Isajos 1 - Библия - Пэ Балтитко Романи чиб (Романэс) 2019

¹ Акэ, исын Исаёскиро, Амосо́скирэ-чхавэ́скиро дыкхибэ́н, саво́ ёв дыкхэ́лас пал Юдэ́я и Ерусалимо, дрэ долэ́ дывэса́, ке́ли Ози́я, Иофа́мо, Аха́зо и Езэки́я сыс Юдэя́кирэ кра́лья.

Дэвэ́л Пхэнэ́ла Пэ́скирэ Народоскэ (Манушэ́нгэ)

² Шунэ́н, болыбэна, пошун, пхув, пал-дова́ со пхэнэ́ла Рай Дэвэ́л: “Мэ барьякирдём, ґаздыём чхавэ́н, а ёнэ ґаздынэ́пэ пэ Ма́ндэ.

³ Гуру́в джинэ́ла пэ́скирэ хула́с, а о́сло (мега́ри) – пэ́скирэ-ра́скири шта́ла, нэ Израилё на джинэ́ла Ман, на ґалёла Миро народо.”

⁴ Ай, грэхи́тка мануша́лэ, народо, саво́ исын пхэрдо́ пэ́скирэ грэхэ́нца, на́лачхо ро́до, хасибны́тка чхавэ́! Тумэ́ ячкирдэ́ Рас-Дэвлэ́с, чхурдынэ́ свэнтонэ́ Израилёскирэ Дэвлэ́с, рисинэ́ палэ.

⁵ Сыр ишчо (инкэ́) тэ мара́в тумэн, ко́ли тумэ́ усае́кх на кандэ́на? Саро́ шэро́ исын насвало́, саро́ ило́ замыя́.

⁶ Ѓэрэ́ндыр кэ шэро́ нанэ лэ́стэ састо́ штэ́то: фуя́ (язвы), шувлыпэна́, чыльча́ки (нары́вы) исын на жужакирдэ́, на обпхандлэ́, на ковлякирдэ́ елеёса.

⁷ Тумари́ пхув исын чхучи́ (пусто), тумарэ́ фо́рья исын схачкирдэ́ яга́са; тумарэ́ фэ́лды ха́на чу́жа мануша́ анги́л тумарэ́ якха́; саро́ исын чхучо́ сыр тэ́ньчи, ко́ли чу́жа мануша́ росчорэ́нас.

⁸ И яця́пэ Сионо́скири чхай, сыр ша́тра дрэ виноградо́скири у́нта (садо), сыр шала́шо дрэ бар (огородо), сыр фо́ро, пэ саво́ ґаздынэ́пэ (заухтылдэ) вэ́рги.

⁹ Ко́ли б на ячкирдя́ Рай Дэвэ́л, болыбна́скирэ-янголэ́нгиро, амэ́нгэ набаро́ ячаибэ́н, то са́мас бы амэ, сыр Содо́мо, амэ зджа́сас (поджа́сас) бы пэ Гомо́ра.

¹⁰ Тхага́рья (кня́зи) Содомо́скирэ! Шунэ́н Ра́скирэ-Дэвлэ́скиро лав! Народо Гомора́тыр, причхувэ́н кан кэ амарэ́-Дэвлэ́скиро Зако́но!

¹¹ “Пэ со трэй Ма́нгэ бут тумарэ́ свэ́нта дыибэна́? – ракирэ́ла Рай Дэвэ́л, – Мэ чалыём бакрэ́нгирэ хачкирибнаса, чалыём тхулыпнастыр, Мэ на кама́м буты́р гуруворэнгиро, бакрорэнгиро и бузнэнгиро рат.

¹² Ке́ли тумэ́ явэ́на тэ сыкавэнпэ анги́л Ма́ндэ, кон мангэ́ла тумэн, соб (кай) тумэ́ тэ штавэн (тэ топчынэн) ґэрэ́нца Мирэ́ грэды (дворы)?

¹³ На янэ́н буты́р да́ры, – дава́ исын ивья́ (напра́снэс), – тумарэ́ кадилакирэ тхува исын джунгалэ́ (брыдка) Ма́нгэ; нэвэ чхона́ и са́ваты (суботы), свэнкитко скэдыибэ́н Мэ нашты́ (на могина́ва) тэ вырикирав: чорипэ́н и свэ́нко!

¹⁴ На прилэ́ла Миро ди тумарэ́ нэвэ чхона́ и упхэндлэ свэ́нки; дава́ исын пхарипэ́н ваш Ма́нгэ, пхарэ́с тэ лыджав лэн.

