Isajos 15 - Библия - Пэ Балтитко Романи чиб (Романэс) 2019

Моа́во Явэ́ла Чхучо́ (Пусто)

¹ Ангилпхэныбэ́н пал Моавостэ. – Адя́кэ! Ратя́киро явэ́ла обчордо и хасякирдо Ар-Моа́во; адя́кэ! Ратя́киро-Кир-Моа́во явэ́ла обчордо и хасякирдо!

² Ёв ґаздэ́лапэ кэ Баито и Дивоно, ґаздэ́лапэ пэ вучэ́ штэ́ты, соб (кай) ёв тэ ровэл; ровэла Моа́во пал Нэво́ и Медева, лэ́ндэ сарэ́ндэ исын обчхиндлэ́ бала́, сарэ́ндэ исын вымурадэ чхора (брода).

³ Пэ вули́цы (га́сы) лэ́нгирэ обпхандэнапэ балытконэ гонэса, пэ лэ́нгирэ барэ́ дрома́ [пэ форуня́-р.с.] и пэ стрэхи сарэ́ ровэна, саро́ исын дрэ ясва.

⁴ Годлэла Есево́но и Елеала, зан лэ́нгири исын шундлы кэ Иааца, пал лэ́ндэ лынэ́ тэ ровэ́н халадэ́ Моавостыр, ди лэ́скиро ґаздыя́пэ дрэ лэ́стэ.

⁵ Ровэла миро ило́ пало́ Моа́во; праста́на лэ́стыр кэ Сигоро, кэ три́то Эгла, ґаздэ́напэ пэ Лухито роибнаса; даранэс годлэна пир дром Хоронаимоскиро.

⁶ Пал-дова́ со пирияця́ тэ тхадэл Нимримоскиро пани́, вышутинэ фэ́лды, выхачия чар, нанэ зэлэныбэн.

⁷ Пал-дова́ ёнэ исын ячаибэ́н барвалыпнастыр; со зракхнэ́ ёнэ – дова́ пирилыджана палэ рэка (лэнь) Аравиякири.

⁸ Годлэна пир саро́ Моа́во кэ ме́жы, кэ Эглаимо исын лэ́скиро роибэ́н, кэ Беэр-Элимо исын лэ́скиро роибэ́н.

⁹ Пал-дова́ со дро пани́ Димоноскиро тхадэ́ла рат, а Мэ лыджа́ва пэ Дивоно ишчо (инкэ́) нэвипэн-шчэрэн (левэн), пэ одолэ́ндэ, кон настя́ Моавостыр и яця́пэ пэ дая́ пхув.