Isajos 19 - Библия - Пэ Балтитко Романи чиб (Романэс) 2019

Пал Еги́пто

¹ Ангилпхэныбэ́н пал Еги́пто. – Акэ, Рай Дэвэ́л исын бэшто́ пэ болыбэ́н и явэ́ла дро Еги́пто. И издрана Лэ́скирэ мо́стыр и́долы Египто́скирэ, и ило́ Египто́скиро биладёла (ростаинэла) дрэ лэ́стэ.

² “Мэ ґазда́ва Египтянэн пэ Египтянэндэ, явэ́на тэ марэ́нпэ пшал пшалэса, мал малэса, фо́ро фороса, кралипэ́н кралипнаса.

³ И ду́хо (фа́но) Египто́скиро хасёла, Мэ розмарава лэ́скиро годыпэ́н (совето) и праста́на ёнэ кэ и́долы, кэ мануша́, савэ́ исын човаханэ (маги), савэ́ выкхарэна мулэн, савэ́ зумавэна.

⁴ И отда́ва Мэ Египтянэн дрэ захалэ крали́скирэ васта́; захало кра́ли явэ́ла хула́й лэ́нгиро”, – ракирэ́ла Рай Дэвэ́л, Рай Дэвэ́л, болыбна́скиро-янголэ́нгиро.

⁵ И вышутёла пани́ дро мо́рё (дэрья́в), и рэка (лэнь) пириячэ́ла тэ тхадэл и вышутёла.

⁶ И зашутёна рэ́ки (лэня́), и дрэ каналы Египто́скирэ, кай пани́ тхадэлас саро́ вышутёла; зашутёна сил (камышо) и тришчына (троснико).

⁷ Фэ́лда пашы́л рэка (лэнь), пиро́ брэги пашы́л рэка (лэнь) и саро́, со пашы́л рэка (лэнь) барьёлас, зашутёла, роспхурдэлапэ и хасёла.

⁸ И заровэна мачхибнарья, заровэна одолэ́, кон зачхурдэлас вэндка дрэ рэка (лэнь) и одолэ́, кон чхувэлас кхудя (сетки) дро пани́, пэрэ́на пэ́скирэ деса.

⁹ И явэ́на тэ ладжан одолэ́, кон барьякирэ́ла чар, савья́тыр сывэна и одолэ́, кон кэрэ́ла (кхувэла) парнэ́ похтана.

¹⁰ И явэ́на роскушнэ кхудя и сарэ́, конэ́стэ исын мирежы тэ ухтылэ́н джидэ́ мачхэн, пэрэ́на дро ду́хо (фа́но) [р.с.]

¹¹ Адя́кэ! Згинэ годятыр тхага́рья (кня́зи) Цоаноскирэ; годыпэ́н (совето) годьварэ́ манушэ́нгиро, савэ́ подпхэнэнас Фараоно́скэ, яця́ дылыно́. Сыр тумэ́ пхэнэ́на Фараоно́скэ: “Мэ сом чхаво́ годьварэ́-манушэ́нгиро, ґаратунэ́-кральенгиро чхаво́.”

¹² Кай исын ёнэ? Кай исын тырэ́ годьварэ́ мануша́? Мэк ёнэ тэ пхэнэ́н ту́кэ акана́; мэк тэ ґалён, со Рай Дэвэ́л, болыбна́скирэ-янголэ́нгиро, припхэндя́ пал Еги́пто.

¹³ Згинэ годятыр тхага́рья (кня́зи) Цоаноскирэ, хохадэ исын тхага́рья (кня́зи) Мемфисостыр, домардэ́ шэралэ́ манушэ́с пэ кхэри́тка ро́ды Египто́скирэ дромэ́стыр.

¹⁴ Рай Дэвэ́л бичхадя́ дрэ лэ́стэ ду́хо (фа́но) матыбнаскиро; ёнэ хохадэ Еги́пто дрэ сарэ́ лэ́скирэ рэ́нды, адя́кэ, сыр мато псирэ́ла пир бла́та, савья́са ёв чхадыя.

¹⁵ И на явэ́ла дрэ Еги́пто дасави́ буты́, сави́ б кэрэ́нас шэро́ и пори, пальма и дэсто́.

¹⁶ Дро дова́ дывэ́с ячэ́на Египтя́ни сыр джувля́, издрана и явэ́на тэ дарэ́н (даран) Ра́скирэ-Дэвлэ́скирэ, болыбна́скирэ-янголэ́нгирэ вастэ́стыр, саво́ Ёв ґаздэ́ла пэ лэ́ндэ.

¹⁷ Пхув Юдаскири явэ́ла дара́са ваш Еги́пто; кон пририпирэла пал ла́тэ, одова́ издрала Ра́стыр-Дэвлэ́стыр, Лэ́скирэ припхэныбнастыр, саво́ Рай Дэвэ́л отдыя́ пал Еги́пто.

¹⁸ Дро дова́ дывэ́с пандж фо́рья пэ пхув Египто́скиро явэ́на тэ ракирэ́н Ханаанытконэ чиба́са и тэ совлахан Ра́са-Дэвлэ́са, болыбна́скирэ-янголэнгирэса; екх лэ́ндыр кхарлапэ кхамитконэ фороса.

¹⁹ Дро дова́ дывэ́с штэ́то, кай янэ́на дыибэна́ Ра́скэ-Дэвлэ́скэ явэ́ла машки́р пхув Египто́скири и рипирибнытко штэ́то пал Растэ-Дэвлэ́стэ – пашы́л пхувья́кирэ рига́.

²⁰ Ёв явэ́ла сыр ґерты́к (знаме́ниё) и сыр досыкаибэн пал Растэ-Дэвлэ́стэ, янголэ́нгирэ-болыбнаскирэстэ, пэ пхув Египто́скири; пал-дова́ со ёнэ прикхарэна Рас-Дэвлэ́с, ко́ли явэ́на вэ́рги, и Ёв бичхавэ́ла лэ́нгэ зракхибнарис и затэрдыпнаскирэс (застэмпникос) и зракхэ́ла лэн.

²¹ И Рай Дэвэ́л сыкавэ́ла Пэс дро Еги́пто: и Египтя́ни дро дова́ дывэ́с уджинэна Рас-Дэвлэ́с, и янэ́на свэ́нта дыибэна́ и дэ́на лав (совла́х) Ра́скэ-Дэвлэ́скэ и сполнинэна.

²² И лэ́лапэ Рай Дэвэ́л пал Еги́пто мэрибнытконэ дукхаса, лэ́лапэ и высастякирэла; ёнэ обрисёна кэ Рай Дэвэ́л и Ёв шунэ́ла лэн и высастякирэла.

²³ Дро дова́ дывэ́с явэ́ла баро́ дром Египто́стыр кэ Асирия; и заджа́ла Асуро дро Еги́пто, а Египтя́ни дрэ Асирия, и Египтя́ни кхэтанэ́ Асириянэнца явэ́на тэ дынаринэ́н Ра́скэ-Дэвлэ́скэ.

²⁴ Дро дова́ дывэ́с Израилё явэ́ла тритонэ Египтоса и Асирияса; бахтякирибэ́н явэ́ла машки́р пхув,

²⁵ сави́ бахтякирэ́ла Рай Дэвэ́л, болыбна́скирэ-янголэ́нгиро и пхэнэ́ла: “Бахтякирдо́ исын Миро народо – Египтя́ни, и Мирэ́ вастэнгиро рэ́ндо – Асирия, и Миро мэкно́ миштыпэ́н – Израилё.”