Isajos 11 - Библия - Пэ Балтитко Романи чиб (Романэс) 2019

Отбарипэн Есеёскиро

¹ И выбарьёла отбарипэн Есеёскирэ корнёстыр (рукхэстыр); кадава́ рукх выбарьякирэла нэви́ рандь.

² Явэ́ла чхудо пэ лэ́стэ Ра́скирэ-Дэвлэ́скиро Ду́хо (Фа́но), ду́хо, саво́ дэ́ла Дэвлэ́скири годы́ и годыпэ́н пхувитко; саво́ дэ́ла подпхэныбэн и зор, ду́хо пир джиныбэ́н и пир свэ́нто джиибэ́н.

³ Ра́скирэ-Дэвлэ́скирэ дара́са пхэрдёла Ёв, и явэ́ла Ёв тэ сэндякирэ́л на адя́кэ, сыр дыкхэ́на Лэ́скирэ якха́, на адя́кэ, сыр шунэ́на Лэ́скирэ кана́.

⁴ Ёв явэ́ла тэ сэндякиринэл чорорэн чачипна́са; кодолэнгирэ, кон страдынэла пэ пхув, рэ́нды чачипна́са россэндякирэла; Ёв Пэ́скирэ вуштэнгирэ дэстэса марэла пхув, Пэ́скирэ вуштэнгирэ духо́са замарэла грэхитконэ́ манушэ́с.

⁵ И обпхандэлапэ Ёв чачипна́са пир трушула (чреслы), чачипэ́н явэ́ла Лэ́скиро обпхандыпэн упрэ́ пир ґэра́.

⁶ Тэ́ньци рув явэ́ла тэ дживэ́л кхэтанэ́ бакрорэса, рич явэ́ла пашто́ кхэтанэ́ бузнорэса; гуруворо, тэрно́ шчэр (ле́во) и рув кхэтанэ́ явэ́на; тыкно́ бия́то явэ́ла лэн тэ лыджа́л.

⁷ Гурумны явэ́ла тэ чаравэлпэ ричихаса, чхаворэ́ лэ́нгирэ явэ́на паштэ́ кхэтанэ́; шчэр (ле́во) явэ́ла тэ хал пхус, сы́рбы гурув.

⁸ Бия́то явэ́ла тэ кхэлэл (тэ броинэл) пашы́л сапэскири нора, ёв протырдэла пэ́скиро васт кэ саплынякири гня́зда (ку́фо).

⁹ На явэ́на тэ кэрэ́н холы́ ци дош пэ Мири́ свэ́нто бэ́рга, пал-дова́ со пхув пхэрдёла Дэвлэ́скирэ джиныбнаса, сыр мо́рё (дэрья́в) пхэрдёл пане́са.

Месия и Израилёскиро Ячаибэ́н

¹⁰ И явэ́ла дро дова́ дывэ́с: кэ корнё (рукх) Исеёскиро, саво́ ячэ́ла сыр сцяго тэ прикхарэл народы, обрисёна Наюды́тка на́цыи, и барипнаса явэ́ла лэ́скиро откхиныбэн.

¹¹ Явэ́ла дро дова́ дывэ́с адя́кэ: ишчо (инкэ́) протырдэла Рай Дэвэ́л Пэ́скиро васт, соб (кай) тэ рискирэ́л ячаибэ́н Пэ́скирэ народо́стыр, саво́ ячэ́лапэ кэ Асуро, дро Еги́пто, кэ Патросо, кэ Хусо, кэ Еламо, кэ Сенааро, кэ Емафо, пэ островы, савэ́ исын пир мо́рё (дэрья́в).

¹² И кхарэ́ла кэ Пэ Наюды́тка на́цыи и скэдэ́ла Ёв вытрадынэ́ манушэ́н Израилёстыр, и росчхурдынэ Юдэ́н скхарэла штарэ́ ягорэндыр пэ пхув.

¹³ Ефре́мо пириячэ́ла тэ дэл якхало (тэ завидынэл), сарэ́, кон ґаздыя́пэ пэ Юдастэ, явэ́на хаськирдэ; Ефре́мо на явэ́ла тэ дэл якхало Юда́скэ, Юда на газдэлапэ прэ Ефремостэ.

¹⁴ Приурняна пэ Филистимлянэнгирэ псикэ́ кэ западо (кэ пал-панитко риг); обчорэна сарэ́н чхавэ́н вастоко́стыр, протырдэна пэ́скиро васт кэ Едомо кэ Моа́во; Амоноскирэ чхаворэ́ явэ́на лэ́нгирэ бутярнэнца.

¹⁵ И вышутькирла Рай Дэвэ́л рэка (лэнь), со исын пашы́л мо́рё (дэрья́в) Египто́скиро, протырдэла Ёв Пэ́скиро васт кэ рэка (лэнь) дрэ зоралы́ балва́л, розмарла ла пэ эфта́ яви́р рэкицы, адя́кэ, со дрэ тривики явэ́на ла тэ пириджан.

¹⁶ Тэ́ньци ваш ячаибэ́н Лэ́скирэ народо́стыр явэ́ла баро́ дром, сыр дава́ сыс ваш Израилё, ко́ли ёв выджа́лас Египто́скирэ пхувья́тыр.