Ióvo 39 - Библия - Пэ Балтитко Романи чиб (Романэс) 2019

¹ Ци джинэ́са ту часо (цы́ро) ке́ли буса бэргитка бузня (козы) лотькирэна тыкнэн? Ци дэ́са ра́да ту тэ дыкхэ́с, ке́ли мирги (лани) лотькирэна?

² Ци могинэ́са ту тэ погинэс, кицы́ чхона́ ёнэ исын пхарэ́ тыкнэнца? Ци джинэ́са ту часо, ке́ли мирги дая́ лотькирэна лэн?

³ Ёнэ выбандёна, ке́ли ёнэ лотькирэна: ёнэ чхурдэна яври́ пэ́скирэ дукха́ пэ́скирэ пала́л-явибнаскирэнца (патомкэнца).

⁴ Лэ́нгирэ тэрнэ́ исын зоралэ́, ёнэ барьёна пэ гив, ёнэ уджана, и ёнэ на рисёна кэ ёнэ.

⁵ Кон вымэкця пэ во́ля бусонэ (диконэ) осло́с? Кон роспхандя пенты онагэроскэ?

⁶ Кон лэ́скэ кэрдя́ кхэр чхучэ́ пхувья́тыр, и джиибнытко штэ́то лондэ штэтэ́ндыр?

⁷ Адава́ мурда́л дыкхэ́ла вучипна́стыр пэ форо́скири го́дла, ёв на шунэ́ла, со пэ лэ́стэ дэ́ла го́дла потрадыпнаскиро.

⁸ Ёв чарадёла пэ сама вучипэна́ пэ бэ́рги, ёв родэ́ла кажно зэлэныбэн.

⁹ Ци закамэ́ла лэскаро гурув тэ дынаринэ́л ту́кэ? Ци явэ́ла ёв тэ ратькирэл пашы́л тыри́ ясла?

¹⁰ Ци дэ́са ра́да ту шэлэнца тэ припхандэс бусонэ гурувэ́с кэ ле́сьни (борозны)? Ци явэ́ла ёв тэ пхаравэл пхув пал ту́тэ?

¹¹ Ци явэ́са ту тэ допатяс лэ́скэ, пал-дова́ со лэ́стэ исын бари зор? Ци мэкэса ту пэ лэ́стэ пэ́скири буты́?

¹² Ци допатяса ту лэ́скэ, соб (кай) ёв тэ янэл кхэрэ́ тыро́ гив? И, соб (кай) ёв тэ скэдэл гив дрэ тыри́ шу́рна (гумно)?

¹³ Страусица марэла пэ́скирэ пхакэнца радыма́тыр, нэ ла́тэ нанэ адасавэ́ пхака́ и шука́р пора сыр павлиностэ,

¹⁴ ёй ячкирэ́ла пэ́скирэ парнорэ пэ пхув, и ёй татькирэла лэн пэ пхув.

¹⁵ Ёй бистрэла, со ґэро́й могинэ́ла тэ тасавэл лэн, ці, со фэлдытко мурда́л (зве́рё) могинэ́ла тэ пхагирэл лэн.

¹⁶ Страусица пхарьякирэла пэ́скиро ило́ кэ ла́кирэ тыкнэ́, сы́рбы ёнэ исын на ла́кирэ, ёй на дарэ́ла, со ла́кирэ пхарэ́ бутя́ исын ивья́.

¹⁷ Пал-дова́ со дава́ Мэ, Дэвэ́л, лыём криг годыпэ́н ла́тыр, и мэ на дыём годы́ ла́кэ.

¹⁸ Ке́ли ёй ґаздэ́лапэ вучэ́с, ёй дыкхэ́ла вучипна́са пэ грэстэ, и пэ манушэ́стэ, кон исын уклисто пэ грэстэ.

¹⁹ Ци дава́ ту, Ио́во, дыя́н зор грэскэ и уридян грива пэ лэ́скири Мэн?

²⁰ Ци могинэ́са ту тэ затрашавэс грэс сыр скочкос? Ёв адя́кэ даранэс фырскинэла, со ґаздэ́ла траш.

²¹ Ёв ґанавэла копытэнца пхув и древа́н радынэ́лапэ пэ́скирэ зорья́тыр; ёв прастала ґалопоса одори́к, кай мануша́ зджанапэ мардытконэнца (оружыёса).

²² Ёв сы́рбы салапэ, и на джинэ́ла дар; ёв на ґалёла траш, ёв на рисёла палэ куртала́тыр;

²³ колчано брязгинэла сцял лэ́стэ, марибны́тко буст и чхурье – чхурдыпнытко (дротико) зяинэна анги́л.

²⁴ Ёв накхавэла пхув сы́гэс и холя́са, и ёв на могинэ́ла тэ тэрдёл пэ штэ́то, ке́ли ёв шунэ́ла ро́го (труба).

²⁵ Сыр ро́го забашавэла, грай дэ́ла зан “Ага”; ёв сунгавэла марибэ́н дурипнастыр, сыр раё дэ́на го́дла зоралэ́ заненца (заненца).

²⁶ Ци тырэ́ годыпнастыр кагненгиро (ястребо) вурняла, и роздиндькирэла пэ́скирэ пхака́ кэ паш-дывэсы́тко риг?

²⁷ Ци тырэ́ лавэ́стыр ґаздэ́лапэ маму́й упрэ́ (о́рло) ки́до и кэрэ́ла пэ́скири ґнязда пэ вучипэ́н?

²⁸ Ёв дживэ́ла пэ скалы и ёв ратькирэла пэ скалэнгирэ востримэ, штэ́ты, со на доджаса,

²⁹ одотхы́р ёв выродэла со тэ рискирэ́л дандэнца; ёв чхувэ́ла пэ́скирэ якха́ пэ вари-со дурипнастыр;

³⁰ и лэ́скирэ тыкнорэ пьена рат; – кай исын мулыпэн, одо́й исын лэ́скирэ тыкнорэ.”

³¹ [40.1-ю.о.] И отпхэндя́ дурэды́р Рай Дэвэ́л Иовоскэ дасавэ́ лавэ́нца:

³² [2] “Ци явэ́ла одова́ ману́ш, кон лыджа́ла чинга́рд Сарэзорьякирэ Дэвлэ́са, тэ пирисыклякирэл Лэс? Мэк ёв, кон бангякирэла Дэвлэ́с, тэ отпхэнэл Лэ́скэ!”

³³ [3] И отпхэндя́ Ио́во Ра́скэ-Дэвлэ́скэ и ракирдя́:

³⁴ [4] “Дыкхэ́н мэ сом тэлатуно, со ма́нгэ тэ отпхэнав Ту́кэ? Мэ чхува́ва миро васт пэ ушта́.

³⁵ [5] Мэ екх мо́ло пхэндём, нэ мэ на ява́ва тэ отпхэнав акана́: чачо́, яви́р мо́ло, нэ мэ буты́р на ява́ва тэ ракира́в.