Ióvo 23 - Библия - Пэ Балтитко Романи чиб (Романэс) 2019

Ио́во Пхэнэ́ла Статэчнэс, со Дэвэ́л Сэндякирэ́ла Чачунэ́с

¹ И отпхэндя́ Ио́во лавэ́нца:

² “Адя́кэ-паць и кэ ададывэ́с мэ ишчо (инкэ́) жалинавапэ; мирэ́ мэ́ньки исын пхарэдыр мирэ́ гонде́ндыр (уздохэндыр).

³ О, соб (кай) ма́нгэ тэ джина́в, кай мэ могинавас тэ латхав Лэс, соб (кай) ма́нгэ тэ явав кэ Лэ́скиро штэ́то!

⁴ Мэ чхувавас анги́л миро рэ́ндо анги́л Лэ́стэ и миро муй явэ́лас пхэрдо́ зоралэ́ лавэ́нца;

⁵ соб (кай) мэ тэ джина́в лава́, савэ́нца Ёв отпхэнэ́лас ма́нгэ, и соб (кай) мэ тэ ґалёвав, со Ёв пхэнэ́ла ма́нгэ.

⁶ Нау́што Ёв явэ́лас тэ лыджа́л чинга́рд ма́нца сарэ́ Лэ́скирэ барэ́ зорья́тыр? Над. Нэ Ёв рисёла тэ шунэ́л ман.

⁷ Одо́й дэвлы́тка мануша́ могинэ́нас тэ пириракирэн причыны Лэ́са, и мэ выракхаваспэ ўса́ды (сак) мирэ́ сэндаристыр.

⁸ Акэ, – мэ джа́ва анги́л, нэ Ёв нанэ одо́й, и мэ палэ, нэ мэ нашты́ тэ роздыкхав Лэс;

⁹ сыр Ёв кэрэ́ла буты́ пэ зэ́рво (ле́во) риг, мэ нашты́ тэ дыкха́в Лэс; ке́ли Ёв рисёла пэ чачи́ (право) риг, мэ на могина́ва тэ дыкха́в Лэс.

¹⁰ Нэ Ёв джинэ́ла дром, савэ́са мэ джа́ва, и Ёв пропатякирдя ман и мэ выджава сыр сувнака́й.

¹¹ Мири́ ґэро́й рикирдяпэ зоралэ́с пэ Лэ́скирэ дрома́; мэ гиём украт (точнэс) Лэ́скирэ дромэ́са, и мэ на рисиём дрэ риг.

¹² Мэ на чхурдыём пэ риг припхэныбэна́ Лэ́скирэ уштэндыр, мэ ракхцём дрэ годы́ сыр сувнака́й Лэ́скирэ – уштэнгирэ лава́ фэды́р мирэ́ хабнастыр, со трэй ма́нгэ.

¹³ Нэ Лэ́скири годы́ на парудёла, кон сашты́ тэ рискирэ́л Лэс Лэ́скирэ дромэ́стыр? Дова́, со Лэ́скиро ди камэ́ла, кодова́ Ёв и кэрэ́ла.

¹⁴ И Ёв выпхэрдякирдя дова́, со исын припхэндло ма́нгэ, и кадасавэ́ припхэныбэна́ исын бут Лэ́стэ.

¹⁵ Палдава́ ма́ндэ трашаибэ́н кэ мэрибэ́н анги́л Лэ́стэ: сыр мэ обдуминава дава́, тэды мэ дарава Лэ́стыр.

¹⁶ Пал-дова́ со Дэвэ́л кэрдя́ миро ило́ ковло, и дава́ Ёв, Сарэзоралыпнаскиро Дэвэ́л, страхакирэла ман;

¹⁷ сыр Ёв на чхурдыя́ ман тэ хасёвав анги́л, сыр явдя́ калыпэ́н, и Ёв на гарадя ту́га калыпнаса мирэ́ якхэ́ндыр.”