Ióvo 9 - Библия - Пэ Балтитко Романи чиб (Романэс) 2019

Ио́во Отпхэнэ́ла

¹ Тэ́ньци Ио́во отпхэндя́ лавэ́нца:

² “Мэ джино́м (джина́в), со дава́ исын чачипэ́н; нэ сыр о ману́ш сашты́ тэ явэ́л чачуно́ анги́л Дэвлэ́стэ?

³ Ко́ли ёв выкэдэ́ла тэ чингирэлпэ лавэ́нца Дэвлэ́са, ёв нашты́ тэ отпхэнэл аж ни пэ екх Лэ́скирэ тысёнцы пхучибэна.

⁴ Дэвэ́л исын годо́ илэ́са и зоралыпнаса: кон тэрдёлас дрэ стонка маму́й Лэ́стэ, ци кодова́ ячэ́лапэ дро рама́нё (покоё)?

⁵ Кон пиричхувэла бэ́рги, со нико́н на джинэ́ла дава́, ке́ли Ёв лэн равэла тэлэ́ дрэ холы́.

⁶ Кон тринскирэла пхув ла́кирэ штэто́стыр, и ла́кирэ сты́лбы издрана;

⁷ Кон припхэнэла кхамэскэ, и кхам на уштэ́ла, и Ёв чхувэ́ла чэргэня́ пэ якхи́тко чэргэнори́ (печать).

⁸ Дэвэ́л Кокоро́ чхудя́ болыбэ́н, и Ёв штавэла пир вучэ́-морёскирэ (дэрьявэ́скирэ) валны:

⁹ Ёв создыя́ пэ болыбэ́н Асос, Кесилёс и Химос и пашы́л-дывэсытка чэргэня́.

¹⁰ Кон кэрэ́ла древа́н барэ́ рэ́нды, со ние́кх на ґалёла, и ди́вы, со нашты́ тэ погинэн.

¹¹ Акэ, Ёв проджа́ла пашы́л ма́ндэ, и мэ на дыкха́ва Лэс, и Ёв джа́ла пашы́л дурэды́р, и мэ нашты́ тэ роздыкхав Лэс.

¹² Ѓа́да, Ёв лэ́ла криг и кон могинэ́ла (сашты́) тэ мешынэл Лэ́скэ? Кон пхэнэ́ла Лэ́скэ: “Со Ту кэрэ́са?”

¹³ Дэвэ́л на лэ́ла кри Пэ́скири холы́; Шуахостыр помогибнаскирэ бандёна тэл Лэ́стэ:

¹⁴ пэ кицы́ тэды мэ сом тыкнэды́р, соб (кай) ма́нгэ тэ отпхэнав Лэ́скэ, тэ выкэдав лава́ тэ чингиравпэ лавэ́нца Лэ́са?

¹⁵ Мэк мэ и со́мас чачипна́скиро, мэ на могиндёмас тэ отпхэнав Лэ́скэ, нэ мэ фэ́ни (то́ка) помангавас мирэ́ Сэндарис тэ тангинэ́л ман.

¹⁶ Ко́ли мэ кхаравас бы, и Ёв отпхэнэ́лас бы ма́нгэ, мэ на патяндыём, со Ёв шундя́ мири́ зан, –

¹⁷ Ёв-Кон лучкирэлас (лутькирэлас) ман сы́рбы зоралы́ балва́л, и дукхавэлас ман буты́р и буты́р би причынакиро.

¹⁸ Ёв на домэкэла, соб (кай) мэ тэ выдыхинав, нэ Ёв дэ́ла чалэ́с киркипэн ма́нгэ.

¹⁹ Тэ явэ́л дава́ рэ́ндо пал зор, дыкхэ́н, саво́ Ёв исын зоралыпнаскиро; а тэ явэ́л дава́ рэ́ндо пал чачипэ́н, кон сашты́ тэ дэл миро дывэ́с тэ сэндинавпэ Лэ́са?

²⁰ Мэк и тэ явэ́л чачипэ́н пал ма́ндэ, Ёв зоралэ́с сэндякирэлас ман мирэ́ лавэ́нца; мэк мэ и тэ явав бибангипнаскиро, Ёв допхэнэ́ла, со мэ сом начачуно.

²¹ Мэ на сом банго́, мэ на кама́м тэ джина́в кокоро́ пэс, а миро джиибэ́н яця́ джунгало́ (брыдиндя) ма́нгэ.

²² Сарэнца исын екх; палдава́ мэ пхэндём: Ёв хасякирэ́ла сыр бидошэнгирэс, адя́кэ-паць и фуе́ манушэ́с.

²³ Ко́ли чхупны мулякирэ́ла екха́тыр (внезапнэс), Ёв салапэ бибангипнаскирэндыр, савэ́ пиридживэна кэ мэ́ньки.

²⁴ Пхув исын дыны́ дрэ бибахталэ́-манушэ́нгирэ васта́; Ёв учхакирдя́ сэндарье́нгирэ муя́. Ко́ли дава́ нанэ Ёв, то кон ишчо (инкэ́) дава́ сашты́ тэ кэрэ́л?

²⁵ Мирэ́ дывэса́ праста́на сыгэды́р прастаибнаскирэстыр: ёнэ нашэ́на криг, ёнэ на дыкхэ́на лачхипэ́н.

²⁶ Дывэса́ проджа́на сыр сыгна тришчынитка па́рмы (корабли), сы́рбы о́рло (ки́до), саво́ чхурдэлапэ наужакирдэс пэ чордо дорэсыбэ́н.

²⁷ Ко́ли мэ пхэна́ва: “Мэ бистрава пал миро калыпэ́н, со мэ жалиндёмпэ, мэ парувава пэ́скиро рондло муй и мэ подрикирава пэс сабнаса:

²⁸ мэ издрава сарэ́ мирэ́ мэнькэндыр, мэ джино́м, со Ту на приджинэса ман, со Мэ сом бибангипнаскиро.

²⁹ Ко́ли мэ тэ явав дасаво бибахтало́, со́скэ тэды мэ кэра́ва пхари́ буты́ ивья́?

³⁰ Ко́ли мэ выморавапэ ивунэ пане́са, и тэ кэра́в мирэ́ васта́, со енэ ние́кхвар на сыс;

³¹ нэ Ту и тэды тасадякирэса ман андрэ́ бла́та и мирэ́ и́ди явэ́на сы́рбы тэ дурьён ма́ндыр.”

³² “Пал-дова́ со Дэвэ́л исын на ману́ш, сыр мэ сом, соб (кай) ма́нгэ тэ отпхэнав Лэ́скэ, и соб (кай) амэ́нгэ тэ джас кхэтанэ́ Лэ́са пэ сэ́ндо.

³³ Нанэ машкиратуно-ману́ш машки́р амэ́ндэ, кон могинэлас бы тэ чхувэ́л лэ́скиро васт пэ амэ́ндэ.

³⁴ Мэк Дэвэ́л тэ лэл криг Пэ́скири ран ма́ндыр, и мэк тэ явэ́л, соб (кай) Лэ́скиро трашаибэ́н тэ на даракирэл ман.

³⁵ Тэ́ньци мэ ява́ва тэ ракира́в, и мэ на ява́ва тэ дарав Лэ́стыр, нэ мэ на сом дасаво, со тумэ́ думинэ́на.”