Ióvo 21 - Библия - Пэ Балтитко Романи чиб (Романэс) 2019

Ио́во Отпхэнэ́ла Софароскэ

¹ И отпхэндя́ Ио́во лавэ́нца:

² “Шунэ́н важливэс (ракхибны́ткэс) илэ́са миро ракирибэ́н, и мэк дава́ тэ явэ́л тумаро́ раманипэн (утешэниё) ма́нгэ.”

³ Вырикирэн (потерпинэн) далэ́са, со мэ пхэна́ва: и пало́ дова́, сыр мэ выпхэнавапэ, тэды тумэ́ сашты́ тэ санпэ холямас ма́ндыр.

⁴ Мэ на жалинавапэ пэ манушэ́стэ, чачо́? Ци, ко́ли и исын дава́ адя́кэ тэды и ма́ндэ, хай, могинэ́ла тэ на ухтылэл миро ду́хо (фа́но)?

⁵ Придыкхэнпэ пэ ма́ндэ, и мэк ди́во тэ ухтылэл тумэн; причхувэ́н васт тэ запхандэн пэ́скиро муй.

⁶ Адя́кэ-паць и сыр мэ фэ́ни думинава пал дава́, тэды ма́ндэ трашаибэ́н кэ мэрибэ́н, и сарэ́ мирэ́ маса́ издрана.

Ио́во Кунинэлапэ, со Дэвэ́л Сэндинэла Фуе Манушэ́н

⁷ Ѓа́да, со́скэ фуй мануша́ ґара́ (длу́гэс) дживэ́на, и ячэ́на пхурэ́, и ячэ́на зоралыпнаскирэ машки́р манушэ́ндэ?

⁸ А лэ́нгирэ пала́л – явибнаскирэ чхавэ́ (унуки) зачхувэна пэ́скиро джиибэ́н пашы́л лэ́ндэ, и лэ́нгиро ро́до барьёла пэ лэ́нгирэ якха́.

⁹ Дрэ лэ́нгирэ кхэра́ нанэ дар, адя́кэ-паць и нанэ Дэвлэ́скири ран тэ сыклякирэ́л лэн пэ лэ́ндэ.

¹⁰ Лэ́нгирэ гурувэстыр лотёна миштэ́с, целянты бидошакирэс, лэ́нгирэ гурумня исын цельна, и на нашавэна тыкнэн.

¹¹ Ёнэ вымэкэна пэ́скирэ биятэ́н сыр бакрорэнгиро гуртыцо, и лэ́нгирэ чхаворэ́ кхэлэна.

¹² Ёнэ багана зоралэ́с тэл бубно и лута, и ёнэ радынэ́напэ пэ́скэ тэл свиролька.

¹³ Лэ́нгирэ дывэса́ джа́на дро миштыпэ́н, и пирда́л мэнта ёнэ джа́на тэлэ́ дро лю́но (преисподня).

¹⁴ И ёнэ пхэнэ́на Дэвлэ́скэ: “Дурьёв амэ́ндыр. Пал-дова́ со амэ на камаса зоралэ́с тэ джинас Тырэ́ дрома́!

¹⁵ Кон исын Сарэзорья́киро, соб (кай) амэ тэ дынарина́с Лэ́скэ? И саво́ лачхипэ́н амэ́нгэ, со амэ ява́са тэ мангаспэ Лэ́скэ?

¹⁶ Ѓа́да, лэ́нгиро миштыпэ́н исын дрэ лэ́нгирэ васта́: нэ мэ на псирава пэ кадалэ́ бэдэ-манушэ́нгири скэдыны.

¹⁷ Кицы́ мо́лы тумэ́ дыкхнэ́, со бэдэ-манушэ́нгиро момолы́тко (свети́льнико) мурдёла? Кицы́ мо́лы бари би́да пэрэ́ла пэ лэ́ндэ? Ци хасякирэ́ла Дэвэ́л бибахталэ́ манушэ́н дрэ пэ́скири холы́?

¹⁸ Ци со, хай, балва́л роспхурдэла криг лэн сыр пхув, и со, хай, бари балва́л ухтылэ́ла криг лэн сы́рбы чхучо́ пхус?

¹⁹ Тумэ́ пхэнэ́на: “Дэвэ́л приракхэла лэ́нгирэ чорэ́ рэ́нды ваш лэ́нгирэ чхавэ́нгэ?’ Над: мэк Дэвэ́л тэ отплэскирэл палэ дадэ́скэ,

²⁰ соб (кай) ёв тэ джинэ́л дава́: акэ, мэк лэ́скирэ якха́ тэ дыкхэ́н пэ́скиро хасибэ́н, мэк ёв тэ пьел тахта́й, со исын пхэрдо́ Сарэзорьякирэ барэ́ холя́са?

²¹ Сави́ ж забота явэ́ла лэ́скэ лэ́скирэ чхавэ́ндыр пало́ дова́, сыр кончынэнапэ лэ́скирэ чхона́ тэ дживэ́н?

²² Ци ману́ш сашты́ тэ сыклякирэ́л Дэвлэ́с? И дава́ ж исын Ёв, Кон сэндинэла кодолэ́н, савэ́ исын пэ вучэ́ штэ́ты.

²³ Екх ману́ш мэрэ́ла дрэ сари́ пэ́скири зор, саво́ дживдя́, вольнэс и бидаракиро;

²⁴ лэ́скирэ маса́ андра́л исын пхэрдэ́ тхулыпнаса, и чэкэ́н (тхулыпэн) дрэ лэ́скирэ кокалы́ исын сапано.

²⁵ Яви́р ману́ш мэрэ́ла киркипнаса пэ лэ́скиро ди, ёв ние́кхвар на хая чалэ́с:

²⁶ нэ енэ дуйджинэ́ кхэтанэ́ пасёна дро пра́хо, и кирмэ чхакирэна лэн.

²⁷ Акэ, мэ джино́м тумарэ́ ду́мы, и планы, соб (кай) тэ бангякирэн ман.

²⁸ Тумэ́ ж ракирэ́на: “Кай исын тхагарискиро кхэр? И кай исын ша́тра, дрэ сави́ дживэ́на бэда мануша́?”

²⁹ Ци на пхучнэ́ тумэ́ манушэ́ндыр, савэ́ традэ́на дромэ́нца? И со тумэ́ на шундлэ́ лэ́нгирэ допхэныбэна?

³⁰ Со фуй ману́ш исын пригарадо дро дывэ́с, сыр явэ́ла бари би́да, и лэс лыджа́на дрэ риг, сыр явэ́ла Дэвлэ́скири холы́.

³¹ Кон бангякирэла маму́й кэ лэ́скиро муй, со ёв кэрэ́лас? Кон скушэла холы́ пэ лэ́стэ?

³² А мануша́ лыджа́на лэс кэ маґила, и стрэ́га явэ́ла пашы́л лэскир копли́ца.

³³ Пхувья́кирэ котэра́ дрэ ґанби́н явэ́на гудлэ́ лэ́скэ, кажно ману́ш джа́ла пал лэ́скиро мулыкано (ґробо) пэ гараибэн, и бут мануша́, со нашты́ тэ погинэс, джа́на анги́л лэ́стэ.

³⁴ Сыр тэды тумэ́ подрикирэна миро ду́хо (фа́но) чхучэ́ лавэ́нца? Савэ начачунэ исын тумарэ́ отпхэныбэна!”