Ióvo 29 - Библия - Пэ Балтитко Романи чиб (Романэс) 2019

Ио́во Затэрдёла кэ Ко́нцо

¹ Ио́во затэрдёла пал пэ́стэ палатуно́ (после́днё) мо́ло.

² “О, соб (кай) ма́нгэ тэ явав кадасавэса сыр дрэ прогинэ́ чхона́, сыр дрэ дывэса́, ке́ли Дэвэ́л приракхэлас ман;

³ и ке́ли Лэ́скиро момолы́тко (свети́льнико) свэнцынэлас анги́л миро шэро́, и ке́ли Лэ́скирэ дудэса мэ гиём пирда́л калыпэ́н (цямлыпэ́н):

⁴ сыр дава́ сыс дрэ мирэ́ бахталэ́ бэрша́, ке́ли Дэвэ́л набицялэс дыкхця́ пал мири́ ша́тра,

⁵ ке́ли Сарэзорья́киро Дэвэ́л сыс паш ма́ндэ, сыр мирэ́ тырнэ мануша́ сыс паш ма́ндэ,

⁶ ке́ли мирэ́ ґэра́ компиндлэпэ дро тхуд, и ке́ли ска́ла чхувэлас пал ма́ндэ оливи́тко дзэт рэкэнца!

⁷ Ке́ли мэ джавас кэ форо́скири по́рта, ке́ли мэ бэшавас пэ пэ́скиро штэ́то яври́ пэ форуны́ (пло́шча);

⁸ то тэрнэ́ мануша́ дыкхэнас ман и гарадёнас, и мурша́ дрэ бэрша́ уштэнас и сыс тэрдэ́,

⁹ тхага́рья пириячэнас тэ ракирэ́н, и ёнэ чхувэ́нас васта́ пэ пэ́скирэ муя́,

¹⁰ манушэ́нгири зан, сави́ сыс райканэ родо́стыр, цыция (зникниндя), и лэ́нгири чиб приячэлас кэ талой (нёбо) дрэ лэ́нгирэ муя́.

¹¹ Кажно (сва́ко), кон шундя́ ман, шарэлас ман; а кажно, кон дыкхця́ ман, приджинэлас вагаса ман;

¹² пал-дова́ со мэ вытырдавас чорорэс, сыр ёв дыя́ го́дла, и адя́кэ-паць пиротос (бидадэскирэ чхавэ́с), савэ́стэ на сыс ние́кх тэ подэл васт.

¹³ Одова́, кон хасёлас, шарэлас ман, и мэ кэравас адя́кэ, со ило́ пивлятэ (удоватэ) багалас радыма́тыр.

¹⁴ Мэ урьявас чачипэ́н пэ пэ́стэ: и ёв учхакирэлас ман, миро чачипэ́н сыс сыр понча и сыр турбано.

¹⁵ Мэ со́мас сы́рбы якха́ ваш корорэскэ, и сы́рбы ґэра́ лангалэскэ.

¹⁶ Мэ со́мас дад одолэ́скэ, конэ́стэ сыс трэ́бима; и мэ розґалёвавас саро́ пал рэ́ндо, ко́ли мэ на джиндём лэс.

¹⁷ Мэ пхагавас жанды начачипнаскирэндэ, и мэ тырдавас яври́ чордо дорэсыбэ́н лэ́нгирэ дандэндыр.

¹⁸ Тэ́ньци мэ пхэндем: “Мэ мэра́ва дрэ пэ́скири гня́зда, и мэ ява́ва тэ джива́в ада́кицы бут дывэса́, кицы́ прахинки исын;

¹⁹ миро корнё (рукх) диндькирэлапэ (вытырдэлапэ) кэ паня́, и пахлын (роса) исын пашты сари́ рат пэ мирэ́ рандя́,

²⁰ миро барипэ́н на пхурьёла андра́л ма́ндэ, и миро лу́ко зоралэ́с рикирэ́лапэ дро миро васт.

²¹ Мануша́ шундлэ́ ман и ужакирдэ, и ёнэ прилэнас штылэ́с, сыр мэ давас го́дла:

²² палэ мирэ́ лава́ ёнэ на ракирдэ́ нэвэ́стыр и миро ракирибэ́н пэрэлас пэ лэ́ндэ сыр капли (чулыня) брышындэстыр,

²³ Ёнэ ужакирдэ ман сыр брышы́нд, и ёнэ отпхандэнас пэ́скирэ муя́ буґлэс сыр пэ познё брышы́нд.

²⁴ Ко́ли мэ сандёмпэ холямэс лэ́ндыр, ке́ли ёнэ на патяндынэ́ ма́нгэ, тэды мирэ́-москири мина подрикирэлас лэн.

²⁵ Мэ выкэдавас дром лэ́нгэ, и мэ со́мас бэшто́ сыр шэрало́, и мэ ячаваспэ сыр кра́ли дро халадыбэ́н, сыр кодова́, кон подрикирэлас манушэ́н, савэ́ тугинэна.