ бэ́ргицы и выджа́на кэ ёй сарэ́ народы.

³ И джа́на бут народэнгирэ мануша́ и пхэнэ́на: “Явэ́н, ґаздасапэ пэ Ра́скирэ-Дэвлэ́скири бэ́рга, дро Яково́скирэ-Дэвлэ́скиро Кхэр, Ёв высыклякирэла амэн, и амэ ява́са тэ псирас Лэ́скирэ дромэ́нца,” пал-дова́, со выджа́ла Зако́но Сионо́стыр, а лав Ра́скирэ-Дэвлэ́скиро – Ерусалимо́стыр.

⁴ Ёв явэ́ла тэ сэндякирэ́л бут народы, Ёв сыкавэ́ла сэндарискиро лав кэ бут ро́ды; пирикэрэна пэ́скирэ курталы (мечы) пэ плуги (пхарадя) и чхурдыпнытка бустя́ (коп΄и) пэ чхиндлэ́ (серпы), на явэ́на тэ сыклён сыр, тэ лыджа́н марибэ́н.

Дэвлэ́скиро Дывэ́с

⁵ О, Яково́скиро кхэр! Явэ́н, ява́са тэ псирас дро Ра́скирэ-Дэвлэ́скиро дуд (свэ́то).

Ра́скирэ-Дэвлэ́скири Ка́ра

⁶ Нэ ту ячкирдян тыро́ народо, кхэр Яково́скиро, пал-дова́ со ёнэ бут пирилынэ вастоко́стыр: мануша́, савэ́ исын чораханэ-подпхэныбнаскирэ, исын лэ́ндэ, сыр кэ Филистимля́ни, чужонэ́ чхавэ́нца ёнэ кэрэ́на кхэтанэ́ рэ́нды.

⁷ Пхэрдия лэ́нгири пхув рупэ́са и сувнака́са; на пиригинэса лэ́нгиро барвалыпэ́н; пхэрдия лэ́нгири пхув грэнца и на пиригинэса лэ́нгирэ вурдэна́.

⁸ Пхэрдия лэ́нгири пхув идолэнца: ёнэ мангэ́нпэ долэ́скэ, со кэрдэ́ лэ́нгирэ васта́, долэ́скэ, со кэрдэ́ лэ́нгирэ ангушта.

⁹ Пыя́ ману́ш пэ чанга́, прилыя́ мурш ладж, и Ту на примангэса лэ́нгэ.

¹⁰ Джа́ кэ бэ́рга, гарадёв дрэ пхув Ра́скирэ-Дэвлэ́скирэ дара́тыр и Лэ́скирэ шарибнастыр.

¹¹ Проджа́ла манушэ́скиро пхутькирибэ́н, пэрэ́ла манушэ́нгиро вучипэ́н, екх Рай Дэвэ́л явэ́ла вучо́ дро дова́ дывэ́с.

¹² Пал-дова́ со джа́ла дывэ́с Ра́скирэ-Дэвлэ́скиро, болыбна́скирэ-янголэ́нгиро пэ саро́ пхутькирдо и пэ саро́ ґаздыно́, саро́ ґаздыно́, саро́ дава́ явэ́ла ладжакирдо́.

¹³ Пэ сарэ́ кедры Ливаноскирэ, со исын вучэ́ и ґаздынэ́, пэ сарэ́ дэмбы Васаноскирэ, –

¹⁴ пэ сарэ́ вучэ́ бэ́рги, пэ сарэ́ набарэ́ бэ́ргицы, со исын ґаздынэ́.

¹⁵ Пэ кажно вучо́ кхэр, пэ кажно зоралы́ ва́нта.

¹⁶ Пэ сарэ́ па́рмы (корабли) Фарсисососкирэ, пэ сарэ́ лэ́нгирэ укэдыбэна.

¹⁷ Пэрэ́ла манушэ́скиро пхутькирибэ́н, пэрэ́ла манушэ́нгиро вучипэ́н, екх Рай Дэвэ́л явэ́ла вучо́ дрэ дова́ дывэ́с.

¹⁸ А и́долы сарэ́са хасёна.

¹⁹ И ґаздэ́напэ мануша́, дрэ ґебара́ (пешчэры) машкира́л скалы тэ гаравэнпэ Ра́скирэ-Дэвлэ́скирэ дара́тыр и Лэ́скирэ шардэ барипнастыр, ко́ли ґаздэ́лапэ Ёв тэ хасякирэ́л пхув.

²⁰ Дро дова́ дывэ́с ману́ш вычхурдэла пэ́скирэ и́долы, рупувэ́ и сувнакунэ́, савэ́ кэрдя́, соб (кай) тэ мангэ́лпэ лэ́нгэ,

²¹ соб (кай) тэ ґаздэлпэ (тэ заджа́л) пэ бэ́рги Ра́скирэ-Дэвлэ́скирэ дара́тыр и шардэ Лэ́скирэ барипнастыр, ко́ли Ёв ґаздэ́лапэ тэ хасякирэ́л пхув.

²² Пириячэн тэ думинэн, со подрикирла тумэн ману́ш, конэ́стэ ду́хо (фа́но) исын дрэ лэ́стэ кокорэстэ, со кэрэ́ла адава́ ману́ш?