Ióvo 28 - Библия - Пэ Балтитко Романи чиб (Романэс) 2019

Пхэныбэна Пал Годыпэ́н

¹ “Тумэ́ джинэ́на со исын шахта ваш руп, и исын штэ́то, кай билякирэна сувнака́й.

² Састы́р лэ́лапэ пхувья́тыр, и харко́ма (медь) биладёла (плавинэлапэ) барэстыр.

³ Ману́ш хачкирэ́ла яг дро калыпэ́н, и ёв пириродэла сыр най фэды́р саро́ кэ яго́ры (краи́): бара́ дро калыпэ́н, кай исын мэрибнаскири зэр (тень).

⁴ Ёв ганавэла шахтытко ґаны́нг криг манушэ́ндыр: кай Манушэ́скиро ґэро́й бистрэла, ёнэ подублавэна пэс пэ шэлэ, ёнэ кунинэнапэ пэ лэ́ндэ упрэ́ и тэлэ́.

⁵ Дрэ пхув барьёла маро́, нэ пхув тэлэ́ исын сы́рбы пиририскирды яга́са.

⁶ Дрэ пхувья́кирэ бара́ исын бут сапфиры и дрэ пхув исын пра́хо сувнака́са.

⁷ Ние́кх рискирибнаскири чириклы на джинэ́ла дроморэ дрэ шахты, и коршуноскири якх на дыкхця́ дава́.

⁸ Пхутькирдэ́ шчэра́ (левы) на штадэ пир дова́, и шакало на псирдя́ пир дова́.

⁹ Ману́ш чхувэ́ла пэ́скиро васт пэ кремнитко бар, ёв рискирэ́ла бэ́рги упрэ́ фундаментэнца.

¹⁰ Ёв чингирэла анги́л прогиибэна дрэ скалы, и лэ́скири якх дыкхэ́ла кажно куч бар.

¹¹ Ёв пиричхакирэла рэкицы, соб (кай) ёнэ тэ на тхадэн, и ёв лыджа́ла пэ дуд (свэ́то) саро́, со исын гарадо́ тэл пхув.

¹² Нэ кай сашты́ тэ латхэл годыпэ́н? И кай сашты́ тэ сыклёл, соб (кай) хор тэ ґалёл?

¹³ Ману́ш на джинэ́ла тими́н далэскэ, и годыпэ́н нашты́ тэ латхэс пэ пхув, кай дживэ́на.

¹⁴ Хор паня́ ракирэ́на: “Ма́ндэ на латхэса годыпэ́н,” и мо́рё (дэрья́в) ракирэ́ла: “Ма́ндэ на латхэса годыпэ́н.”

¹⁵ Годыпэ́н нашты́ тэ кинэс пал выкэдыно сувнака́й, ци тэ ублавэс (тэ важынэс) руп сыр тими́н (цымин) пал годыпэ́н.

¹⁶ Нэ годыпэ́н нашты́ тэ дэс чол (тими́н) Офисоскирэ сувнака́са, кучонэ́ ониксоса, ци сапфироса.

¹⁷ Ни сувнака́й, ни кристало нашты́ тэ роўнякирэс кэ годыпэ́н; адя́кэ-паць и кхорэ́ (сасу́ды) сувнака́стыр.

¹⁸ Пал мириклэ (коралы) и мутин (жэмчуго) и на ракирэ́на; адя́кэ сыр и тими́н (цымин) пал годыпэ́н исын кучэдыр рубинэндыр.

¹⁹ Топазо Эфиопиятыр нашты́ тэ роўнякирэс кэ годыпэ́н, адя́кэ-паць и нашты́ тэ чхувэ́с тими́н пэ годыпэ́н жужэ́ сувнака́са.

²⁰ И, кай сашты́ тэ латхэс годыпэ́н? И кай сашты́ тэ сыклёс, соб (кай) хор тэ ґалёс?

²¹ Дава́ исын гарадо́ манушэ́нгирэ якхэ́ндыр, савэ́ дживэ́на, дава́ гаравэлапэ чириклендыр дро фа́но (воздухо).

²² Хась и мэрибэ́н ракирэ́на: “Амэ шундя́м допхэныбэ́н пэ́скирэ канэнца.”

²³ Дэвэ́л ґалёла дром кэ годыпэ́н, Дэвэ́л джинэ́ла штэ́то тэ латхэс годыпэ́н.

²⁴ Пал-дова́ со Ёв дыкхэ́ла пхув кэ сама яго́ры (концы), и Лэ́скэ бицяло́ саро́, со исын тэл болыбэ́н.

²⁵ Сыр Ёв чхувэлас весо балвалякэ, и Ёв выгинэлас паня́ мераса,

²⁶ и ке́ли Ёв чхувэлас стату́то брышындэскэ и дроморо громоскирэ блискавицакэ;

²⁷ то тэ́ньчи Ёв дыкхця́ годыпэ́н и Ёв пхэндя́ статэчнэс; Ёв зачхудя годыпэ́н и Ёв спробиндя годыпэ́н,

²⁸ и пхэндя́ Дэвэ́л манушэ́скэ: “Акэ, годыпэ́н исын дро дова́, соб (кай) тэ дарэс Ра́стыр-Дэвлэ́стыр, и ґалыибэ́н исын дро дова́, соб (кай) тэ дурьёс бибахталэ́ рэндэ́ндыр.”