Ióvo 24 - Библия - Пэ Балтитко Романи чиб (Романэс) 2019

Ио́во Пхучэлапэ, со́скэ Барвалэ́ Кэрэ́на Фуй Чорорэнгэ

¹ Со́скэ Сарэзорья́киро Дэвэ́л на упхэндя часы тэ сэндякирэ́л? Со́скэ кодолэ́, кон джинэ́ла Лэс, на дыкхэ́на Лэ́скирэ дывэса́, со Ёв выкэдыя́ ваш сэ́ндо?

² Э мануша́ пиричхувэна шпэры пэ пхув тэ лэн буты́р, ёнэ нахратэс заухтылэна бакрэ́нгирэ гурты и ёнэ чаравэна лэн кэ пэ.

³ Ёнэ традэ́на зорья́са кэ пэ пиротэнгирэ (сиротэнгирэ) ослэн, ёнэ лэ́на пивленгирэ (удовэнгирэ) гурувэ́н сыр сымады́ (залого).

⁴ Ёнэ шпулэна (пихинэна) богэн криг дромэ́стыр: чорорэнгэ пэ дая́ пхув трэй тэ гарадён.

⁵ Акэ, ёнэ исын сы́рбы буса (дика) ослы (мега́рья) пэ чхучэ́ прахи, ёнэ джа́на пэ буты́, и ёнэ родэ́на тася́рлэс (ра́нэс) хабэ́н: чхучэ́ сте́пи (маля) дэ́на хабэ́н лэ́нгэ и лэ́нгирэ чхаворэнгэ.

⁶ Чорорэ́ чхинэна тэлэ́ на пэ́скиро хахаибэн пэ фэ́лда, ёнэ кэдэна винаграды́тка му́ри кэ фуй мануша́;

⁷ ёнэ ратькирэна нангэ, би урибнаскиро, лэ́ндэ нанэ со́са тэ чхакирэнпэ дрэ шыл.

⁸ Ёнэ киндёна бэргитконэ брышындэндыр, и ёнэ облэна скалы сыр гаравипнаскири (убежышча) пэ́скэ.

⁹ А кадалэ́ фуй мануша́ отлэна криг пиротэн (сиротэн) колынэстыр и ёнэ лэ́на сымады́ чорорэндыр:

¹⁰ а кадалэ́ чорорэ́ псирэ́на нангэ, би идякиро, и бокхалэ́, лыджа́на ґарбы (снопы);

¹¹ ёнэ тасавэна оливи́тко дзэт машки́р ва́нты, и ёнэ штавэна винаграды́тка му́ри дро тасавильня (пресо) и ёнэ мэнчынэнапэ трушатыр (смэгатыр).

¹² Э мануша́ дэ́на ґондя́ годла́са форо́стыр, и дукхадэ дия́ годлякирэна; – нэ Дэвэ́л на причхинэла банг фуе́ манушэ́нгэ пал грэхи́тка рэ́нды.

¹³ Одолэ́ фуе́-манушэ́ндыр исын кадасавэ́ вэ́рги, кон бунтуинэна сы́рбы пэ дуд; ёнэ на джинэ́на ни Лэ́скирэ дрома́, ёнэ на ячэ́напэ пэ дром дудэса (светоса).

¹⁴ Сыр дывэсёла, уштэ́ла замарибнаскиро, ёв мулякирэ́ла чорорэн и богэн, а раты́ ёв чорэла.

¹⁵ Биладжакунэскирэ якха́ ужакирэ́на бэльвэ́ль, пхэни́ пэ́скэ: “Ние́кх на дыкхэ́ла ман”, и ёв гаравэла пэ́скиро муй.

¹⁶ Дро калыпэ́н ёнэ подганавэнапэ тэл кхэра́, пэ савэ́ ёнэ чхудэ́ шпэ́ра дывэсэ́, ёнэ на джинэ́на дуд.

¹⁷ Зло́ко (ра́нко) исын ваш лэ́нгэ сы́рбы мэрибнаскири зэр (тень), пал-дова́ со ёнэ джинэ́на ратякири зэр, сави́ на трашавэла лэн.

¹⁸ Тумэ́ ракирэ́на! Ёв, хачи, исын сы́рбы котэрорэ пэ пани́, со валны (вэлны) сы́гэс лыджа́на криг лэн, нэ лэ́нгири пхув исын тэл прокошыбэ́н (арманя), и ние́кх на рисёла пэ дром кэ лэ́нгири бар винаградоса.

¹⁹ Шутькирибэн и хачкирибэ́н выхала ивитка паня́, адя́кэ-паць и лю́но (преисподня) кэрэ́ла кодолэ́ манушэ́нца, савэ́ кэрдэ́ грэ́хи.

²⁰ Дакири лочови́ (утроба) бистрэла лэс, кирмо явэ́ла тэ чарадёл лэ́стыр: лэс буты́р на явэ́на тэ рипирэ́н мануша́, и фуй ману́ш пхадёла сыр кашт.

²¹ Пал-дова́ со ёв притасавэла бичхаворэнгирья джувля́, сави́ на биянэ́ла, и ёв на кэрэ́ла лачхипэ́н пивлякэ (удовакэ).

²² Нэ Дэвэ́л тырдэла зоралыпнаскирэ манушэ́н Пэ́скирэ зорья́са, ману́ш ґаздэ́лапэ, нэ ние́кх ману́ш зоралэ́с на патя́ла дро пэ́скиро джиибэ́н.

²³ Дэвэ́л дэ́ла лэ́нгэ ракхибэн, пэ саво́ ёнэ розгинэна, нэ Лэ́скирэ якха́ дыкхэ́на пэ лэ́нгирэ дрома́.

²⁴ Ёнэ ґаздэ́напэ пэ набаро́ часо, тэ́ньчи ёнэ нашадёна. Тэ́ньци Дэвэ́л чхувэ́ла лэн тэлэ́; ёнэ джа́на криг дромэ́стыр сыр и яви́р мануша́, ёнэ вышутёна сыр гивэскирэ шэрорэ (колосы).

²⁵ Ко́ли на адя́кэ джа́ла акана́, кон допхэнэ́ла, со мэ хохавава, и со миро ракирибэ́н нисо́ нанэ мол?”