Ióvo 35 - Библия - Пэ Балтитко Романи чиб (Романэс) 2019

Элиуёскиро (Элюёскиро) Три́то Ракирибэ́н

¹ О Элиуё (Элюё) дурэды́р ракирдя́ и пхэндя́:

² “Ци думинэса ту, со дава́ исын чачипэ́н, сыр ту пхэндя́н: мэ сом чачунэдыр Дэвлэ́стыр!

³ Пал-дова́ со ту пхуцян Дэвлэ́стыр: “Саво́ лачхипэ́н явэ́ла ма́нгэ [ту́кэ-р.с.]? Сави́ буты́р льго́та явэ́ла ма́нгэ, ко́ли мэ и кэрдём грэ́хи анги́л дава́?”

⁴ Мэ отпхэнава ту́кэ и тырэ́ дрогонэ́ малэнгэ, кон исын ту́са.

⁵ Подыкх упрэ́ пэ болыбэ́н, и дыкх, и акэ, исын о́блоки (хмары), со исын упра́л ту́тыр.

⁶ Ко́ли ту кэрэ́са грэ́хи, со кэрэ́са ту Лэ́скэ? Ци, ко́ли ту бутэдырьякирэса пэ́скиро чорипэ́н, со ту кэрэ́са Лэ́скэ?

⁷ Ко́ли ту сан чачуно́, со дэ́са ту Лэ́скэ? Ци со Ёв дорэсэ́ла тырэ́ вастэ́стыр?

⁸ Тыро́ фуипэ́н кэрэ́ла дош адасавэ́ манушэ́скэ, сыр ту сан кокоро́, и тыро́ чачипэ́н исын дасаво-паць, сыр кажнонэ́ явирэ манушэ́стэ.

⁹ Э мануша́ годлэна, ко́ли лэн бут притасавэ́на, ёнэ годлэна, соб (кай) лэ́нгэ тэ подэн васт зоралыпнаскирэ мануша́.

¹⁰ Нэ ние́кх на пхэнэ́ла: “Кай исын Дэвэ́л, миро Создыибнаскиро, Кон дэ́ла гилы́ сыр наде́я раты́?

¹¹ Кон сыклякирэ́ла амэн бутэды́р мурдалэ́ндыр, и кон кэрэ́ла амэн годэдыр чириклендыр пэ болыбэ́н?

¹² Ёнэ годлэна роибнаса, нэ Дэвэ́л на отпхэнэ́ла лэ́нгэ пир-дова́, со ёнэ исын бибахталэ́ и пхутькирдэ́.

¹³ Нэ Сарэзорья́киро Дэвэ́л на шунэ́ла чхучо́ (пусто) ракирибэ́н, и на дэ́ла вага лэ́нгэ.

¹⁴ Мэк ту, Ио́во, пхэндя́н, со ту на дыкхэ́са Лэс, нэ тыро́ чачипэ́н исын анги́л Лэ́стэ и ту́кэ трэй тэ ужакирэс Лэс.

¹⁵ И акана́, пал-дова́ со Ёв на сэндиндя пхарэ́с тут дрэ пэ́скири холы́, и со Ёв сы́рбы на дыкхця́ пэ тыро́ дылныпэ́н;

¹⁶ палдава́ ту, Ио́во, отпхандэса пэ́скиро муй ивья́ (напра́снэс), и ту бутэдырьякирэса пэ́скирэ нагодэ лава́.”