Ióvo 6 - Библия - Пэ Балтитко Романи чиб (Романэс) 2019

Ио́во Отпхэнэ́ла

¹ И отпхэндя́ Ио́во лавэ́нца:

² “О, тэ чхувэ́н пэ ублады́тка (ве́сы) миро саро́ калыпэ́н, и тэ чхувэ́н сари́ мири́ бари би́да пэ бизьмены?

³ Пал-одова́ со акана́ дая́ би́да явэ́лас пхарэдыр морёскирэ (дэрьявэ́скирэ) прахостыр, палдава́ мирэ́ лава́ исын дасавэ́ сыгна.

⁴ Пал-одова́ со Сарэзорьякирэ–Дэвлэ́скирэ марибны́тка бустя́ (стре́лы) исын андра́л ма́ндэ, мирэ́ маса́ пьена лэ́нгири трута (отрава): трашаибэ́н анги́л Дэвлэ́стэ тэрдия́ дрэ стонка пэ ма́ндэ.

⁵ Ци годлэла бусо (дико) о́сло (мега́ри) пашы́л чар, ци брылинэла гурув паш лэ́скиро хахаибэн (месиво)?

⁶ Ци сашты́ тэ хас би смакоскиро хабэ́н би лондэскиро? Ци исын вари-саво́ смако дро парнорэскиро бялтко?

⁷ Дова́, со миро ди отпхэнэлапэ тэ хал, палдава́ исын миро намишто хабэ́н;

⁸ О, соб (кай) фэ́ни мэ могиндёмас тэ помангав, и соб (кай) Дэвэ́л тэ явэ́л дро екхипэ́н мирэ́ мысляса:

⁹ соб (кай) фэ́ни тэ закамэл Дэвэ́л, соб (кай) Ёв тэ ростасавэл ман, соб (кай) Ёв тэ протырдэл Пэ́скиро васт и тэ хасякирэ́л ман.

¹⁰ Тэды явэ́лас ма́нгэ раманипэн (спокойствиё); и мэ зоралэ́с радынаваспэ аж дрэ мири́ дукх, со на жалинэла ман, со мэ на отпхэндёмпэ Свэнтонэ́ Дэвлэ́скирэ лавэ́ндыр.

¹¹ Кай тэ лав зор ма́нгэ, соб (кай) тэ ужакирав лачхипэ́н? И саво́ исын миро ко́нцо (яго́ро), соб (кай) ма́нгэ ишчо (инкэ́) тэ вырикирав?

¹² Ци исын мири́ зор дасави́, сыр зоралэ́ бара́ исын? Ци исын мирэ́ маса́ дасавэ́, сыр харко́ма (медь)?

¹³ Ци дава́ ра́да мэ кокоро́ пэ́скэ? Ци годыпэ́н ячкирдя́ ман?

¹⁴ Кодолэ́скэ, кон исын замэнчындло, трэй тэ ужакирэл лачхипэ́н малэндыр? Ко́ли ёв фэ́ни (то́ка) тэ на ячкирэл дар анги́л Сарэзорьякирэ Дэвлэ́стэ.

¹⁵ Мирэ́ пша́ла обгинэпэ ма́нца хоханэ́с сы́рбы рэ́кица (лэнори́), сы́рбы рэкицэнгиро тхадыипэн, со лыджа́ла пани́ дурэды́р,

¹⁶ саво́ исын цямло лёдостыр, и дро саво́ ив гарадёла:

¹⁷ ке́ли ёнэ вышуцёна, тэды ёнэ тыкнёна; ке́ли хачкирибэ́н дэ́ла дрэ лэ́ндэ, ёнэ хасёна пэ́скирэ штэтэ́ндыр:

¹⁸ ёнэ бандёна пир бэргакирэ рига́, ёнэ тхадэна пэ чхучи́ пхув и хасёна.

¹⁹ Фэманакирэ караваны дыкхэ́на пэ лэ́ндэ, а лодыипнаскирэ мануша́ Савеятыр (Шэбатыр) розгинэна (рикирэ́на наде́я) пэ лэ́ндэ:

²⁰ ёнэ ладжана пэ́скирэ патяибнастыр; ёнэ явэ́на одо́й, и лэ́ндэ саро́ пирипэнтындяпэ дрэ годы́.

²¹ Адя́кэ-паць и тумэ́ акана́ сан сы́рбы кодолэ́ рэкицы: тумэ́ дыкхэ́на вари-со дарано и тумэ́ акана́ дарэ́на.

²² Ци пхэндём мэ: “Янэ́н вари-со ма́нгэ!” Ци: – “Кэрэ́н да́ро ма́нгэ тумарэ́ барвалыпнастыр!”

²³ Ци: – “Зракхэн ман вэргоскирэ вастэ́стыр!” Ци: – “Выракхэн ман притасаибнаскирэ вастэ́стыр!”

²⁴ Сыклякирэ́н ман и мэ ява́ва тэ рикирав чиб, и кэрэ́н адя́кэ, соб (кай) мэ тэ ґалёвав, дро со мэ дыёмпэ дукха́ (хохадёмпэ).

²⁵ Сави́ зор исын дрэ чачунэ́ лава́! Нэ саво́ ж исын лачхипэ́н, со тумэ́ чингардэнапэ ма́нца?

²⁶ Ци тумэ́ придуминэна, соб (кай) тэ бангякирэн ман дрэ лава́, джинэ́н – балвалитка исын манушэ́скирэ лава́, конэ́скэ исын пхаро́.

²⁷ Дыкхэ́н: тумэ́ чхурдэна жре́бие, соб (кай) сирота (пирото) тэ явэ́л тумаро́ писха́ри, и ганавэна ґанби́н (яма) тумарэ́ малэ́скэ.

²⁸ Акана́, дыкхэ́н пэ ма́ндэ: и анги́л тумарэ́ муя́, соб (кай) мэ тэ хохавав?

²⁹ Рисён, мэ манга́ва тумэн, фуй на явэ́ла; рисён ишчо (инкэ́), соб (кай) тумэ́ тэ дыкхэ́н миро чачипэ́н.

³⁰ Ци исын саво́ начачипэ́н мирэ́ чибатыр? Ци на розґалёвава мэ лачхэ́с, кай исын фуипэ́н?