Ióvo 5 - Библия - Пэ Балтитко Романи чиб (Романэс) 2019

Пэ́рво Чинга́рд Машкир Иовостэ и Лэ́скирэ Малэндэ

¹ Кхар, Ио́во, ко́ли исын одова́ тэ отпхэнэл ту́кэ? И кэ савэ́ свэ́нта, ту рисёса?

² Пал-дова́ со холякирибэ́н хасякирэ́ла дылынэ́ манушэ́с, и зэвлыныпэ́н (зависть) марэла простонэ-годякирэ манушэ́с.

³ Мэ дыкхцём, сыр дылынинько мэкэ́ла ко́рни (рукха́), нэ мэ екха́тыр прокостём (кэрдём арманя) лэ́скиро кхэратуно штэ́то.

⁴ Лэ́скирэ чхавэ́ исын дур, соб (кай) тэ явэ́н бахталэ́, лэн домарэна пашы́л по́рта, и нанэ ние́кх, кон тэ зракхэ́л лэн:

⁵ о бокхало похала лэ́скиро умалото, аж лэ́ла и пхусадытконэ хрустостыр и бокхалэ́ кэ хабэ́н мануша́ розухтылэна саро́, со исын лэ́стэ.

⁶ Пал-дова́ со биба́хт на явэ́ла прахостыр (пхувья́тыр), сыр и пхарипэ́н на джа́ла упрэ́ пхувья́тыр;

⁷ и ману́ш бияндёла ваш мэ́ньки сыр тыкнэ́ ягорья, со вурняна упрэ́.

⁸ Нэ мэ, пэ тыро́ штэ́то, родавас Дэвлэ́с и мэ чхувавас миро рэ́ндо анги́л Дэвлэ́стэ.

⁹ Кон кэрэ́ла древа́н барэ́ рэ́нды, со манушэ́скэ нашты́ тэ ґалёл, и бут ди́вна рэ́нды, со нашты́ тэ погинэс.

¹⁰ Ёв дэ́ла брышы́нд пхувьякэ, и Ёв бичхавэ́ла паня́ пэ фэ́лды,

¹¹ Ёв чхувэ́ла пэ вучэ́ штэ́ты одолэ́н, кон исын тэлякирдэ, Ёв ґаздэ́ла пэ бидаракирэ штэ́ты одолэ́н, савэ́ зоралэ́с тугинэна.

¹² Ёв розмарэла дова́, со фрэнта мануша́ придуминэна адя́кэ, со лэ́нгирэ васта́ тэ на докэрэн лэ́нгирэ рэ́нды.

¹³ Ёв ухтылэ́ла бут-годякирэ манушэ́н дрэ лэ́нгири фрэнтыма адя́кэ, со мэндронэ – манушэ́нгирэ кхэтанэ́ ду́мы обрисёна фуипнаса пэ лэ́ндэ:

¹⁴ ёнэ дыкхэнапэ калыпнаса дывэсэ́, и ёнэ псирэ́на, чилави вастэ́нца сыр корорэ́ дывэсэ́, сы́рбы ёнэ исын раты́.

¹⁵ И Ёв выракхэла куртала́тыр одолэ́н, кон исын дрэ трэ́бима, зор-манушэ́нгирэ ракирибнастыр и лэ́нгирэ вастэ́стыр.

¹⁶ И чорорэ́ явэ́на тэ ужакирэн лачхипэ́н, и начачунэ пхандэна пэ́скиро муй.

¹⁷ Акэ, бахтало́ исын одова́ ману́ш, савэ́с Дэвэ́л зоралэ́с сыклякирэ́ла, палдава́ на отпхэнпэ Сарэзоралыпнаскирэ Дэвлэ́скирэ сыклякирибнастыр кэ дукха́.

¹⁸ Пал-дова́ со Ёв пэкавэла кэ калэ́ маса́ (синяки), и Ёв пирипхандэла лэн; Ёв дукхавэла и Лэ́скирэ васта́ састякирэна.

¹⁹ Ёв зракхэ́ла тут шовэ бидэндыр и дрэ эфта́то биба́хт на чилавэ́ла тут.

²⁰ Ёв выракхэла тут бокха́тыр, мэрибна́стыр, и курталакирэ зорья́тыр пэ марибэ́н.

²¹ Ту явэ́са гарадо́ бибахталэ́ чибэндыр (чибьендыр), и ту на явэ́са тэ дарэс хасякирибнастыр, ке́ли ёв явэ́ла.

²² Ту явэ́са тэ саспэ бокха́тыр и хасякирибнастыр, и ту на явэ́са тэ дарэс мурдалэ́ндыр, савэ́ исын пэ пхув.

²³ Пал-дова́ со ту́тэ явэ́ла доракирибэ́н барэ́нца фэлдатыр и фэлдакирэ мурдала́ явэ́на дро рама́нё (миро) ту́са.

²⁴ И ту явэ́са тэ джинэ́с, со тыри́ ша́тра исын зракхны, и ту обдыкхэса пэ́скирэ-бакрэнгири шопа, со саро́ одо́й исын пэ пэ́скиро штэ́то.

²⁵ И ту явэ́са тэ джинэ́с, со тырэ́ пала́л-явибнаскирэ чхаворэ́ (патомки) явэ́на бут, и тырэ́-родоскирэ чхавэ́ явэ́на ада́кицы бут, кицы́ исын чаринки пэ пхув.

²⁶ Ту додживэса кэ барэ́ бэрша́ сы́рбы парнэ́-гивэскирэ ґарбы (снопы) доджана кэ спялыма, со лэн чхувэ́на тэлэ́ дро пэ́скиро уляго (пора).

²⁷ Ѓа́да, дава́ исын саро́, со амэ розґалыям, дава́ исын чачипэ́н, шун дава́ и джин, со дава́ исын ваш тыро́ лачхипэ́н.”