Ióvo 31 - Библия - Пэ Балтитко Романи чиб (Романэс) 2019

¹ Мэ кэрдём завето мирэ́ якхэ́нца. Со́скэ тэды мэ ява́ва тэ дыкха́в пэ тэрнэ́ патывалэ́ джувля́тэ?

² Палдава́, сави́ явэ́ла мири́ до́ля Дэвлэ́стыр вучипна́стыр, и, саво́ явэ́ла миштыпэ́н Сарэзорьякирэ Дэвлэ́стыр, Саво́ исын пэ вучипэна́?

³ Ци со, нанэ бари би́да пэ начачунэндэ? Ци со, нанэ биба́хт одолэ́нгэ, кон кэрэ́ла чорипэ́н?

⁴ Ци на дыкхэ́ла Ёв мирэ́ дрома́, ци на гинэ́ла Ёв мирэ́ шаги (ламня)?

⁵ Ко́ли псирдём мэ начачунэ дромэ́са, ко́ли джа́лас сыгэды́р мири́ ґэро́й, соб (кай) ма́нгэ тэ хохавав,

⁶ то тэды мэк тэ ублавэн (тэ важынэн) ман пэ роўна ублады́тка (весы), соб (кай) Дэвэ́л тэ могинэл тэ джинэ́л пал миро чачипэ́н.

⁷ Ко́ли мирэ́ пирэ́ (сто́пы) рисинэ́ криг дромэ́стыр, ці, ко́ли миро ило́ гия́ пал мирэ́ якха́, ци ко́ли вари-сави́ дош прияця кэ мирэ́ васта́,

⁸ то тэды мэк ма́нгэ тэ чхував зя́рка дрэ пхув, нэ явирэскэ тэ хал дова́, со барьёла, ци тэ́ньчи мэк миро ро́до тэ рискирэ́н криг корне́нца (рукхэ́нца).

⁹ Ко́ли вари-сави́ джувлы́ тэ затэрдэл миро ило́, ці, ко́ли мэ тэ гарадёвав паш мирэ́-пашатунэскиро вуда́р,

¹⁰ тэды, мэк тэ дэл, соб (кай) мири́ ромны́ тэ мелинэл ваш явирэскэ, и, соб (кай) яви́р мурша́ тэ бандякирэн шэрэ́ анги́л ла́тэ.

¹¹ Пал-дова́ со дава́ явэ́лас проштавибэн (трашаны дош кэ ка́ра), и дава́ исын фуипэ́н тэ сэндинэл сэндарискэ.

¹² Пал-дова́ со дава́ явэ́лас сыр яг, сави́ халас саро́ кэ хась, и сави́ рискирэлас криг рукхэ́нца (корне́нца) саро́ миро миштыпэ́н.

¹³ Ко́ли мэ дыкха́вас вучипна́са пэ мирэ́-штубакирэ дынаристэ ци дынарицатэ, ке́ли ёнэ лыджинэ́ чинга́рд ма́нца;

¹⁴ со ж тэды трэиндя́ ма́нгэ тэ кэра́в, ке́ли Дэвэ́л лэ́ла тэ сэндинэл? И ко́ли Ёв пхучэла ма́ндыр, со ж тэды ма́нгэ явэ́лас тэ отпхэнав Лэ́скэ?

¹⁵ Ци одова́, Кон создыя́ ман дрэ дакири лоч, ци на Ёв создыя́ кодолэ́ писхарье́н? Ци на Ёв высоздыя дуе́н дрэ лоч?

¹⁶ Ко́ли мэ на давас дова́, со чорорэ́ камэнас, ци ко́ли мэ кэравас адя́кэ, со пивленгирэ (удовэнгирэ) якха́ обчхувэнаспэ ясвэ́нца;

¹⁷ ци ко́ли мэ хавас кокоро́ миро котэ́р, и соб (кай) пирото (сирота) тэ на хал ма́нца; –

¹⁸ пал-дова́ со пирото мирэ́ тэрныпнастыр бария паш ма́ндэ, сыр паш дадэ́стэ, и мэ лыджавас пир джиибэ́н адаля пивля, сыр фэ́ни мэ выгиём да́кирэ лочатыр,

¹⁹ ци ко́ли мэ дыкха́вас, со вари-кон хасёлас пир дова́, со на сыс лэ́стэ со тэ урьел, ци чорорэс, конэ́стэ на сыс со́са тэ учхакирэлпэ;

²⁰ ци ко́ли лэ́скиро трушу́л на бахтякирдя́ ман, и ци мирэ́-бакрэнгири вы́лна (шэрсь) на татькирдя лэс,

²¹ ци ко́ли мэ ґаздавас пэ́скиро васт пэ пиротостэ, мэк мэ и дыкха́вас мирэ́ манушэ́н паш по́рта,

²² тэды мэк тэ пэрэ́л криг миро васт мирэ́ псикэстыр, мэк тэ рискирдёл яври́ миро васт кокалостыр.

