Ióvo 30 - Библия - Пэ Балтитко Романи чиб (Романэс) 2019

¹ Нэ акана́ тэрнэ́ мануша́ санапэ холямэс ма́ндыр, савэнгирэ дадэн мэ вычхурдавас илэ́стыр фэды́р, сыр тэ чхував пашы́л джуклэндэ, со ракхэнас мирэ́ – бакрэнгири стада.

² Дыкхэ́н, саво́ ж ко́фо исын ма́нгэ лэ́нгирэ – вастэнгирэ зорья́тыр? Лэ́нгиро часо (цы́ро) хасия́.

³ Ёнэ вышутинэ бокха́тыр и наухтылыбнастыр; ёнэ нашнэ́ пэ чхучэ́ прахи, кай нанэ мануша́, и кай исын чхучо́;

⁴ ёнэ, кон обкэдынэ лондэ чарья́ пашы́л хру́сты, и кон ха́ла ракитытка му́ри.

⁵ Лэн традынэ криг пэ́стыр мануша́, и пэ лэ́ндэ дынэ́ го́дла сыр пэ чорэндэ.

⁶ Ёнэ сыс бангэ́ тэ дживэ́н дрэ цёмна рыцьвины, дрэ ґебара́ (пешчэры) машки́р пхув, и дрэ скалы,

⁷ ёнэ годлынэ сы́рбы ослы (мега́рья) машки́р хру́сты, ёнэ притасадёнас екх кэ екх тэ татён тэл пхусадытка хру́сты.

⁸ Ёнэ сыс чхавэ́ дылынэндыр, чхавэ́ налачхэ́-ирьякирэ манушэ́ндыр; лэн традынэ криг пхувья́тыр.

⁹ И акана́ мэ яцём сы́рбы сабнытко гилы́; ґалён, мэ яцём сы́рбы сабнытко сыкаибэ́н (приме́ро).

¹⁰ Ёнэ древа́н на камэ́на ман, ёнэ исын тэрдэ́ кригал ма́ндыр; ёнэ и на пригаравэнапэ, соб (кай) тэ чунгардэн ма́нгэ дро муй.

¹¹ Пал-дова́ со Дэвэ́л розмэкця шэло мирэ́ лукостыр и кэрдя́ адя́кэ, со мэ яцём напхутькирдо. Ёнэ чхурдынэ́ криг пэ́стыр сы́рбы савари, соб (кай) тэ кэрэ́н, со камэ́на.

¹² Мирэ́ чачэ́ рига́тыр лэ́ндыр пирангачы (исчадии) ґаздэ́напэ, ёнэ подчхувэна ґэро́й ма́нгэ, и ёнэ ґаздэ́напэ пэ ма́ндэ пэ́скирэ хасибнытконэ приемэнца,

¹³ Ёнэ ґэралякирдэ миро дром, ёнэ кэрдэ́, соб (кай) мэ тэ пэрав, и ние́кх нанэ тэ подэл васт ма́нгэ лэ́ндыр.

¹⁴ Ёнэ джа́на маму́й пэ ма́ндэ, сыр пирда́л буґло́ выпхарипэн, ёнэ катынэнапэ пэ ма́ндэ сы́рбы штормо чхувэ́лапэ барэ́нца.

¹⁵ Трашаибэна рисёна пэ ма́ндэ, ёнэ традэнапэ пал мири́ паты́в сы́рбы балва́л, и миро миштыпэ́н проурняндыя пашы́л ма́ндэ сыр о́блоко пэ болыбэ́н.

¹⁶ Нэ акана́ миро ди чхувэ́лапэ криг ма́ндыр хор тугатыр; дывэса́ мэнькаса лынэ́ трусця́л ман.

¹⁷ Мирэ́ кокалы́ промардэ дрэ ма́ндэ раты́, и мирэ́ дукха́ ха́на ман би откхиныбнаскиро

¹⁸ Древа́н пхаро́ исын ма́нгэ тэ злав мири́ и́дя, мирэ́ дукха́ пхандлэ ман пал мирэ́-шалнироскиро (хитоноскиро) мэнитко.

¹⁹ Дэвэ́л чхурдыя́ ман дрэ дрич (болото), и мэ яцём сыр пра́хо и пра́ска (пепло).

²⁰ Дэ́вла! Мэ зоралэ́с кхара́ва Тут, нэ со́скэ Ту на отпхэнэса ма́нгэ; мэ уштава и Ту фэ́ни дыкхэ́са пэ ма́ндэ.

²¹ Ту яця́н биилытко, и Ту рикирэсапэ проти ма́ндэ сарэ́ Тырэ́ зорья́тыр.

²² Ту ґаздыян ман, и Ту адя́кэ кэрэ́са, соб (кай) мэ тэ вурнявав пэ балва́л; Ту кэрэ́са биба́хт мирэ́ кучипнаскэ.

²³ Пал-дова́ со мэ джино́м, со Ту янэса ман кэ мэрибэ́н, и кэ упхэндло́ кхэр, кай скэдэ́напэ сарэ́ джидэ́.

²⁴ Чачо́, кажно мангипэ́н кэ Дэвэ́л нанэ ивья́ (напра́снэс), ке́ли Ёв протырдэла Пэ́скиро васт пэ манушэ́стэ дрэ руи́ны; ко́ли ёнэ явэ́на тэ дэн го́дла, сыр Ёв вымарэла лэн.

²⁵ Ци на рондём мэ пал манушэ́стэ, конэ́скэ сыс пхаро́? Ци на тугинэлас миро ди пал чорорэндэ?

²⁶ Пал-дова́ со мэ ужакирдём лачхипэ́н, нэ биба́хт явдя́, и мэ ужакирдём дуд (свэ́то), нэ явдя́ калыпэ́н.

²⁷ Саро́ андра́л ма́ндэ кирьёла, и на откхинёла; дывэса́ мэнькаса явнэ́ кэ миро муй.

²⁸ Мэ калыём, псириндой, нэ дава́ на кхамэстыр, мэ уштава пэ скэдыибэ́н и мэ да́ва го́дла тэ помогинэн ма́нгэ.

²⁹ Мэ яцём пшалэса шакалэнгэ, и малэса страусэнгэ.

³⁰ Мири́ цы́па калёла и пэрэ́ла ма́ндыр, мирэ́ кокалы́ пэкэнапэ хачкирибнастыр.

³¹ Мири́ лута (арфа) парудыя тэ тугинэл ровибнаса и мири́ свиролька яця́ заня́са, сави́ ровэла.