Ióvo 38 - Библия - Пэ Балтитко Романи чиб (Романэс) 2019

Дэвэ́л Ракирэ́ла Иовоса

¹ И отпхэндя́ Рай Дэвэ́л Иовоскэ рискирибна́скирэ балвалятыр (бурятыр) лавэ́нца:

² “Кон исын кадава́, кон калякирэла Мирэ́ задумы нагодьварэ лавэ́нца?

³ Подпхандэпэ и яв скэдыно́, Ио́во, сыр мурш, и Мэ ява́ва тэ пхучав ту́тыр, ту явэ́са тэ отпхэнэс Ма́нгэ.

⁴ Кай са́нас ту, сыр мэ зачхувавас пхув? Пхэн Ма́нгэ, ко́ли ту сан барэ́-годя́киро?

⁵ Кон припхэндя́ барипэ́н пхувьякэ? Ци джинэ́са ту дава́? И кон роздиндкирдя пэ ла́тэ шэло тэ меринэл?

⁶ Кэ со пхувья́киро фунда́менто причхудо зорья́са? И кон чхудя́ ла́киро вэнглытко бар;

⁷ ке́ли багандлэ кхэтанэ́ чэргэня́ пэ зло́ко (пэ ра́нко), и сарэ́ Дэвлэ́скирэ чхавэ́ дэ́нас го́дла радыма́тыр?

⁸ Ци кон запхандя мо́рё (дэрья́в) вударэнца, ке́ли ёв пхарадёлас барэ́ панингэса, сы́рбы ёв джа́лас яври́ лочатыр;

⁹ ке́ли мэ кэрдём облокэндыр лэ́скэ и́ди и пхэрдэ́ цёмныматыр патькирибнаскирэ пхэрнэ (пелёнки).

¹⁰ Ке́ли мэ чхудём мири́ ме́ра морёскэ, и ке́ли мэ чхудём штабы и вудара́;

¹¹ ке́ли мэ пхэндём: ‘Фэ́ни адя́кэ дур ту́кэ сашты́ тэ джас, нэ, на дурэды́р, и ада́й тырэ́ пхутькирдэ́ валны исын бангэ́ тэ тэрдён.’

¹² Ци припхэнэсас ту злокоскэ (ранкоскэ), сыр ту лыян тэ дживэ́с, и ци кэрэсас ту адя́кэ, соб (кай) ра́нко тэ джинэ́л пэ́скиро штэ́то,

¹³ соб (кай) злокоскиро дуд тэ доджал кэ пхувья́кирэ яго́ры, и, соб (кай) фуе́ манушэ́н тэ тринскирэн ла́тыр,

¹⁴ соб (кай) ёй, пхув, тэ рисёл сыр ґлэя тэл якхи́тко (печать), и соб (кай) ёй тэ парувэл пэ́скири мастин (цвято) сыр и́дя,

¹⁵ тэ пририкирэл дуд анги́л фуе́ манушэ́ндэ, и соб (кай) тэ пхагирэл ґаздыно́ васт.

¹⁶ Ци са́нас ту адя́кэ дур, кай морёскирэ (дэрьявэ́скирэ) ґанингорэ лэнапэ? Ци псирдян ту пир морёскиро (дэрьявэ́скиро) дугно тэ розґалёс хорипэ́н?

¹⁷ Ци псирадяпэ анги́л ту́тэ мэрибнаскири по́рта? Ци дыкхця́н ту вуда́р кэ мэрибнаскири зэр (тень)?

¹⁸ Ци ґалыян ту хор пхувья́киро буґлыпэ́н? Пхэн зоралэ́с Ма́нгэ, ко́ли ту джинэ́са саро́ дава́?

¹⁹ Кай исын дром кэ штэ́то, каты́р дуд джа́ла? И кай цямлыпэ́н ячэ́лапэ,

²⁰ соб (кай) ту могинэсас тэ лыджас лэн кэ лэ́нгирэ кустыка (границы), и тэ бичхавэс лэн кэ лэ́нгирэ кхэра́?

²¹ Ци джинэ́са ту дава́, пал-дова́ со тэды ту ужэ са́нас пэ свэ́то, ци пал-дова́ со ту́тэ исын барэ́ бэрша́ пир дывэса́?

