Ióvo 34 - Библия - Пэ Балтитко Романи чиб (Романэс) 2019

Элиуёскиро (Элюёскиро) Яви́р Ракирибэ́н

¹ И отпхэнэ́лас Элиуё (Элюё) дурэды́р и пхэндя́:

² “Шунэ́н мирэ́ лава́ тумэ́, кон сан годэ́; причхувэ́н кан кэ мэ, тумэ́, кон джинэ́ла бут.

³ Пал-дова́ со кан спробинэла лава́, сыр талой (гортань) коштынэла хабэ́н.

⁴ Явэ́н, выкэдаса пэ́скэ чачипэ́н; явэ́н, джина́са буты́р кхэтанэ́, со исын лачхипэ́н.

⁵ Пал-дова́ со Ио́во пхэндя́: “Мэ сом чачуно́, нэ Дэвэ́л лыя́ криг миро чачипэ́н.”

⁶ Со ж ма́нгэ тэ хохавав пэ миро чачипэ́н? Мири́ даб (рана) на састия, мэк мэ и сом бичорипнаскиро.

⁷ Кай исын дасаво ману́ш сыр Ио́во исын? Кон пьела холямипэн сы́рбы ёв пьела пани́?

⁸ И кон кумплинэлапэ адасавэ́ манушэ́нца, кон кэрэ́ла чорипэ́н, и кон псирэ́ла фуе́ манушэ́нца?

⁹ Пал-дова́ со ёв пхэндя́: “Нанэ лачхипэ́н манушэ́скэ, со ёв зоралэ́с радынэ́лапэ Дэвлэ́стыр.”

¹⁰ Палдава́ шунэ́н миштэ́с ман, тумэ́, кон сан годэ́: нашты́ тэ явэ́л, соб (кай) Дэвэ́л тэ думинэл, тэ кэрэ́л фуипэ́н, и нашты́ тэ явэ́л чорипэ́н Сарэзорьякирэ Дэвлэ́стыр.

¹¹ Пал-дова́ со Ёв отдэ́ла палэ манушэ́скэ пир лэ́скири буты́, соб (кай) кажно ману́ш тэ дорэсэл мазу́ри (награда) пир дова́, со Ёв кэрдя́.

¹² Сарэ́ джинэ́на, со Дэвэ́л ние́кхвар на кэрэ́ла фуипэ́н, и Сарэзорья́киро Дэвэ́л на пиририскирэла чачипэ́н.

¹³ Кон дыя́ зор дрэ Лэ́скири васта́ пэ сари́ пхув? Нико́н жа и дыя́ зор Лэ́скэ тэ раинэл пэ саро́ свэ́то.

¹⁴ Ко́ли Ёв фэ́ни тэ думинэл пал Пэ́стэ, и тэ кэдэл криг Пэ́скиро Ду́хо (Фа́но) и Пэ́скиро пхурдыпэн тэ дживэ́н;

¹⁵ то саро́ джидо́ хасёлас, и ману́ш рисёлас дро пра́хо.

¹⁶ Ко́ли тумэ́ сан годэ́, шунэ́н дава́; пришунэнпэ кэ мирэ́-лавэнгирэ заня́ (глося́):

¹⁷ “Ци сашты́ тэ раинэл одова́, кон зоралэ́с на камэ́ла чачипэ́н? Ци сашты́ ту тэ обсэндякирэс зоралэ́с кодолэ́с, Кон исын Сарэчачипнаскиро?

¹⁸ Ци исын лачхэ́с тэ пхэнэ́л крали́скэ: “Ту сан злыдня!” Ци лачхэ́-родоскирэ ра́скэ: “Ту сан биба́хт.”

¹⁹ Дэвэ́л на прилэ́ла тхагарьенгири риг, адя́кэ-паць Ёв на гинэ́ла барвалэн вучэды́р чорорэндыр, пал-дова́ со Ёв создыя́ и екхэ́с и явирэ́с.

