Ióvo 33 - Библия - Пэ Балтитко Романи чиб (Романэс) 2019

Элиуёскиро (Элюёскиро) Ракирибэ́н Проти Иовостэ

¹ Нэ мэ манга́ва тут, Ио́во, шун, со мэ пхэна́ва ту́кэ, и пришунпэ миштэ́с кэ сарэ́ мирэ́ лава́.

² Ѓа́да, акана́, мэ отпхандава пэ́скиро муй, мири́ чиб явэ́ла ракирэ́л дро миро муй.

³ Мирэ́ лава́ джа́на мирэ́-илэ́скирэ чачипнастыр, и мирэ́ ушта́ выпхэнэна екх джиныбэ́н.

⁴ Дэвлэ́скиро Ду́хо создыя́ ман, и Сарэзорьякирэрэ Дэвлэ́скиро пхурдыпэн дыя́ джиибэ́н ма́нгэ.

⁵ Ко́ли ту нашты́ тэ отпхэнэс ма́нгэ, пхэн пэ́скирэ лава́ екх, пал яви́р анги́л ма́ндэ: тэрдёв анги́л ма́ндэ.

⁶ Акэ, мэ сом дасаво-паць анги́л Дэвлэ́стэ сыр ту, мэ адя́кэ-паць сом создыно́ прахостыр.

⁷ Шун, на андарша (на дар) мирэ́ минатыр, и мирэ́ вастэ́стыр, со явэ́ла пхаро́ ту́кэ.

⁸ Ѓа́да, со мирэ́ кана́ шундлэ́, и мэ шундём тырэ́-лавэнгири зан:

⁹ “Мэ сом бидошэ́нгиро, мэ на кэрдём чорипэ́н.

¹⁰ Нэ Дэвэ́л латхэ́ла банг дрэ ма́ндэ, Ёв гинэ́ла ман пал Лэ́скирэ вэргостэ,

¹¹ Ёв чхувэ́ла мирэ́ ґэра́ дрэ калодки, Ёв дыкхэ́ла пал сарэ́ мирэ́ дрома́!”

¹² Дыкх! Дро дава́ ту на сан чачикано (оправдано), – мэ пхэна́ва ту́кэ: Дэвэ́л исын вучэды́р манушэ́стыр.

¹³ Со́скэ ту лыджа́са чинга́рд Лэ́са? Ёв, хай, на дэ́ла отпхэныбэ́н пал Лэ́скирэ рэ́нды!

¹⁴ Пал-дова́ со Дэвэ́л ракирэ́ла е́кхвар, дуй мо́лы, нэ ману́ш на ґалёла анги́л;

¹⁵ Дэвэ́л сы́рбы пхэнэ́ла дро суно́, дрэ зданки (дыкхибэ́н) раты́, сыр хор соибэн пэрэ́ла пэ манушэ́стэ, ци сыр ману́ш линдрэла (дреминэла) пэ чхуибэ́н,

¹⁶ тэды Дэвэ́л отпхандэла манушэ́нгирэ кана́ и Ёв чхувэ́ла сы́рбы якхи́тко пэ Пэ́скиро упхэныбэ́н,

¹⁷ соб (кай) тэ обрикирэл манушэ́с тэ кэрэ́л чорэ́ рэ́нды, соб (кай) тэ гаравэл пхутькирибэ́н манушэ́стыр.

¹⁸ Ёв ракхэ́ла Манушэ́скиро ди маґилатыр, и лэ́скиро джиибэ́н куртала́тыр.

¹⁹ Дэвэ́л адя́кэ-паць пирисыклякирэла манушэ́с насвалыпнаса дро лэ́скиро чхуибэ́н, и зоралэ́ дукхаса дрэ лэ́скирэ бут кокалы́ адя́кэ,

²⁰ со лэ́стэ буты́р нанэ камибэн тэ хал маро́, и лэ́скиро ди буты́р на камэ́ла смашно хабэ́н.

²¹ Лэ́скирэ маса́ хасёна пэ якха́, и лэ́скирэ кокалы́, со на дыкхнэ́ сыгэды́р, акана́ бицялэ яври́.

²² И лэ́скиро ди джа́ла пашэдыр кэ мулытко ґанби́н, и лэ́скиро джиибэ́н кэ мэрибэ́н.

²³ Ко́ли тэ явэ́л бичхаибнаскиро Янго́ло ваш лэ́скэ, ману́ш, кон розлэла годя́са, екх тысёнцэндыр, соб (кай) тэ сыкавэ́л адалэ́ манушэ́скэ лэ́скиро маму́й дром,

²⁴ тэ́ньчи Дэвэ́л потангинэла манушэ́с и пхэнэ́ла: “Выракх лэс, соб (кай) ёв тэ на джал дрэ маґила (кула); Мэ латхём выкиныбэ́н пал лэ́стэ.”

²⁵ Лэ́скирэ маса́ явэ́на зоралэды́р сыр дрэ лэ́скирэ тэрнэ́ бэрша́, ёв сы́рбы рисёла тэды кэ лэ́скирэ тэрнэ́ бэрша́.

²⁶ Ёв явэ́ла тэ мангэ́лпэ Дэвлэ́скэ, и Дэвэ́л прилэ́ла лэс ласкаса, и ёв явэ́ла тэ дэл паты́в анги́л Лэ́стэ барэ́ радыма́са, пал-дова́ со Дэвэ́л рискирэ́ла палэ лэ́скиро чачипэ́н.

²⁷ Ёв явэ́ла тэ дыкхэ́л пэ явирэ манушэ́ндэ, и тэ ракирэ́л: “Мэ кэрдём грэ́хи, и мэ пиририскирдём чачипэ́н. И мэ на дорэсцём даб палэ.

²⁸ Дэвэ́л выракхця миро ди мулытконэ ґанбинатыр, и миро джиибэ́н удыкхэ́ла дуд!”

²⁹ Акэ, Дэвэ́л кэрэ́ла саро́ дава́ дуй трин мо́лы манушэ́са,

³⁰ соб (кай) тэ янэл палэ Манушэ́скиро ди маґилатыр (кулатыр), соб (кай) тэ обсвэнцынэл лэс джиибна́скирэ дудэса (свэтоса).

³¹ Дыкх миштэ́с, Ио́во, шун откэрдэ канэнца ман, яв штыл, и мэ ява́ва тэ ракира́в.

³² Ко́ли исын вари-со ту́тэ тэ пхэнэ́с, то отпхэн ма́нгэ: ра́кир, пал-дова́ со мэ древа́н кама́м тэ чачакирав (тэ оправдынав) тут.

³³ Ко́ли над, тэды шун ман: яв штыл, и мэ ява́ва тэ сыклякирав тут годыпнаскэ.”