Ióvo 32 - Библия - Пэ Балтитко Романи чиб (Романэс) 2019

Элиуёскиро (Элюёскиро) Ракирибэ́н кэ Мала́

¹ И кадалэ́ трин мануша́ пириячнэ тэ отпхэнэн Иовоскэ, пал-дова́ со Ёв сыс чачуно́ дрэ пэ́скирэ якха́.

² Тэ́ньци захачи́я Элюёскири холы́, кон сыс Варахоскиро чхаво́ Вузитэндыр, савэ́ исын Рамоскирэ сэм΄ятыр: лэ́скири холы́ захачи́я пэ Иовостэ; пал-дова́ со ёв чачакирдя пэс буты́р Дэвлэ́стыр.

³ Лэ́скири холы́ росхачия адя́кэ-паць пэ тринэ́ малэндэ, пал-дова́ со лэ́ндэ нисо́ на сыс тэ отпхэнэн, и со ёнэ сэндиндлэ зоралэ́с лэс.

⁴ Нэ, Элюё (Элиуё), Варахоскиро чхаво́, ужакирдя, пало́ дова́, сыр Ио́во кончындя тэ ракирэ́л, пал-дова́ со лэ́скирэ трин мала́ сыс пхурэды́р лэ́стыр.

⁵ И дыкхця́ Элюё, со на сыс лав дрэ лэ́нгирэ муя́ адалэ́ тринэ́ манушэ́ндэ, то лэ́скири холы́ росхачия буты́р.

⁶ И Элюё, Варахоскиро чхаво́ Вузитэндыр, отпхэндя́ лавэ́нца: “Мэ сом тэрно́, нэ тумэ́ сан дрэ бэрша́, палдова́ мэ со́мас ладжакуно, и мэ дарандыём тэ сыкавав, со мэ джино́м.”

⁷ Мэ пхэндём: “Мэк дывэса́ тэ ракирэ́н, и бэршэнгиро бутыпэн тэ сыклякирэ́л годыпнаскэ.”

⁸ Нэ дрэ манушэ́стэ исын ду́хо (фа́но), саво́ дэ́ла Сарэзорья́киро Дэвэ́л, Саво́ дэ́ла годы́ манушэ́нгэ тэ ґалёл.

⁹ На барэ́-бэршэнгирэ мануша́ исын ўса́ды (сак) най годэдыр, адя́кэ-паць, и ману́ш дрэ бэрша́ на ўса́ды (сак) ґалёла чачипэ́н.

¹⁰ Палдава́ мэ пхэна́ва: “Шунэ́н ман миштэ́с, мэ адя́кэ-паць сыкава́ва, со мэ джино́м.

¹¹ Акэ, – мэ ужакирдём тумарэ́ лава́, мэ шундём откэрдэ канэса причыны, со тумэ́ пириракирэнас, сыр акана́ тумэ́ родэнас, со тэ пхэнэ́н.

¹² Чачо́, мэ рискирдём ило́ кэ тумарэ́ лава́, и, акэ; ние́кх тумэ́ндыр на пирипатякирэла Иовос, и ние́кх на отпхэндя́ пэ лэ́скирэ лава́, –

¹³ тэды тумэ́ на ракирэ́н: “Амэ латхям годыпэ́н. Дэвэ́л отпхэнэ́ла, сыр трэй Лэ́скэ, нэ на ману́ш.

¹⁴ Ио́во на ракирдя́ пэ́скирэ лава́ маму́й кэ мэ, и мэ на отпхэнавас лэ́скэ тумарэ́ лавэ́нца.

¹⁵ Тумэ́ акана́ хокинэ дивостыр, и на отпхэнэна нисо́; тумэ́ндэ и лава́ хасинэ́.

¹⁶ И мэ ужакирдём, пал-дова́ со тумэ́ на ракирдэ́, нэ тумэ́ са́нас штыл, и тумэ́ буты́р на отпхэндлэ́.

¹⁷ И акана́ мэ адя́кэ-паць отпхэнава мирэ́ рига́тыр:

¹⁸ пал-дова́ со ма́ндэ исын пхэрдо́ лава́, ду́хо (фа́но) андра́л ма́ндэ зачхувэла ман тэ ракира́в.

¹⁹ Ѓа́да, саро́ андра́л ма́ндэ исын сыр мол (вино), сави́ исын наотпхандлы, сави́, акэ, акана́ пхарадёла.

²⁰ Мэ ява́ва тэ ракира́в, соб (кай) ма́нгэ тэ явэ́л локхэды́р, мэ отпхандава пэ́скиро муй и мэ отпхэнава.

²¹ Мэ мангавапэ Дэвлэ́скэ, соб (кай) ма́нгэ тэ на явав пэ вари-конэ́скири риг, и соб (кай) ма́нгэ тэ на хохавав гудлэс вари-конэ́с.

²² Пал-дова́ со мэ на джино́м, сыр тэ хохавав гудлэс; ко́ли мэ тэ кэра́в адя́кэ, то миро Создыибнаскиро укэдэла криг ман.”