Isajos 14 - Библия - Пэ Балтитко Романи чиб (Романэс) 2019

Вытрадаибэн Нанэ

¹ Пашылэды́р исын лэ́скиро часо, на явэ́на тэ тырдэнпэ лэ́скирэ дывэса́, пал-дова́ со потангинэла Рай Дэвэ́л Яково́с, ишчо (инкэ́) явэ́ла пир ило́ Лэ́скэ Израилё, и Ёв дэ́ла, соб (кай) тэ дживэ́н ёнэ пэ Лэ́скири пхув, явэ́на кэ ёнэ явирэ-рига́тыр мануша́, припхандэнапэ кэ кхэр Яково́скиро.

² Залэна лэн народы, янэ́на пэ лэ́нгиро штэ́то, и кхэр Израилёскиро прилэ́ла лэн кэ пэ Ра́скирэ-Дэвлэ́скири пхув дынарье́нца и дынарицэнца, заухтылэла одолэ́н, кон ухтылдя дро пле́но Израилёс, явэ́ла рай машки́р одолэ́ндэ, кон лэс тасавэлас.

Гилы́ пал Вавилонсконэ Крали́стэ

³ Явэ́ла адя́кэ дро дова́ дывэ́с: ко́ли Рай Дэвэ́л залэла ту́тыр тыри́ дукх, тыри́ дар, тыро́ пхарипэ́н, дрэ саво́ ту са́нас,

⁴ то ту багаса пхутькирды гилы́ пал Вавилоно́скирэ крали́стэ и пхэнэ́са: “Нанэ одолэ́с, кон ман мэнчынэлас, пирияця́ чорибэн!

⁵ Пхагирдя́ Рай Дэвэ́л грэхитконэ́-манушэ́нгиро дэсто́, дэсто́ крали́тко,

⁶ саво́ холя́са замарэлас народы, холя́са исыс баро́ Рай дрэ кхэри́тка ро́ды, и традэлас лэн.

⁷ Сари́ пхув откхинёла, яця́ штыл, годлэла бахтятыр.

⁸ Кипарисы радынэ́напэ пал ту́тэ и кедры Ливаноскирэ; ёнэ ракирэ́на: “Ко́ли ту засутян, нико́н на явэ́лас тэ чингирэл амэн.”

⁹ Лю́но (адо), саво́ исын тэла́л, ґаздыя́пэ ваш ту́кэ, соб (кай) ёнэ тэ дыкхэ́с тут, ке́ли ту заджаса; джангадя ваш ту́кэ Рефаимэн, сарэ́н пхувитконэн ран, ґаздыя́ сарэ́н Наюдытконэ́-нацыенгирэ кралье́н тхагаритконэ штэтэ́ндыр.

¹⁰ Сарэ́ лэ́на тэ ракирэ́н ту́кэ: “Ту яця́н бизорья́киро, сыр амэ, ту зджаса пэ амэ́ндэ!

¹¹ Дро лю́но (адо) исын чхурдыно́ тыро́ пхутькирибэ́н сарэ́ тырэ́ шумоса, тэлэ́ ту́тэ пашто́ исын кирмо, кирмэ тут учхакирэна.

¹² Сыр пыян ту болыбна́стыр, дывэсы́тко чэргэн, чхаво́ зорьякиро! Розмардянпэ пир пхув, кон пэ народы ґаздэласпэ.

¹³ А пхэнэсас ту дро пэ́скиро ило́: “Ѓаздавапэ пэ болыбэ́н, вучэды́р, сыр чэргэня́ Дэвлытка, мэ ґазда́ва миро тхагаритко штэ́то (троно), бэшава пэ бэ́рга машки́р пэ́скирэ дэвлэндэ, одо́й, кай кончынэлапэ паш-дывэ́с (северо).

¹⁴ Ѓаздавапэ мэ пэ болыбнытко вучипэ́н, ява́ва мэ тэ зджав (подджав) пэ Сарэвучэдырэскирэ Дэвлэ́стэ.”

¹⁵ Нэ ту сан чхурдыно́ дро лю́но (адо), дро лэ́скиро хорипэ́н.

¹⁶ Кон тут дыкхця́, роздыкхэна тут, думинэ́на пал ту́тэ: “Ци кодова́ исын ёв, кон тринскирэлас пхув, конэ́стыр кралипэна́ издранас?

