Isajos 13 - Библия - Пэ Балтитко Романи чиб (Романэс) 2019

Со Явэ́ла дро Вавило́но

¹ Ангилпхэныбэ́н пал Вавило́но, саво́ пхэндя́ Исаё, Амососкиро чхаво́.

² Ѓаздэн сцяго (прикхарибэн) пэ откэрды бэ́рга, годлэн, сыкавэ́н лэ́нгэ вастэ́са, соб (кай) ёнэ тэ джа́н дрэ рангири по́рта (вра́ты).

³ Мэ дыём припхэныбэ́н кодолэ́нгэ, конэ́с выкэдыём, прикхардём, соб (кай) тэ выкэрэлпэ (тэ сполнинэ́лпэ) Мири́ холы́ Мирэ́ зоралэнгири, савэ́ радынэ́напэ Мирэ́ барипнастыр.

⁴ Баро́ шумо исын пэ бэ́рги, сы́рбы бутэ́ народо́стыр; шумо, саво́ ґаздынэ́ кралипэна́ и народо, скэдыно́ кхэтанэ́: Рай Дэвэ́л, болыбна́скирэ-янголэ́нгиро, обдыкхэла халадэ́нгиро строё.

⁵ Ёнэ джа́на дуратунэ́ рига́тыр, болыбна́скирэ ягоро́стыр (краёстыр) Рай Дэвэ́л и струме́нты Лэ́скирэ холя́тыр, соб (кай) тэ хасякирэ́н сари́ пхув.

⁶ Ровэ́н, джа́ла Ра́скирэ-Дэвлэ́скиро дывэ́с, джа́ла, сыр зор, сави́ пхагирэ́ла саро́, Сарэзорьякирэстыр.

⁷ Палдава́ васта́ сарэ́ндэ обмэкнэпэ и замыя́ ило́ кажнонэ́ манушэ́стэ.

⁸ Пиридарандынэ, занасвалынэ дара́тыр, мэнчинэнапэ, сыр джувлы́, ко́ли ёй биянэ́ла; ничи́ на ґалёна, дыкхэ́на екх пэ екхэ́стэ, муя́ лэ́нгирэ хачона.

⁹ Акэ, явэ́ла Ра́скирэ-Дэвлэ́скиро дывэ́с, захало, барэ́ хачкирдэ́ холямипнаса, соб (кай) тэ кэрэ́л пхувья́тыр чхучи́ пхув, тэ хасякирэ́л пэ ла́тэ ла́кирэ грэхитконэ́ манушэ́н.

¹⁰ Болыбна́скирэ чэргэня́ буты́р на хачона, кхам мурдия, ко́ли газдэлапэ, чхон на сыкавэ́ла пэ́скиро дуд (свэ́то).

¹¹ Мэ отхава (отда́ва) палэ свэтоскэ пал налачхэ́ рэ́нды, а грэхитконэ́ манушэ́нгэ – пал лэ́нгирэ грэ́хи; Мэ хасякира́ва пхутькирибэ́н кодолэнгиро, кон древа́н задэлапэ, Мэ хасякира́ва пхутькирибэ́н кодолэнгиро, кон притасавэла чорорэн.

¹² Мэ кэра́ва адя́кэ, со мануша́ явэ́на кучэдыр (дрогэдыр), сыр исын мол жужо́ сувнака́й, и мурша́ – кучэдыр Офироскирэ сувнака́стыр.

¹³ Ваш дава́ Мэ чилавава болыбэ́н, и пхув зджа́ла пэ́скирэ штэто́стыр, ко́ли холясо́ла Рай Дэвэ́л, болыбна́скирэ-янголэ́нгиро, дро дывэ́с, ко́ли захачола Лэ́скири холы́.

¹⁴ Тэ́ньци кажно, сыр затрадыны серна, сыр чхурдынэ́ бакря́, рисёла кэ пэ́скиро народо и кажно прастала пэ пэ́скири пхув.

¹⁵ Нэ кон попэрэлапэ, одолэ́с замарэна, конэ́с ухтылэна, одова́ пэрла куртала́тыр.

¹⁶ Лэ́нгирэ чхаворэ́ явэ́на розмардэ анги́л лэ́нгирэ якха́, лэ́нгирэ кхэра́ явэ́на розчордэ, лэ́нгирэ ромня́ явэ́на ладжакирдэ́.

¹⁷ Акэ, Мэ ґазда́ва пэ лэ́ндэ Мидянэн, конэ́скэ на трэй руп, и кон исын на скэмпо (кон наґалко кэ сувнака́й).

¹⁸ Лэ́нгирэ луки домарэна тэрнэн, на потангинэна (на пожалинэна) биятэ́н, лэ́нгири якх на потангинэла чхаворэ́н.

¹⁹ Вавило́но, шукарипэ́н пир саро́ кралипэ́н, Халдеёскиро пхутькирибэ́н, Дэвэ́л хасякирэ́ла сыр Содо́мо и Гомо́ра.

²⁰ Нико́н одо́й на явэ́ла тэ дживэ́л, на явэ́на тэ дживэ́н мануша́ одо́й николи; на чхувэ́ла Аравитянино пэ́скири ша́тра, чхупна́рья бакрэнца на явэ́на одо́й тэ откхинён.

²¹ Нэ явэ́на тэ дживэ́н одо́й рискирибна́скирэ мурдала́ (звери) чхучэ́ пхувья́тыр; кхэра́ явэ́на пхэрдэ́ чирикленца; чирикля́ и мурдала́ явэ́на тэ ухтэн одо́й.

²² Шакалы явэ́на тэ выинэн дрэ лэ́нгирэ тхагаритка коморы, гиены забэшэна дрэ кхэра́, кай ґарэдыр радынэнаспэ.