Ióvo 41 - Библия - Пэ Балтитко Романи чиб (Романэс) 2019

¹ [8] Дыкх! Нанэ мол тэ ужакирэл, со ману́ш лэ́ла лэс. Ци на пэрэ́ла ману́ш фэ́ни екхэ лэ́скирэ дыкхибнастыр?

² [9] Ние́кх нанэ дасаво муршкано́, соб (кай) тэ джангавэл Левиафанос: и, кон тэды дэ́ла ра́да тэ тэрдёл анги́л Ма́ндэ?

³ [10] Кон пхэнэлас ма́нгэ, соб (кай) Мэ лэ́скэ тэ плэскирав палэ? Саро́ тэл болыбэ́н исын фэ́ни (то́ка) Миро.

⁴ [11] Мэ на ява́ва штыл, соб (кай) тэ на пхэна́в пал лэ́скирэ ґэра́ и васта́, ци пал Левиафаноскири бари зор ци пал лэ́скирэ гожонэ-масэнгирэ барипэ́н?

⁵ [12] Кон дэ́ла ра́да тэ отлэл лэ́скири упратуны и́дя (флика) явре́стыр? Кон дэ́ла ра́да тэ явэ́л пашы́л кэ ёв дуитконэ савариса (уздечкаса)?

⁶ [13] Кон сашты́ могинэ́ла тэ псиравэл Лэ́скиро муй, со исын сы́рбы вудара́ лэ́скирэ трашанэ дандэнца трусця́л?

⁷ [14] Лэ́скиро думо сы́рбы пхутёла шчытэндыр, савэ́ исын пхандынэ зоралэ́с сы́рбы чэргэнорьяса (печатяса):

⁸ [15] адя́кэ со екх исын пашы́л явирэ́стэ, со фа́но (воздухо) на проджа́ла машки́р лэ́ндэ;

⁹ [16] ёнэ исын дро екхипэ́н екх екхэ́са адя́кэ зоралэ́с, со нашты́ тэ роскэрэс пэ паша́ лэн.

¹⁰ [17] Ке́ли дава́ Левиафано дэ́ла чиха (чыхинэла), дуд зяинэла сыр блискавица, а лэ́скирэ якха́ исын сы́рбы злокоскирэ цымблы (ресницы).

¹¹ [18] Лэ́скирэ мо́стыр джа́на дуда, со хачона, и тыкнэ́ ягорья вурняна сы́гэс сыр карэдынятыр.

¹² [19] Лэ́скирэ рутхунендыр (ноздрендыр) джа́ла тхув сы́рбы кэраибнаскирэ пирьятыр и какавятыр (котлостыр).

¹³ [20] Лэ́скиро пхурдыпэн росхачкирэла вангара, и барэ́ яга вурняна лэ́скирэ уштэндыр.

¹⁴ [21] Бари зор ракхэлапэ дрэ лэ́скири мэн, и траш кхэлэла анги́л лэ́стэ.

¹⁵ [22] Лэ́скирэ масэнгирэ мусня (мышчы) исын чхудэ́ кхэтанэ́; ёнэ исын биладэ пэ лэ́стэ, и нашты́ тэ чхувэ́с лэн штэто́стыр.

¹⁶ [23] Лэ́скиро ило́ исын пхаро́ сыр бар, мэк и твардо исын сыр тэлатуно сявитко бар (бэлэдин).

¹⁷ [24] Сыр ёв ґаздэ́лапэ, зоралюки (силачы) издрана; пир лэ́скирэ-пхагипнаскири зор ёнэ нашавэна ду́хо (фа́но).

¹⁸ [25] Мэк вари-кон и дорэсэ́ла лэс куртала́са; ёй нисо́-лэ́скэ, адя́кэ-паць ни чхурдыбнытко буст (коп΄ё), ни пхусаибнытко буст (дротико), ни чхурье–чхурдыбнытко [латы].

¹⁹ [26] Ёв дэ́ла чол састырэскэ сыр пхусэскэ и бронзакэ сыр кирнэ каштэскэ.

²⁰ [27] Марибны́тка бустя́ (стре́лы) нашты́ тэ зачхувэн Левиафанос тэ нашэ́л, марибны́тка бара́ ячэ́напэ сыр гивэскирэ тетивы.

²¹ [28] Булавы ячэ́напэ лэ́стэ сы́рбы пхус; ёв салапэ, сыр страхакирэна пхусабнытконэ бутяса.

²² [29] Тэл лэ́скирэ пашварэ исын остра бара́; ёв кхарэ́лапэ (двигинэлапэ) пир далэ́ остра бара́ сы́рбы пир бла́та.

²³ [30] Ёв кэрэ́ла адя́кэ, со хор штэ́то кэрадёла сыр пири́; ёв кэрэ́ла адя́кэ, со мо́рё (дэрья́в) пирикэрэлапэ дрэ пири́ макхибнаса (мазяса).

²⁴ [31] Ёв ячкирэ́ла дроморэ пал пэ́стэ, со зяинэна; сашты́ тэ думинэс, со хорипэ́н исын сы́рбы сыво бал.

²⁵ [32] Пэ пхув нанэ ние́кх, сыр Левиафано исын, кон исын создыно́ битрашакиро.

²⁶ [33] Ёв дыкхэ́ла вучипна́стыр пэ кажнонэ́ барэ́ джидалэстэ, ёв исын кра́ли пэ сарэ́ пхутькирдэ́ мурдалэ́ндэ.”