Ióvo 37 - Библия - Пэ Балтитко Романи чиб (Романэс) 2019

¹ Далэ́стыр миро ило́ адя́кэ-паць издрала, и кхарэ́лапэ (двигинэлапэ) лэ́скирэ штэто́стыр.

² Шунэ́н, шунэ́н громо Лэ́скирэ глосатыр, и громо, со марэла Лэ́скирэ мо́стыр.

³ Ёв бичхавэ́ла громо тэла́л тэл саро́ болыбэ́н, и Лэ́скири блискавица, прастала кэ сама яго́ры (краи́) пэ пхув

⁴ Пало́ дава́, акэ, Лэ́скири зан ґреминэла: Ёв дэ́ла громоса Пэ́скирэ райканыпнытконэ занятыр (глосатыр), и Ёв дэ́ла во́ля блискавицакэ тэ хачол адя́кэ ґара́, сыр шунэлапэ Лэ́скири зан.

⁵ Дэвлэ́скиро громо адя́кэ дивнэс греминэла, Ёв кэрэ́ла барэ́ рэ́нды, со амэ́нгэ нашты́ тэ ґалёвас хор лэн.

⁶ Пал-дова́ со Ёв пхэнэ́ла ивэскэ: “Пхэрдякир пхув”, адя́кэ-паць Лэ́скири зор исын пэ брышындорэ и пэ барэ́ брышында.

⁷ Ёв чхувэ́ла якхи́тко / чэргэнори́ (печать) пэ васт кажнонэ́ манушэ́скэ, соб (кай) сарэ́ мануша́ тэ джинэ́н Лэ́скири буты́.

⁸ Мурдала́ джа́на дрэ пэ́скирэ гаравипнаскирья (убежышчы), и ёнэ ячэ́напэ дрэ пэ́скирэ вэнты (ложышчы).

⁹ Рискирибнаскири балва́л явэ́ла паш-дывэсытконэ́ хароматыр, и шыл джа́ла балвалендыр, со пхурдэна паш-ратякирэ рига́тыр.

¹⁰ Лёдо ячэ́лапэ Дэвлэ́скирэ пхурдыпнастыр, и барэ́ паня́ мразёна.

¹¹ Ёв сапанякирэла ґэнста о́блоки пане́са, и Ёв росчхувэла лэн пир болыбэ́н блискавицаса,

¹² и ёнэ рисёна и кхарэнапэ (двигинэнапэ) Лэ́скирэ вастэ́са адя́кэ, соб (кай) тэ кэрэ́н дова́, со Ёв припхэнэла лэ́нгэ пир саро́ пхувья́киро буґлыпэ́н.

¹³ Дэвэ́л бичхавэ́ла брышы́нд, соб (кай) тэ пирисыклякирэл ману́ш ци ваш пхув, соб (кай) тэ сыкавэ́л Пэ́скири ла́ска.

¹⁴ Шун дава́, Ио́во, яв штыл и обдумин Дэвлэ́скирэ ди́вна бутя́.

¹⁵ Ци джинэ́са ту, сыр Дэвэ́л розбичхавэла о́блоки, и кэрэ́ла адя́кэ, соб (кай) тэ зяинэл дуд Лэ́скирэ облокэндыр?

¹⁶ Ци джинэ́са ту, сыр рикирэнапэ о́блоки – кадалэ́ ди́вна бутя́ Лэ́стэ, Кон исын бидошэ́нгиро дро джиныбэ́н?

¹⁷ Со́скэ тырэ́ и́ди ячэ́напэ хачкирдэ́, ке́ли Дэвэ́л штылякирэла пхув балваляса паш-дывэсытконэ́ рига́тыр?

¹⁸ Ци ту Лэ́са росчхудян пир рига́ о́блоки, со исын зоралэ́ сыр вычхудо ґиндало?

¹⁹ Сыкля́кир амэн, Ио́во, со тэ пхэнас Лэ́скэ! Пал-дова́ со амэ нашты́ тэ росчхувас пэ́скирэ лава́ екх пал екх пир дова́, со амэ сам дро калыпэ́н.

²⁰ Ци могинэ́ла вари-кон тэ пхэнэ́л Дэвлэ́скэ, со мэ камамас тэ ракира́в Лэ́са? Ци пхэнэлас вари-кон Лэ́скэ, и тэ хасёл?

²¹ И акана́ мануша́ на дыкхэ́на дуд, сыр ёв зяинэла, ке́ли ёв исын гарадо́ дрэ о́блоки. Сыр балва́л проджа́ла, ёв жужакирэла болыбэ́н.

²² Дэвэ́л явэ́ла паш-ратякирэ рига́тыр сы́рбы сувнакуно́ шукарипэ́н кэ дар.

²³ Амэ нашты́ тэ ґалёвас сарэ́са Сарэзорьякирэ Дэвлэ́с: Ёв исын Най Зоралэды́р, Ёв исын най кучэдыр пэ сэ́ндо, и Ёв исын древа́н чачуно́, Ёв на притасавэла никонэ́с.

²⁴ Палдава́ мануша́ дарэ́на Лэ́стыр, Ёв на лэ́ла одолэнгири риг, савэ́ исын годэ́ дрэ пэ́скирэ илэ.”