²⁰ Ѓа́да, ёнэ мэрэ́на и дрэ паш-рат, и мануша́ издрана и хасёна, и зоралыпнаскирэ мурша́ пириячэна тэ явэ́н дро свэ́то биманушэскирэ-вастэскиро.

²¹ Пал-дова́ со Дэвлэ́скирэ якха́ исын пэ дрома́, савэ́нца ману́ш псирэ́ла, и Ёв дыкхэ́ла сарэ́ лэ́скирэ шаги (ламня).

²² Ни дро калыпэ́н (цямлыпэ́н), ни дрэ мэрибнаскири зэр (тень) нашты́ тэ гарадён Дэвлэ́стыр мануша́, кон кэрэ́ла чорипэ́н.

²³ Дэвлэ́скэ на трэй, соб (кай) ману́ш тэ обдуминэл, сыр лэ́скэ тэ тэрдёл пэ сэ́ндо анги́л Растэ-Дэвлэ́стэ.

²⁴ Ёв пхагэла пэ котэра́ зоралыпнаскирэ муршэ́н, и Ёв чхувэ́ла явирэ манушэ́н пэ лэ́нгирэ штэ́ты.

²⁵ Дава́ исын чачипэ́н, со Дэвэ́л джинэ́ла лэ́нгирэ рэ́нды, Ёв равэла тэлэ́ лэн раты́, адя́кэ, со ёнэ хасинэ́.

²⁶ Ёв пэкавэла лэн сыр фуе́ манушэ́н анги́л явирэ-манушэ́нгирэ якха́,

²⁷ пал-дова́ со ёнэ рисинэ́ палэ Лэ́стыр, и ёнэ на обдуминэнас Лэ́скирэ дрома́ кэ дасави́ ме́ра.

²⁸ Пал-дова́ со чорорэ́-манушэ́нгирэ роибэ́н догия́ кэ Ёв, пал-дова́ со Ёв шунэ́ла, сыр притасадэ мануша́ ровэна.

²⁹ Ко́ли Ёв исын штыл, кон тэды сашты́ тэ кэрэ́л шумо? И ко́ли Ёв ґаравэла Пэ́скиро муй, тэды, кон сашты́ тэ дыкхэ́л Лэс? Ци тэ явэ́л дава́ ваш сари́ нацыя, ци ваш екхэ манушэ́скэ?

³⁰ соб (кай) тэ на раинэн дуе-муенгирэ мануша́, соб (кай) тэ на явэ́н мануша́ хохадэ сыр фэляса.

³¹ Ци пхэндя́н ту, Ио́во, сыр и яви́р ману́ш Дэвлэ́скэ: мэ на ява́ва буты́р тэ кэра́в грэ́хи!

³² Со мэ на дыкха́ва, далэскэ сыкля́кир ман; ко́ли мэ кэрдём начачунэс, мэ на ява́ва буты́р.

³³ Ци явэ́ла Дэвэ́л тэ отдэ́л палэ пир тыри́ годы́? Пал-дова́ со ту отпхэндянпэ Лэ́скирэ сэндостыр!? Дава́ ту́кэ трэй тэ выкэдэс, на ма́нгэ, пхэн акана́ амэ́нгэ, сыр ту джинэ́са.

³⁴ Годьварэ́, и годэ́ мануша́ пхэнэ́на ма́нгэ, савэ́ шунэ́на ман:

³⁵ “Ио́во пхэндя́ адя́кэ, сыр лэ́стэ нанэ джиныбэ́н, лэ́скирэ лава́ исын нагодэ.”

³⁶ О, соб (кай) Ио́во тэ явэ́л пирипробиндло кэ ко́нцо (яго́ро)! Пал-дова́ со ёв отпхэндя́ адя́кэ, сыр фуй мануша́!

³⁷ Пал-дова́ со Ёв дочхувэла бу́нто пэ Дэвлэ́стэ кэ лэ́скирэ грэ́хи, ёв марэла дрэ васта́ машки́р амэ́ндэ и ёв бутэдырьякирэла пэ́скирэ лава́ пэ Дэвлэ́стэ.”