¹⁷ Кон кэрдя́ далэ́ барэ́ свэто́стыр чхучи́ пхув, кон пхагирэлас фо́рья, кон ухтылэлас манушэ́н дро пле́но и кхэрэ́ на мэкэлас?”

¹⁸ Сарэ́ кра́лья манушэ́нгирэ, сарэ́ исын паштэ́ патыва́са, кажно дрэ пэ́скири копли́ца [дро пэ́скиро кхэр-ю.о.].

¹⁹ А ту сан чхурдыно́ коплицатыр (гробницатыр), сыр налачхи рандь, сыр урибэ́н кодолэнгиро, конэ́с замардэ́, замардэ́ куртала́са, конэ́с гарадэ́ дрэ пхув, ту сан сыр вычхурдыно тру́по.

²⁰ Нэ ту явэ́са кхэтанэ́ лэ́нца дрэ маґила (кула), пал-дова́ со ту обчордян пэ́скири пхув, замардян тыро́ народо, николи на пририпирэлапэ лачхипна́са чорэнгиро ро́до.

²¹ Скэдэ́н лэ́скирэ чхавэ́н пэ мэрибэ́н, пал лэ́нгирэ дадэ́нгиро грэ́хо, соб (кай) ёнэ тэ на ґаздэ́нпэ, тэ на залэн пхув, тэ на биянэн вэргэ́н (врогэн) пэ свэ́то.

Сыр Пэрэ́на Вавило́но и Асирия

²² “Ѓаздавапэ Мэ пэ лэ́ндэ, – пхэнэ́ла Рай Дэвэ́л, болыбна́скирэ-янголэ́нгиро, – Мэ хасякира́ва, Вавилоно́скиро лав, и саро́ ячаибэ́н, и чхавэ́с и лэ́скирэ ўнукос,” – ракирэ́ла Рай Дэвэ́л.

²³ “Мэ кэра́ва адя́кэ, соб (кай) тэ явэ́н дой сапа и бла́та, и Мэ вышулавава лэс хасибнытконэ веникаса (шуладяса)”, – ракирэ́ла Рай Дэвэ́л, болыбна́скиро-янголэ́нгиро.

²⁴ Совлахала Рай Дэвэ́л, болыбна́скирэ-янголэ́нгиро: “Сыр Мэ подуминдём, адя́кэ явэ́ла, сыр Мэ пхэндём, адя́кэ кэрэ́лапэ.

²⁵ Соб (кай) Мэ тэ розмарав Асуро пэ Мири́ пхув, тэ ростасавав лэс пэ Мирэ́ бэ́рги; и пэрла лэ́ндыр лэ́скиро ґа́мо, злэлапэ пхарипэ́н лэ́нгирэ псикэндыр.”

²⁶ Дасаво исын припхэныбэ́н пал сари́ пхув, акэ, исын васт, протырдыно кэ сарэ́ народы.

²⁷ Палдова́, со Рай Дэвэ́л, болыбна́скирэ-янголэ́нгиро припхэндя́, и кон сашты́ (могинэ́ла) тэ отпарувэл дава́? Лэ́скиро васт исын протырдыно, тэ кон лэс отрискирэла.”

Сыр Пэрэ́ла Филистиякири Пхув

²⁸ Дро дова́ бэрш, ке́ли мыя́ кра́ли Аха́зо, сыс дасаво лав пророкостыр:

²⁹ “На ра́дынпэ Филистиякири пхув, со пхадёла дэсто́, саво́ тут марэлас, пал-дова́ со сапитконэ родо́стыр выджа́ла сап, а далэ́ сапэстыр – сап, саво́ явэ́ла тэ вурнял.

³⁰ Тэ́ньци чорорэ́ явэ́на чалэ, кон мангэлас ловэ́ – куч задживэна, а тыро́ ро́до Мэ хасякира́ва бокхаса, бокх домарэла тыро́ ячаибэ́н.

³¹ Ров, по́рта (вра́ты)! Го́дла дэ, фо́ро! Роспэрэсапэ ту, сари́ пхув Филистимиякири, пал-дова́ со тхув джа́ла паш-ратитконэ́ (шылалэ) рига́тыр (северостыр), нико́н на ячэ́лапэ пэ лэ́нгирэ скэдыибэна.

³² Со ж пхэнэ́на одолэ́, савэ́ янэ́на нэвипэна́ ваш народоскэ? – Дова́, со Рай Дэвэ́л кэрдя́ Сио́но зоралэса, одо́й зракхэнапэ чорорэ́ Лэ́скирэ народо́стыр.”