Ióvo 22 - Библия - Пэ Балтитко Романи чиб (Романэс) 2019

Элифазо Бангякирэла Иовос, со Ёв исын Бибахтало́

¹ И отпхэндя́ Элифазо Феманостыр лавэ́нца:

² “Ци могинэ́ла ману́ш тэ янэл ко́фо (льго́та) Дэвлэ́скэ? Дава́ исын ваш лэ́скэ кокорэскэ ко́фо, ко́ли о ману́ш исын годо́.

³ Сави́ ра́дыма (лош) исын Сарэзоралыпнаскирэ Дэвлэ́скэ, ко́ли ту сан чачуно́? Ци, со Ёв лэ́ла далэ́стыр, со ту дживэса бидошэнгирэс?

⁴ Ци, со Ёв сы́рбы дарэ́ла ту́тыр, и палдава́ Ёв лыджа́ла чинга́рд ту́са, и палдава́ Ёв лыджа́ла тут пэ сэ́ндо? – Над.

⁵ Ци, на кэрдя́н ту бут биба́хт, и со нашты́ аж тэ погинэс тырэ́ чорэ́ рэ́нды?

⁶ Пал-дова́ со ту лэсас сымады́ (залого) Тырэ́ пшалэ́ндыр ни палсо́, и ту лучкирдян и́дя нангэ манушэ́ндыр.

⁷ Ту на дэсас пани́ кхинякирдэ манушэ́нгэ, и ту жалинэсас маро́ бокхалэ́ манушэ́нгэ.

⁸ Нэ ту дыя́н васт зоралыпнаскирэ манушэ́нгэ тэ лэн пхув и манушэ́нгэ дрэ паты́в тэ дживэ́н пэ дая́ пхув.

⁹ Ту бичхавэсас пивле́н (удовэн) чхучэ́ вастэ́нца, и ту пирипхагэсас васта́ пиротэнгэ (сиротэнгэ).

¹⁰ Палдава́ фэлы́ исын трусця́л ту́тэ, и мэрибнытко дар мэнчынэла тут;

¹¹ ци дава́ цямлыпэ́н (тьма), со ту на могинэ́са нисо́ тэ дыкхэ́с, и бут паня́ чхакирдэ тут.

¹² Ци со, – нанэ Дэвэ́л най вучэды́р сарэ́стыр пэ болыбэ́н? Дыкх жа пэ чэргэня́: сыр ёнэ исын вучэ́с.

¹³ Нэ ту ишчо (инкэ́) ракирэ́са: “Со джинэ́ла Дэвэ́л? Ци Ёв тэ сэндинэл пир хор цямлыпэ́н,

¹⁴ Пхарэ́ о́блоки чхакирдэ лэс адя́кэ, со Ёв нашты́ тэ дыкхэ́л, и Ёв псирэ́ла трусця́л (кругом) пир болыбна́скиро круго.

¹⁵ Ци явэ́са ту тэ рикирэспэ кэ пхурано́ дром, савэ́са фуй мануша́ псирдэ́?

¹⁶ И савэ́ сыс мулякирдэ́ анги́л лэ́нгиро часо, и сы́рбы фунда́менто, саво́ тасадыпнаскиро панинг змордя криг сарэ́са.

¹⁷ Ёнэ пхэндлэ́ Дэвлэ́скэ: “Джа́ криг амэ́ндыр! И со амэ́нгэ Сарэзоралыпнаскиро Дэвэ́л могинэ́ла тэ кэрэ́л?”

¹⁸ Нэ Ёв пхэрдякирдя́ лэ́нгирэ кхэра́ миштыпнаса, а мэ дурьёвава бэдэ-манушэ́нгирэ скэдынятыр.

¹⁹ Чачунэ́ мануша́ дыкхэ́на, и ёнэ радынэ́напэ, и набангэ мануша́ санапэ, ке́ли Дэвэ́л сэндякирэ́ла бэдэ манушэ́н,

²⁰ ракири́: “Ѓа́да, амарэ́ вэ́рги хасякирдэ́, и яг похая саро́, со яця́пэ лэ́ндыр:”

²¹ Акана́ ковлякир пэ́скиро ило́ анги́л Дэвлэ́стэ и яв дро рама́нё (миро) Лэ́са: палдава́ явэ́ла лачхипэ́н ту́кэ.

²² Прилэ́ годя́са, мэ манга́ва, дова́, сыр Ёв сыклякирэ́ла чачипнаскэ тут Лэ́скирэ уштэндыр и чхув Лэ́скирэ лава́ дро тыро́ ило́.

²³ Ко́ли рискирэса ту пэ́скиро ило́ кэ Сарэзорья́киро Дэвэ́л, тэды нэвэ́стыр ту явэ́са баро́ ману́ш. Ко́ли дурьякирэса ту чорипэ́н пэ́скирэ вастэ́ндыр,

²⁴ то тэды явэ́са ту тэ гинэс сувнака́й сыр пра́хо, и Офироскиро сувнака́й сыр барорэ дрэ рэкицы.

²⁵ Тэ́ньци Сарэзорья́киро Дэвэ́л явэ́ла тыро́ сувнака́й и Ёв явэ́ла сыр бари бэ́рга рупэ́стыр ваш ту́кэ;

²⁶ и явэ́са ж ту древа́н тэ радынэспэ Сарэзоралыпнаскирэ Дэвлэ́скэ, и ту ґаздэса тыро́ муй кэ Дэвэ́л.

²⁷ И ту явэ́са тэ мангэспэ Лэ́скэ, и Ёв явэ́ла тэ шунэ́л тут, и ту дэ́са пэ́скирэ совлаха́ анги́л Лэ́стэ,

²⁸ и ту пхэнэ́са статэчнэс вари-со, и дава́ рэ́ндо рисёла дро чачипэ́н; и дуд явэ́ла тэ зяинэл пэ тырэ́ дрома́.

²⁹ Ко́ли манушэ́н чхурдэна тэлэ́, ту пхэнэ́са: “Ѓаздэнпэ!” И Дэвэ́л зракхэ́ла напхутькирдэ манушэ́н.

³⁰ И адя́кэ-паць Ёв выракхэла и кодолэ́н, кон исын бибангипнаскирэ, и Ёв выракхэла тумэн, ко́ли тумэ́ндэ нанэ банг (вина) пэ васта́”