Isajos 16 - Библия - Пэ Балтитко Романи чиб (Романэс) 2019

Пал Моа́во

¹ Бичхавэн бакрорэ́н ра́скэ, конэ́скири исын дая́ пхув, Селатыр бичхавэн пэ чхучи́ пхув пэ Сионоскирэ-чхакири бэ́рга.

² Сыр заблудно (заблэндындлы) чириклы, вычхурдыны пэ пхув, явэ́на чхая́ Моавитоскирэ пашы́л броды Арноноскирэ.

³ “Чхув совето (скэдыибэ́н), обдумин, со тэ кэрэ́н, учхакир амэн дывэсэ́, сыр раты́ тырэ́ урибнаса, прилэ́ вытрадынэн, на выдэ бикхэрэскирэн.

⁴ Мэк тэ дживэ́н на́бут ту́тэ мирэ́ вытрадынэ́ Моавитяни, зра́кх лэн чорэстыр, пал-дова́ со явэ́ла часо, ко́ли на ячэ́ла битангипнаскирэс, пириячэ́ла чорибэн, одолэ́, кон ґаздыя́пэ пэ ту́тэ, хасёна далэ́ пхувья́тыр.”

⁵ Крали́тко штэ́то явэ́ла зорало́ лачхипна́са, и бэшэ́ла пэ лэ́стэ дро чачипэ́н, дрэ ша́тра Давидоскири, сэнда́ри, саво́ родэ́ла чачипэ́н, кэрэ́ла чачо́ сэ́ндо.

⁶ Амэ шундя́м пал Моавоскиро пхутькирибэ́н, пал баро́ лэ́скиро пхутькирибэ́н, пал лэ́скирэ шарибэна и холы́, ёв пхэнэ́ла хоханэ́ лава́.

⁷ Палдава́ заровэла Моа́во пал Моа́во, сарэ́ лэ́на тэ ровэ́н пал кхэра́ Кирхарешэтоскирэ: ёнэ исын сарэ́са пхагирдэ́.

⁸ Фэлды Есевоноскирэ вышутинэ, адя́кэ исын Севамоскирэ винаградникоса, народэнгирэ раё вычхиндлэ́ лэ́скирэ лачхэ́ кашта́, савэ́ барьёнас кэ Иаезеро, тырдэнаспэ пир чхучи́ пхув лэ́скирэ рандя́ (вэ́тки) буґлёнас, ёнэ пириджанас пало́ мо́рё (дэрья́в).

⁹ Палдава́ и мэ ява́ва тэ ровав пал кашт Севамоскиро Язероскирэ роибнаса, мэ вычхувава Мирэ́ ясва пэ ту́тэ, Есево́но и Елеала, пал-дова́ со ко́ли скэдэ́на тыро́ винаградо (дракх), сыр скэдэ́на тыро́ маро́, нанэ буты́р ра́дыма.

¹⁰ Хасия́ далэ́ лачхэ́ пхувья́тыр сабэн радыма́са, на багана, на радынэ́нпэ дрэ винаградники; на кэрэ́ла винаградари мол (вино) дро пресо: Мэ кэрдём адя́кэ.

¹¹ Палдова́ тангинэла миро ило́ сыр башады (гусли) пал Моа́во, и ило́ Миро – пал Кирхарешэто.

¹² И адя́кэ явэ́ла: ке́ли явэ́ла бицяло́, со Моа́во кхинёла пэ вучэ́ штэ́ты, тэ́ньчи ёв явэ́ла пэ свэ́нто штэ́то тэ мангэ́лпэ Дэвлэ́скэ, нэ лэ́стэ нисо́ на выджа́ла.

¹³ Акэ, исын лав, со пхэндя́ Рай Дэвэ́л пал Моа́во ишчо (инкэ́) дрэ ґаратунэ́ долэ́ дывэса́:

¹⁴ Нэ акана́, акэ, со Рай Дэвэ́л пхэндя́: “Пир далэ́ трин бэрша́ сы́рбы бутярнэстэ, конэ́с лынэ́ пэ буты́, бут мануша́ явэ́на тэ дыкхэ́н вучипна́са пэ сла́ва Моавоскири, и на́бут бизорья́кирэ мануша́ ячэ́напэ.”