Isajos 17 - Библия - Пэ Балтитко Романи чиб (Романэс) 2019

Пхэныбэ́н пэ Сирия и Израилё

¹ Пхэныбэ́н пэ Дама́ско. – “Акэ, Дама́ско пириячэ́ла тэ явэ́л фороса, и ёв явэ́ла груда руинэндыр.

² Ароэроскирэ фо́рья мэкэ́на мануша́, ёнэ явэ́на штэтоса ваш ґурты бакрэ́нгирэ, со явэ́на тэ пасён одо́й, и ние́кх на явэ́ла тэ трашавэл лэн.

³ Твардыма Ефремо́скири и Дамаскоскирэ-кралипнаскири и кхэтанэ́ Сириякирэ ячаибнаса, явэ́ла дасави́-паць сыр и сла́ва Израилёскирэ чхавэ́ндыр”, – ракирэ́ла Рай Дэвэ́л, болыбна́скирэ-янголэ́нгиро.

⁴ “И явэ́ла адя́кэ дро дова́ дывэ́с, со тыкнёла сла́ва Яковоскири, и тхулыпэн лэ́скирэ масэ́ндыр явэ́ла шукэдыр.

⁵ И явэ́ла адя́кэ-паць, сы́рбы гива́-чхиныбнаскиро ману́ш, саво́ скэдэ́ла зя́рки и чхинэла колосы гивэнгирэ пэ́скирэ вастэ́са и сы́рбы яви́р ману́ш, саво́ скэдэ́ла колосы пэ долоскири пхув Ефраимоскири.

⁶ И ячэ́напэ лэ́стэ сы́рбы дуй ци трин оливитка му́ри пэ са́мо упратуны рандь, ци штар ци пандж пэ са́мо пхабитко рандь пало́ дова́, сыр вымарэна (укэдэна) умалото оливитконэ каштэ́стыр”, – ракирэ́ла Рай Дэвэ́л, Дэвэ́л Израилёскиро.

⁷ Дро дова́ дывэ́с о ману́ш явэ́ла тэ дыкхэ́л пэ Создыибнаскирэстэ, и лэ́скирэ якха́ явэ́на тэ сыкавэ́н паты́в Свэнтонэ́ Израилёскирэскэ,

⁸ Ёв на явэ́ла тэ дыкхэ́л пэ алта́ри, со исын буты́ лэ́скирэ вастэнгири, ёв на явэ́ла тэ дэл паты́в, со кэрдэ́ лэ́скирэ ангушта (пальцы), ци пэ каштунэ и́долы Астартакирэ ци кхамитка (Ваалоскирэ).

⁹ Дро дова́ дывэ́с зоралякирдэ фо́рья явэ́на сыр мэкно́ штэ́то дро вэш и пэ бэргакирэ вучипэна́, со явэ́на мэкнэ́ анги́л чхавэ́ндэ Израилёскирэндэ: и явэ́на руи́ны (чхучо́ штэ́то).

¹⁰ Пал-дова́ со ту, Израилё, бистырдян Дэвлэ́с, тырэ́с Зракхибнаскирэс, и ту на рикирдян дрэ годы́, ска́ла тырэ́ – форо́скирэ рипирибнастыр; палдава́ ту почхудян камибнытка унты (сады) и вычхудян на тумарэ́ пхувья́кирэ-раслинакирэ рандёрья.

¹¹ Дро дова́ дывэ́с ту кэрэ́са саро́ адя́кэ, соб (кай) тыри́ раслина тэ барьёл, и, соб (кай) тася́рлэс (ра́нэс) пэ зло́ко (ра́нко), тыри́ зя́рка тэ лулудёл (тэ цветинэл); нэ дро счхиныбнаскиро (скэдыибнаскиро) дывэ́с явэ́ла ту́га смэнтнымаса пэ руинэнгири груда.

¹² Бида и шумо бутэ́-манушэ́нгиро, ёнэ шуминэна сыр мо́рё (дэрья́в) брилинэла (ревинэла), пэ сы́гно шумо манушытконэ́-нацые́нгиро, савэ́ нашэ́на шумоса сыр шумо бутэ́-паненгиро!

¹³ Манушы́тка на́цыи брилинэна (ревинэна) сыр шумо бутэ́-паненгиро, нэ Дэвэ́л дарьякирдя, и ёнэ явэ́на тэ нашэ́н дур, и лэн явэ́на тэ традэ́н сыр пра́хо пэ бэ́рги балваляса, сыр прахинка (пыло), со крэнцынэлапэ рискирибна́скирэ балваляса.

¹⁴ Тэ́ньци, акэ, бэльвэле́ бари дар! И анги́л зло́ко (ра́нко), лэс буты́р нанэ. Кадасави исын до́ля одолэнгири, кон обчорэла амэн, и жребие (тала́но) кодолэнгиро, савэ́ откэдэна зорья́са амаро́ миштыпэ́н.