Ióvo 8 - Библия - Пэ Балтитко Романи чиб (Романэс) 2019

Вилдадо Ракирэ́ла

¹ И отпхэндя́ Вилдадо Шуахостыр и пхэндя́:

² “Сыр ґара́ ту явэ́са тэ ракирэ́с адя́кэ? И тырэ́ лава́, со ту ракирэ́са, исын сы́рбы зоралы́ балва́л?

³ Ци Дэвэ́л пиририскирэла сэ́ндо, ци Сарэзорья́киро Дэвэ́л пиририскирэла чачипэ́н?

⁴ Ко́ли тырэ́ чхавэ́ кэрдэ́ грэ́хи проти Лэ́стэ, тэды Ёв и сэндякирдя лэн пал лэ́нгиро чорипэ́н.

⁵ Ко́ли ту явэ́са тэ родэс хачкирдэс Дэвлэ́с, и тэ чхувэ́с пэ́скирэ мангипэна анги́л Сарэзорьякирэстэ;

⁶ ко́ли ту сан бибангякиро и дэвлы́тко, тэды, чачо́, Ёв уштэ́ла пал ту́тэ, и Ёв кэрэ́ла адя́кэ, соб (кай) тэ явэ́л миштыпэ́н тырэ́ кхэрэ́скэ.

⁷ Мэк вагэдыр (англэды́р) ту́тэ сыс на́бут (куты́), нэ дро яго́ро (дро ко́нцо) ту́тэ явэ́ла древа́н бут.

⁸ Палдова́ пхучпэ, мэ манга́ва тут, пал ро́ды, со сыс вагэдыр и обдумин дова́, со лэ́нгирэ дада́ латхнэ́,

⁹ пал-дова́ со, амэ сам адасавэ́, сы́рбы тася́ бияндыям, и амэ нисо́ на джина́са, и амарэ́ дывэса́ пэ пхув праста́на сыр зэр (тень).

¹⁰ Ци на сыклякирдэ́ прапапы тут, ци на пхэндлэ́ ту́кэ, ци на выпхэндлэ лава́ лэ́нгирэ илэ́стыр?

¹¹ Ци могинэ́ла папирусо тэ барьёл би дричакиро (би болотоскиро)? Ци могинэ́ла сил (камышо) тэ барьёл би панескиро?

¹² Ке́ли дая́ раслина ишчо (инкэ́) зэлэны и наны чингирды, ей вышутёла сыгэды́р кажнонэ́ чарьятыр.

¹³ Адя́кэ-паць и кодолэнгирэ дрома́, кон бистрэл Дэвлэ́с и фуе́-манушэ́нгиро ужакирибэ́н пэ лачхипэ́н, адя́кэ-паць хасёла,

¹⁴ лэ́нгиро зорало́ патяибэ́н хасёла, и дова́ пэ со ёв розгинэла, исын сыр мизгирёскири (паукоскири) тхава (плева).

¹⁵ Ёв подрикирэ́ла пэс пал пэ́скиро кхэр, кхэр на тэрдёла, ёв ухтылэлапэ пал лэ́стэ, нэ кхэр на вырикирэ́ла лэс.

¹⁶ Кадасаво́ ману́ш барьёла сы́рбы дылыны чар тэл кхам, и ла́кирэ рандя́ пирибарьёна бар;

¹⁷ ла́кирэ ко́рни (рукха́) кхувэнапэ трусця́л барэнгири бэ́ргица, ёнэ промарэна штэ́то машки́р бара́.

¹⁸ Нэ ко́ли Дэвэ́л выкошэла лэн лэ́нгирэ штэто́стыр, тэды пэ дова́ штэ́то отпхэнэнапэ лэ́ндыр, пхэни́: “Мэ на дыкхцём тумэн!””

¹⁹ Акэ, сави́ исын ра́дыма кадалэ́ фуе́-манушэ́нгири далэ́ джиибнастыр, и прахостыр яви́р барьёна.

²⁰ Акэ, Дэвэ́л на отчхурдэла Пэ́стыр бидошэнгирэ манушэ́с, сыр Ёв и на подрикирэ́ла пало́ васт одолэ́с, кон кэрэ́ла биба́хт.

²¹ Ишчо Ёв пхэрдякирэла тыро́ муй сабнаса, и тырэ́ ушта́ барэ́ радыма́са,

²² Ёв учхакирэ́ла ладжаса тырэ́ вэргэ́н, и ша́тры, кай дживэ́на фуй мануша́, хасёна!”