Ióvo 7 - Библия - Пэ Балтитко Романи чиб (Романэс) 2019

Ио́во Жалинэлапэ Буты́р

¹ Ци манушэ́скиро джиибэ́н нанэ саро́ дрэ пхари́ буты́ пэ дая́ пхув? Ци манушэ́скирэ дывэса́ исын на сы́рбы андынаршчыкоскирэ (поробкоскирэ) дывэса́?

² Сыр писха́ри хачкирдэс выкэдэ́ла зэр (тень), адя́кэ-паць и, андынаршчыко ужакирэ́ла пэ́скири мазу́ри (награда).

³ Адя́кэ-паць и ма́нгэ дынэ́ хартытка (суетна) чхона́ и кхинякирдэ ратя упхэндлэ ма́нгэ.

⁴ Ке́ли мэ пасёвава, тэды мэ пхэна́ва: “Ке́ли да мэ уштава, и рат джа́ла криг? И мэ пиририсёвава сари́ рат анги́л зло́ко (ра́нко).

⁵ Мирэ́ маса́ исын чхакирдэ кирмэнца и прахоса, мири́ цы́па пхарадыя и кирнёла.

⁶ Мирэ́ дывэса́ праста́на сыгэды́р тхачоскирэ ротатыр, и проджа́на адя́кэ, со нанэ со́стыр тэ ужакирав лачхипэ́н.

⁷ Ри́пир, Дэ́вла, со миро джиибэ́н исын балва́л, мирэ́ якха́ буты́р ние́кхвар на дыкхэ́на лачхипэ́н.

⁸ Кодоя якх, кон дыкхця́ ман, на удыкхэ́ла буты́р ман: ке́ли Тырэ́ якха́ рисёна пэ ма́ндэ, ман на явэ́ла буты́р.

⁹ Сыр о́блоко розджалапэ и нашадёла, адя́кэ-паць и дова́, кон джа́ла тэлэ́ дро лю́но (адо), на явэ́ла палэ.

¹⁰ Ёв буты́р на рисёла дро пэ́скиро кхэр, ние́кх лэ́скирэ штэто́стыр буты́р на явэ́ла тэ джинэ́л лэс.

¹¹ Пир дая́ причына мэ на ява́ва тэ пхандав пэ́скиро муй: мэ ява́ва тэ ракира́в мирэ́-духо́скирэ тугатыр; мэ ява́ва тэ жалинавпэ мирэ́ илэ́скирэ киркипнаса.

¹² О, Дэ́вла! Ци мэ сом мо́рё (дэрья́в), ци мэ сом морёскиро (дэрьявэ́скиро) рупучо (чудовишчо), со Ту чхувэ́са стрэ́га пэ ма́ндэ?

¹³ Ке́ли мэ пхэна́ва пэ́скэ: “Миро чхуибэ́н раманякирэла ман, и мири́ пасиндлы (кровать) локхякирэла мири́ жалоба;

¹⁴ то тэды Ту трашакирэса ман сунэнца, и страхакирэса дыкхибнаскирэ зданкэнца;

¹⁵ палдава́ Миро ди выкэдыя́, соб (кай) тэ затасавэн ман; мэрибэ́н явэ́лас фэды́р дасавэ́ джиибнастыр мирэ́ кокалэнгэ.

¹⁶ Ма́нгэ яця́ джунгало́ (брыдиндя) миро джиибэ́н, мэ на ява́ва ўса́ды (сак) тэ джива́в, мэк ман екхджинэс, пал-дова́ со мирэ́ дывэса́ исын чхучэ́ сы́рбы пхурдыпэн.

¹⁷ Со дасаво исын ману́ш, со Ту адя́кэ барьякирэса лэ́скиро штэ́то, со Ту рискирэса ило́ пэ лэ́стэ,

¹⁸ со Ту явэ́са кэ ёв кажно зло́ко (ра́нко), со Ту спробинэса лэс кажно мэнта (минута)?

¹⁹ Со́скэ ґара́ Ту на рискирэса Пэ́скирэ якха́ ма́ндыр, и мэк ман екхджинэс анги́л, сыр мэ накхавава (глытынава) пэ́скирэ саля (слина).

²⁰ Ко́ли мэ кэрдём грэ́хи, тэды со кэрдём мэ ту́кэ, о Манушэ́скиро Стрэгари, со́скэ Ту выкэдыян ман сыр бакрэ́с, адя́кэ со мэ сы́рбы ґа́мо уридём пэ пэ́стэ.

²¹ Со́скэ тэды Ту на отмэкэса миро чорипэ́н, и на лэ́са криг мири́ биба́хт? Пал-дова́ со мэ ява́ва тэ пасёвав дро пра́хо, и Ту зоралэ́с явэ́са тэ родэс ман ранкоса (злокоса), нэ ман буты́р на явэ́ла.”