²² Ци са́нас ту вари-ке́ли одо́й, кай исын пиралы́ ваш ив? Ци дыкхця́н ту пиралы́ ваш градо,

²³ со Мэ ракхцём ваш дава́ часо (цы́ро); сыр явэ́ла пхарипэ́н, сыр явэ́на дывэса́ ваш марибэ́н и война?

²⁴ Савэ дромэ́са дуд (свэ́то) роскэрэлапэ пэ паша́, ци балва́л вастоко́стыр (бэльвэлитконэстыр) розурнялапэ пир пхув?

²⁵ Кон кэрэ́ла дром барэ́ панингэскэ тэ чхувэлпэ дурэды́р, ци кон сыкадя́ дром ваш громоскири блискавица?

²⁶ Ци кон кэрэ́ла адя́кэ, соб (кай) тэ джал брышы́нд пэ пхув, кай нико́н нанэ, пэ чхучи́ пхув, кай нанэ манушэ́с,

²⁷ соб (кай) тэ панякирэл кэ чалыпэн наобдживдлэ штэ́ты, и тэ кэрэ́л адя́кэ, соб (кай) чаринки тэ барьён кэ ґэнсто чар.

²⁸ Ци исын брышындэскиро дад? Ци кон яндя́ пэ свэ́то пахлынякирэ (росакирэ) капки?

²⁹ Дрэ конэ́скири лоч (чрево) латхэлапэ лёдо? И кон яндя́ мразо пэ свэ́то?

³⁰ Паня́ кэрэ́напэ сы́рбы бара́, и саро́ панескиро буґлыпэ́н, кай исын хор тэла́л, мразёла дро екх кова?

³¹ Ци могинэ́са ту тэ пхандэс чэргэнгиро рядо, со кхарэ́лапэ Плеяды, и ци могинэ́са ту тэ роспхандэс вольнэдыр Орионоскирэ-чэргэненгири кусты́к?

³² Ци могинэ́са ту тэ лыджас анги́л чэргэненгиро зодиако дро пэ́скиро часо (цы́ро), и ци могинэ́са ту тэ лыджас ричыха ричорэнца?

³³ Ци джинэ́са ту болыбна́скирэ–статутно упхэныбэ́н? Ци могинэ́са ту тэ чхувэ́с лэс тэ раинэл пэ пхув?

³⁴ Ци могинэ́са ту тэ ґаздэс пэ́скири зан кэ болыбэ́н, соб (кай) бут – бут паня́ тэ чхакирэн тут?

³⁵ Ци дэ́са ра́да ту тэ бичхавэс блискави́цы, соб (кай) ёнэ тэ джа́н, и соб (кай) ёнэ тэ пхэнэ́н ту́кэ: “Акэ, амэ сам.”

³⁶ Кон дыя́ годыпэ́н манушэ́скирэ годякэ? И кон дыя́ годьварипэн илэскэ.

³⁷ Кон дэ́ла ра́да тэ погинэл о́блоки пэ́скирэ годыпнаса? Ци, кон дэ́ла ра́да, соб (кай) о́блоки тэ вычхувэн паня́ болыбна́стыр сы́рбы гонэстыр,

³⁸ ке́ли пра́хо кэрдя́пэ дрэ тварда комки, а пхувья́кирэ котэра́ липниндлэпэ кхэтанэ́.

³⁹ Ци ту, Ио́во, старэса ваш шчэрицакэ (львицакэ), соб (кай) ёй тэ рискирэ́л вари-со дандэнца, ци ту дэ́са чалэ́с хабэ́н тэрнэ́ шчэрорэнгэ?

⁴⁰ ке́ли ёнэ подчорьёна дрэ пэ́скирэ вэнты (логовы), ци подракхэна, пасиндой, вари-со дрэ лэ́нгирэ чораханэ штэ́ты (засады)?

⁴¹ Кон дорэсэ́ла хабэ́н коракоскэ (вороноскэ), ке́ли лэ́скирэ чхавриня (птенцы) годлэна кэ Дэвэ́л и псирэ́на трусця́л пир дова́, со лэ́ндэ нанэ мас.