Isajos 12 - Библия - Пэ Балтитко Романи чиб (Романэс) 2019

Шарибэ́н Дэвлэ́скэ Пал Зракхибэ́н

¹ И пхэнэ́са дрэ дова́ дывэ́с: “Барьякирава мэ Тут, Раё Дэ́вла; Ту холясоса пэ ма́ндэ, нэ пирияця́ Тыри́ холы́, Ту потангиндян ман.

² Акэ, Дэвэ́л исын Миро зракхибэ́н; допатяв Лэ́скэ и на дарав, пал-дова́, со Рай Дэвэ́л исын зор мири́, багаибэн миро – Рай Дэвэ́л; Ёв сыс Миро зракхибэ́н.”

³ Дрэ тумари́ ра́дыма явэ́на тэ лэн пани́, кай ганынг дэ́ла зракхибэ́н.

⁴ И пхэнэ́на тумэ́ дро дова́ дывэ́с: “Барьякирэ́н Рас-Дэвлэ́с, прикхарэн Лэ́скиро лав, роспхэнэ́н дрэ народы пал Лэ́скирэ рэ́нды (де́лы); рипирэ́н, со баро́ исын Лэ́скиро лав.

⁵ Бага́н Ра́скэ-Дэвлэ́скэ, Ёв кэрдя́ баро́, тэ джинэ́н дава́ пир сари́ пхув.

⁶ Яв лошалы (весёло), ра́дынпэ, манушны Сионо́стыр, пал-дова́ со баро́ исын машки́р ту́тэ Свэ́нто Израилёскиро.”