¹⁵ И ко́ли тумэ́ протырдэна тумарэ́ васта́ тэ мангэ́нпэ, Мэ закэрава тумэ́ндыр Мирэ́ якха́; ко́ли тумэ́ мангэ́напэ, Мэ на шунава: тумарэ́ васта́ исын пхэрдэ́ дро рат.

¹⁶ Выморэнпэ, явэ́н жужэ́; залэн тумарэ́ налачхэ́ рэ́нды Мирэ́ якхэ́ндыр; пириячэн тэ кэрэ́н чорипэ́н.

¹⁷ Высыклён тэ кэрэ́н лачхипэ́н, родэ́н чачипэ́н, зракхэн чорорэс, уштэ́н (затэрдён) пал бидадэскирэстэ / пиротостэ (сиротастэ), подрикирэн пивля (удова).

¹⁸ “Тэ́ньци явэ́н, ява́са тэ сэндякирас (тэ роскэдаспэ),” – ракирэ́ла Рай Дэвэ́л. “Ко́ли явэ́на тумарэ́ грэ́хи лолэ́, сыр рат, ячэ́на парнэ́, сыр ив, ко́ли явэ́на лолэ́, сыр яг ячэ́на парнэ́, сыр вы́лна (шэрсь) Мэ парнякирава.

¹⁹ Ко́ли тумэ́ закамэна и явэ́на тэ кандэ́н, то тумэ́ явэ́на тэ хан лачхипэ́н пхувья́киро.

²⁰ Нэ ко́ли тумэ́ отпхэнэнапэ, и явэ́на нарта (упорна), то курта́ла похала тумэн,” пал-дова́ со ушта́ Ра́скирэ-Дэвлэ́скирэ пхэнэ́на адя́кэ.

Грэхи́тко Фо́ро

²¹ Сыр биладжакунэс парудяпэ чачипна́скиро шэрутно фо́ро, саво́ сыс пхэрдо́ чачунэ́ сэндоса! Чачипэ́н дживэлас дрэ лэ́стэ, а акана́ дживэ́на замарибнарья (розмарибнарья).

²² Руп тыро́ яця́ блатаса, тыри́ мол (вино) исын кхэтанэ́ пане́са.

²³ Тхага́рья (кня́зи) тырэ́ на кэрэ́на пир чачипэ́н, лэ́нгирэ дру́ги (мала́) исын чора. Сарэ́ ёнэ камэ́на мыто, праста́на пал ловэ́. Ёнэ на уштэна (затэрдёна) пал пиротэндэ (сиротэндэ) и пивлякиро (удовакиро) рэ́ндо на доджа́ла кэ ёнэ.

²⁴ Палдава́ адя́кэ пхэнэ́ла Рай Дэвэ́л, болыбна́скирэ-янголэ́нгиро, Зорало́ Израилёскиро: “О, ґазда́ва Мэ Пэс пэ одолэ́ндэ, кон нанэ Ма́нца, Мэ сыкава́ва Мирэ́ вэргэ́нгэ!

²⁵ И Мэ протырдава кэ ту Миро васт, Мэ жужакирава тут шлакостыр, злава ту́тыр сари́ бла́та.

²⁶ И ява́ва тэ дав сэндарьен ту́кэ, сыр англэды́р и юнкарэн/годы́-дыибнаскирэн (советникэн), сыр сыс англэды́р; тэ́ньчи явэ́на тэ ракирэ́н пал ту́тэ: Фо́ро, кай исын чачипэ́н; дава́ баро́ фо́ро исын патяибны́тко.”

²⁷ Зракхэ́лапэ Сио́но чачунэ́ сэндоса, а чхавэ́ лэ́скирэ, савэ́ явнэ́ кэ Дэвэ́л, чачипна́са.

²⁸ А сарэ́нгэ, кон гия́ криг Ра́стыр-Дэвлэ́стыр, кон исын грэхи́тко-хасибэ́н; одолэ́, кон ячкирдя́ Рас-Дэвлэ́с – хасёна.

²⁹ “Ёнэ явэ́на ладжакирдэ́ пал дэмбитка вэша́, савэ́ адя́кэ тумэ́нгэ исын пир ило́, и тумэ́ лолёна пал унты (сады), савэ́ тумэ́ выкэдынэ́ пэ́скэ.

³⁰ И явэ́на тумэ́, сыр дэмбо, ко́ли спынэ тэлэ́ лэ́стыр патря (листы), сыр у́нта (садо), кай нанэ пани́.

³¹ Зорало́ явэ́ла сыр шмата, и лэ́скиро рэ́ндо сыр яг; явэ́на тэ хачон кхэтанэ́ и нико́н на мурдякирла.”