Ióvo 42 - Библия - Пэ Балтитко Романи чиб (Романэс) 2019

Ио́во Приджинэла Пэ́скиро Грэ́хо

¹ И отпхэндя́ Ио́во Ра́скэ-Дэвлэ́скэ кадасавэ́ лавэ́нца:

² “Мэ джино́м, со ту могинэ́са саро́ тэ кэрэ́с, и нанэ нисо́, соб (кай) тэ обрикирэл Тут тэ кэрэ́с дова́, со Ту обдуминдян.”

³ Ту пхуцян: “Кон исын кадава́, саво́ цемнякирэла Мирэ́ лава́ бигодыпнаса?” Нэ мэ пхэндём дава́, со мэ на ґалыём. Сарэ́ далэ́ лава́ исын ди́вна ваш ма́нгэ, савэ́ мэ на джиндём.

⁴ Шун, Дэ́вла, мэ манга́ва Тут, дэ тэ пхэна́в ма́нгэ, Ту пхэндя́н: “Мэ ява́ва тэ пхучав ту́тыр, нэ Ту явэ́са тэ ґалякирэс ма́нгэ.”

⁵ Мэ шундём пал ту́тэ, со фэ́ни яви́р мирэ́ кана́ шундлэ́ явирэ манушэ́ндыр, нэ акана́ мирэ́ якха́ дыкхэ́на тут.

⁶ Палдава́ мэ давапэ палэ мирэ́ лавэ́ндыр, мэ приджинава миро грэ́хо дро пра́хо и пра́ска.”

Рай Дэвэ́л Дэ́ла Палэ Иовоскэ Буты́р Одолэ́стыр, Со Ёв Лыя́ Иовостыр

⁷ И сыс адя́кэ: пало́ дова́, сыр Рай Дэвэ́л пхэндя́ далэ́ лава́ Иовоскэ, тэ́ньчи пхэндя́ Ёв Элифазоскэ Феманостыр кадасавэ́ лава́: “Мири́ бари холы́ ґаздыя́пэ пэ ту́тэ и пэ тырэ́ малэндэ, пал-дова́ со тумэ́ на пхэнэнас чачипэ́н пал Ма́ндэ, сыр пхэндя́ миро писха́ри Ио́во.

⁸ Палдава́ лэн акана́ эфта́ гурувэ́н и эфта́ бакрэ́н и джа́н кэ Миро писха́ри Ио́во и янэ́н лэн сыр свэ́нто хачкирибнаскиро дыибэ́н, и мэк Миро писха́ри Ио́во тэ мангэ́лпэ пал тумэ́ндэ. Пал-дова́ со мэ прилава лэ́скиро мангипэ́н, и соб (кай) Ма́нгэ тэ на сыкавав Пэ́скири зор пэ тумэ́ндэ пал тумаро́ дылныпэ́н, пал-дова́ со тумэ́ ракирдэ́ на чачипэ́н пал Ма́ндэ, сыр миро писха́ри Ио́во пхэндя́.”

⁹ О Элифазо Феманостыр, о Вилдадо Шуахостыр, и о Цофаро Наамитянино гинэ́ и кэрдэ́ адя́кэ, сыр Рай Дэвэ́л пхэндя́ лэ́нгэ; пал-дова́ со Рай Дэвэ́л прилыя́ Иовоскири па́тери (моли́тва).

¹⁰ И Рай Дэвэ́л дыя́ палэ Иовоскиро миштыпэ́н, ке́ли ёв мангдя́пэ пал лэ́скирэ малэндэ. И Рай Дэвэ́л дыя́ Иовоскэ дуй мо́лы бутэды́р, сыр сыс лэ́стэ.

¹¹ И сарэ́ лэ́скирэ пша́ла, сарэ́ лэ́скирэ пхэня́, и сарэ́ лэ́скирэ пинджкирдэ мануша́, кон сыс лэ́стэ, явнэ́ кэ ёв и ёнэ ханэ́ маро́ дро лэ́скиро кхэр, и ёнэ раманякирэнас (спокоинэнас) лэс лачхэ́ лавэ́нца и подрикирэнас лэс дро ду́хо (фа́но) пал дова́ чорипэ́н, со Рай Дэвэ́л бичхадя́ пэ лэ́стэ. Кажно лэ́ндыр дыя́ Иовоскэ ловорэ и сувнакуны́ ангрусты.

¹² И бахтякирдя́ Рай Дэвэ́л Иовос дро джиибна́скиро ко́нцо (яго́ро) буты́р сыр вагэдыр; и сыс Иовостэ дэшуштар бара́ бакрэ́, шов бара́ верблюды дро ґа́мо и екх бар ослицы.

¹³ И сыс адя́кэ-паць Иовостэ эфта́ чхавэ́ и трин чхая́.

¹⁴ И дыя́ лав Ио́во пэрвонакэ Эмима, явирьякэ Кэзия, тритонакэ Кэрэнгапух.

¹⁵ Пир сари́ доя́ пхув на сыс кадасавья шукарня джувля́, сыр Иовоскирэ чхая́ и лэ́нгиро дад дыя́ миштыпэ́н лэ́нгэ машки́р пшалэ́ндэ.

¹⁶ Тэ́ньци и дживдя́ Ио́во шэл тэ штардэша́ бэрш; и ёв дыкхця́ пэ́скирэ чхавэ́н и унукэн лэ́скирэ штарэ́ родо́стыр.

¹⁷ И мыя́ Ио́во, пхурано́ и чало дывэсэ́ндыр.