²³ Пал-дова́ со хась Дэвлэ́стыр зоралэ́с трашакирэлас ман, и пир дова́ мэ на могинавас тэ вырикирав Лэ́скиро фэдырипэн.

²⁴ Ци, ко́ли мэ тэ ужакирав лачхипэ́н сувнака́стыр, ці, ко́ли мэ тэ пхэна́в выкэдынэ́ сувнакаскэ: “Дрэ ту́тэ мэ зоралэ́с патя́ва.”

²⁵ Ци, ко́ли мэ древа́н тэ радынавпэ долэ́стыр, со мэ со́мас древа́н барвало́, ци пир дова́, со миро васт дорэсця́ бут;

²⁶ ці, ко́ли мэ тэ дыкха́в путрадэ якхэ́нца пэ кхам, сыр ёв дэ́лас дуд, ци пэ чхон, сыр ёв джал штэто́стыр пэ штэ́то пир болыбэ́н, зяиндой,

²⁷ и ко́ли кхам и чхон чораханэ́с тэ затырдэн миро ило́, ці, ко́ли мэ тэ чамудав пэ́скиро васт сы́рбы тэ дав паты́в лэ́скэ;

²⁸ тэды дава́ адэкэ-паць явэ́лас чорипэ́н, со исын мол пэ сэ́ндо; пир дова́, со мэ тэды сы́рбы отпхэнаваспэ Дэвлэ́стыр, Саво́ исын пэ вучипэ́н.

²⁹ Ко́ли мэ тэ радынавпэ зоралэ́с, со хасибэ́н пыя́ пэ лэ́стэ, ці, ко́ли мэ тэ ґаздавпэ радыма́тыр, сыр биба́хт пыя́ пэ лэ́стэ;

³⁰ ці, ко́ли, чачипна́са, мэ тэ мэнчынав миро муй тэ пхэнэ́л грэ́хо, ці, соб (кай) мэ камамас прокошыбэ́н (арманя) пэ лэ́скиро ди;

³¹ ці, ко́ли тэ пхэнэ́н мануша́ мирэ́ шатратыр: “Ци исын вари-кон, саво́ на хая чалэ́с лэ́скиро мас?”

³² ці, ко́ли вари-саво́ чу́жо ману́ш тэ ратькирэл пэ вули́ца (га́са), ці, ко́ли мэ тэ на псиравав мирэ́ вудара́ дромэскирэскэ (прохожонэскэ);

³³ ко́ли, мэ тэ чхакирав мирэ́ чорэ́ рэ́нды сыр Адамо, гарави миро чорипэ́н пал брэк,

³⁴ пал-дова́ со мэ дарававас манушэ́нгирэ скопостыр, и сэм΄енгиро накутякирибэн кэ мэ трашавэлас ман, тэды мэ явавас штыл, и мэ на джавас яври́ пал вуда́р.

³⁵ О, ко́ли тэ явэ́л вари-кон ма́ндэ тэ шунэ́л ман! Ѓа́да, исын миро подчхиныбэн: мэк Сарэзорья́киро Дэвэ́л тэ отпхэнэл ма́нгэ! И соб (кай) миро проти – тэрдыпнаскиро ману́ш тэ чхинэл миро бандькирибэн!

³⁶ Чачипна́са, мэ лыджавас дава́ бандькирибэн пэ миро псико́; и мэ пхандавас лэс пэ шэро́ сыр крали́тко стадык;

³⁷ мэ приджинаваспэ Дэвлэ́скэ пал кажно миро шаго (ламны), мэ сы́рбы тхага́ри джавас пашэдыр кэ Ёв.

³⁸ Ко́ли мири́ пхув тэ дэл го́дла пэ ма́ндэ, и ко́ли ла́кирэ лесьни (борозды) тэ ровэ́н кхэтанэ́ пэ ма́ндэ,

³⁹ ко́ли мэ хаём ла́кирэ барьякирдэ́ (пло́ды) биловэнгиро, и ко́ли мэ мэнчындём кэ мэрибэ́н дия́, конэ́скири пхув дая́ сыс,

⁴⁰ то мэк тэ барьён канралэ раслины пэ гивэскиро штэ́то, и мэк тэ барьёл дылыны чар (куколь) пэ ґэрстоскиро (ячменёскиро) штэ́то (Иовоскирэ лава́ кончындлэпэ).